თუ ვერ დავიტოვეთ 500 მლნ კუბური მეტრი გაზი არსებული ფასით, ტარიფები გაიზრდება – სხვაგვარად შეუძლებელია – ამის შესახებ “ბიზნესპრესნიუსს” ენერგეტიკოსმა გია არაბიძემ განუცხადა.
ცნობისთვის, შაჰდენიზის საერთაშორისო კონსორციუმთან ერთ-ერთ კონტრაქტს, რომელიც საქართველოსთვის 500 მლნ კუბური მეტრი ბუნებრივი აირის მიწოდებას უზრუნველყოფს, ვადა 2026 წლის ბოლოს გასდის. ბოლო დროს, გააქტიურდა საუბარი იმასთან დაკავშირებით, რომ ქართული მხარე აგვიანებს მოლაპარაკებების დაწყებას აღნიშნული ხელშეკრულების ვადის გასახანგრძლივებლად.
როგორც “ბიზნესპრესნიუსს” გია არაბიძემ უთხრა, უახლოეს პერიოდში უკვე უნდა გადაწყდეს ქვეყნისთვის საკმაოდ მნიშვნელოვანი მოცულობის ბუნებრივი აირის მიწოდების საკითხი, რათა 2027 წლის ბალანსი განისაზღვროს. მისივე თქმით, მთავარი პრობლემა არა გაზის რაოდენობა, არამედ მისი ფასია.
ეს პოლიტიკაა, ერთი სახელმწიფო მეორეს ელაპარაკება და უკვე მათ დონეზე გადასაწყვეტი ამბავია. დაგვიანებული ნამდვილად არ არის მოლაპარაკებები. თუმცა, ბუნებრივია, უახლოეს პერიოდში უკვე უნდა იყოს საკითხი გადაწყვეტილი. იმისთვის, რომ დაიგეგმოს, როგორი უნდა იყოს 2027 წლის გაზის ბალანსი. რა, საიდან და როგორ უნდა მოვიტანოთ? აქ გაზის რაოდენობის პრობლემა კი არ დგას. რაოდენობის პრობლემა არ აქვს არც აზერბაიჯანს და არც რუსეთს. აქ საუბარია ფასზე. თუმცა, არც ესაა კატასტროფა. თუ ვერ მოვახერხეთ დამატებითი გაზის ყიდვა იმ ფასად, რა ფასადაც დღეს ვყიდულობთ, ვიყიდით სხვა ფასად. თუ ვერ დავიტოვეთ ეს 500 მილიონი კუბური მეტრი გაზი დღევანდელი ღირებულებით, ბუნებრივია, სამომხმარებლო ტარიფის და კომერციული საწარმოებისთვის მიწოდებული გაზის ფასის ცვლილებაც იქნება მოსალოდნელი. სხვაგვარად შეუძლებელია, როდესაც 17% ბალანსში ფასი იცვლება და ზემოთ მიდის. თუმცა, თუ ეს იქნება კომერციულსა და ამ შეღავათიან ფასს შორის სადღაც შუაში, ასატანი იქნება სისტემის დაცვით”, – განაცხადა გია არაბიძემ.
“ბიზნესპრესნიუსის” კითხვის საპასუხოდ, რა წვლილი შეიძლება შეიტანოს ქვეყნის გაზით მომარაგების საკითხში აზერბაიჯან-თურქეთს შორის 5 იანვარს გაფორმებულმა ხელშეკრულებამ, ენერგეტიკოსი ამბობს, რომ შესაძლოა, ამ ხელშეკრულებით მიღებულმა სარგებელმა კონსორციუმისგან მოწოდებული 500 მილიონი კუბური მეტრი გაზიც კი ჩაანაცვლოს.
შეგახსენებთ, თურქეთმა და აზერბაიჯანმა, საქართველოს გავლით გაზის ტრანსპორტირებაზე ახალი გრძელვადიანი შეთანხმება გააფორმეს. ხელი მოეწერა 15-წლიან კონტრაქტს 33 მლრდ კუბური მეტრი ბუნებრივი აირის იმპორტის შესახებ.
“კიდევ ერთი მნიშვნელოვანი მომენტია თურქეთისა და აზერბაიჯანის ახალი ხელშეკრულება. საუბარია 30 მილიარდ კუბურ მეტრ გაზზე მეტის მიწოდებაზე თურქეთისათვის. ეს გაზი სხვა გზით ვერ წავა თურქეთში. დავუშვათ, საქართველოს დარჩა მისი 5%, ეს უკვე მილიარდ ნახევარი კუბური მეტრი გაზია წელიწადში, რაც შესანიშნავ ბალანსს მოგვცემს. მოკლედ რომ გითხრათ, არ იქნება კატასტროფა, გაზი არის. ერთი ვარიანტია, რომ შესაძლოა, ცოტა მეტი თანხის გადახდა დაგვჭირდეს. მეორე ვარიანტი კი ისაა, თუ სამხრეთ კავკასიური გაზის გამტარუნარიანობა გაიზრდება და ჩვენ ოფციური გაზის შედარებით მეტი რაოდენობა დაგვრჩება. ასე შეიძლება ვერც კი ვიგრძნოთ ამ 500 მილიონი კუბური მეტრი გაზის შეწყვეტა”, – აცხადებს გია არაბიძე.
