ოზურგეთის მუნიციპალიტეტის მერიაში მიმდინარე რეორგანიზაციის მოტივით, სწავლული აგრონომი, ცნობილი ფერმერი, გაეროს მიერ სერთიფიცირებული ექსპერტი სოფლის მეურნეობის მიმართულებით, აკაკი ღლონტი გაათავისუფლეს.
აღნიშნულმა ფაქტმა საზოგადოებაში გაკვირვება და უსამართლობის შეგრძნება გამოიწვია.
_არ ვიცი, რატომ გამათავისუფლეს. აშკარად გაუგებარია, რა კრიტერიუმებით ათავისუფლებენ გასაშვებ და დასატოვებელ კადრებს. მაინტერესებს, მობილობის წესის შესახებ თუ იცის რაიმე ამ საქმის შემოქმედმა? რომელი კანონის საფუძველზე შემამოწმეს? დარღვევები ნახეს? შეურაცხმყოფელია, უბრალოდ… გასაკვირი ის არის, რომ ვადაგადაცილებულ თუ საერთოდ შეუსრულებელი დავალების მქონე მოხელეებს აწინაურებენ და საქმის მცოდნეს დევნიან. ამ არეულ, ამ შიმშილის დროში, თავად ხელფასები გაიზარდეს. გამოდის, იმ 35 ადამიანის ხარჯზე, ხომ? რომ ჰკითხო, ბიუჯეტს უფრთხილდებიან და ზედმეტ შტატებს ამცირებენ…არ არის სასაცილო? მე მეცოდება მართლა პროფესიონალი ადამიანები, ვინც სამსახურიდან შერჩევით დაითხოვეს. მხოლოდ ხელფასზე იყვნენ დამოკიდებული და ასე უცერემონიოდ, სამთვიანი კომპენსაციის ამარა, შინ გაუშვეს. სოფლის მეურნეობის განყოფილება გაუქმდა, ტურიზმის განყოფილება გაუქმდა. …დაჯდა სამკაციანი თუ ხუთკაციანი ჯგუფი და თურმე უნარ-ჩვევებით შეარჩიეს კომისია. საკითხავია, ვინ და რატომ ეწირება ოზურგეთის მერიაში რეორგანიზაციის სახელით ჩატარებულ პროცესებს?
მე მინდოდა, ძლიერი სოფელი გვქონოდა. რაც შემეძლო, თავდაუზოგავად ვშრომობდი. ნახონ, გადახედონ, რაც ვაკეთე. ასეთი არაფერი მინახავს.., მინდოდა, მერს შევხვედროდი, თუმცა პასუხი ვერ მივიღე. ზის სადღაც რამდენიმეკაციანი ჯგუფი და მერს გადასცემენ არასასურველთა სიებს..._ საუბრობს „გურია ნიუსთან“ აკაკი ღლონტი.
აკაკი ღლონტი სუბტროპიკული მეურნეობის სწავლული აგრონომია, დამთავრებული აქვს ანასეულის კვლევითი ინსტიტუტის ასპირანტურა. სტაჟირება ამერიკაში, ორიგონის შტატში გაიარა, 2004 წელს, ბიომეურნეობის კუთხით. ასევე გავლილი აქვს სტაჟირება ბალტიისპირეთის ქვეყნებში. მემამულეთა კავშირის თანადამფუძნებელია. არის ასევე აგრობიზნესცენტრის კონსულტატი, „ელკანას“ წევრი 1997 წლიდან და ასევე სამრეწველო-სავაჭრო პალატის ტრენერი სოფლის მეურნეობის საკითხებში.
ასევე მრავალი წელია, გურია ნიუსის“, სასოფლო -სამეურნეო ჩანართის („კარმიდამო ჩემი“) აქტიური რესპოდენტი და მრჩეველია. მის ყოველ პუბლიკაციას თუ რჩევას მკითხველი მუდამ ინტერესით ელოდება.
გავრცელებული ინფორმაციით, აკაკი ღლონტს, მერიაში რეორგანიზაციის სახელით მოქმედი ჯგუფი ასე იმიტომ გაუსწორდა, რომ არჩევნებზე, ყოფილი მერის, კოტე შარშენიძის შტაბიდან, ერთ-ერთ უბანზე დამკვირვებელი იყო.
ჩვენს კითხვაზე, შეეფერება თუ არა, მისი აზრით, ეს გავრცელებული ინფორმაცია სიმართლეს, ის ამბობს:
_არაა გამორიცხული, რომ ასე იყოს. კი, დამკვირვებელი ვიყავი არჩევნებზე. 27 წელია, მე ვმეგობრობ შარაშენიძის ძალზე შრომისმოყვარე, მეურნე ოჯახთან. დამკვირვებელი თუ ვარ, სტატუსიდან და ჩემი ბუნებიდან გამომდინარეც, ესე იგი ორივე მხარეს ვიცავ, ხომ? ხომ კარგად მიცნობენ? თუ სადმე შუკა-შუკა დავრბოდი ან ვინმე იტყვის, ვინმესთვის მეთქვას, ხმა იმას მიეცი ან ამას არ მისცე-თქო? მოკლედ, სასაცილოა ეს ყველაფერი და თან სატირალიც…სასამართლოს კი აუცილებლად მივმართავ. ვსვამ კითხვას, თუ რეორგანიზაციაა, თავისთვის რატომ გაიზარდეს ხელფასები და შტატები? სირცხვილი მათ, თორემ მე რა შრომაც მიწევდა, შესატყვისი ხელფასი არც მქონდა. არსად დავიკაგები. საკუთარი გარჯით შექმნილი საოჯახო გარემო და მეურნეობა მაქვს, გულწრფელად ვამბობ, ბევრი კარგი სპეციალისტი გაუშვეს, რომლებსაც მართლა ეს ხელფასი ჰქონდათ საარსებო წყაროდ და მეცოდება ყველა…- გვითხრა აკაკი ღლონტმა.
ოზურგეთის მუნიციპალიტეტის საკრებულოს თავმჯდომარე დავით დარჩია და მისი მოადგილე ლავრენტი ბიგვავა, კარგად იცნობენ აკაკი ღლონტს, როგორც წარმატებულ კომპეტენტურ მეურნეს , ფერმერს და საჯარო მოხელეს.
„გურია ნიუსის“ კითხვაზე, რატომ გაწირეს ასე უყოყმანოდ დარგის ბრწყინვალე სპეციალისტი და ხომ არ იყო ამის მიზეზი პოლიტიკური სარჩული, არ გვეთანხმებიან.
_ჩვენ პერსონალებზე არ ვსაუბრობთ. ეს არის რეფორმა. მერიაში რეორგანიზაცია ხდება. თუმცა, მანამდე, როცა კომისიებზე იხილებოდა ეს საკითხი, არცერთი არ მოსულა, არ დაუსვამთ კითხვა. მოსულიყვნენ. იქნებ, რაღაც სახის ცვლილება მომხდარიყო. ჩვენ ადამიანებს სამსახურიდან არ , ვაგდებთ, ასე ვთქვათ. ეს ცილისწამებაა, _ ამბობს ლავრენტი ბიგვავა.
რაც შეეხება დავით დარჩიას, მანაც კატეგორიულად იუარა, რომ აქ არანაირი შერჩევით გათავისუფლება არ მომხდარა და ეს არის რეორგანიზაცია. შეგვახსენა ისიც, რომ ჩვენ, ჟურნალისტები ხშირად ვწერდით გაბერილი შტატების თაობაზე და რომ საჭირო არაა ამდენი შტატი, რითაც ბიუჯეტი ზარალდება.
რა თქმა უნდა, მართალია ბატონი დათო, როცა შეგვახსენებს, რომ წარმოუდგენლად ზედმეტი შტატებითაა ავსებული სხვადასხვა სამსახური, ა(ა)იპ ორგანიზაციები… თუმცა ჩვენც შევახსენებთ აკაკი ღლონტის კითხვას, რომელიც მისეული ლოგიკის დროს, თავისთავად ჩნდება: თუ ზედმეტი შტატების გამო ხდება რეორგანიზაცია და შემცირება, თავად რატომ გაიზარდეს ხელფასები, მოადგილეებს შტატები რატომ დაიმატეს მაღალი ხელფასებით?
როგორც ვთქვით, აკაკი ღლონტი, ისევე როგორც ოზურგეთის მერიიდან გათავისუფლებული 35 თანამშრომლის უმეტესობა, აპირებს, მიმართოს სასამართლოს.
პროცესებს კი ჩვენ ყოველთვის გავაშუქებთ.
ავტორი
