თურქმენეთში, საბავშვო ბაღების აღსაზრდელებს ანიმაციურ ფილმებს რუსულ ენაზე ჩვენებ აიკრძალა, ამის შესახებ rus.azathabar წერს.
როგორც გამოცემა წერს, ინსპექტორებმა უკვე შეამოწმეს რამდენიმე ბაღი და იქ, სადაც დარღვევა დაფიქსირდა, თანამშრომლების ნაწილი გაათავისუფლეს, ნაწილს კი მკაცრი საყვედური გამოუცხადეს. საბავშვო ბაღების ადმინისტრაციები გააფრთხილეს, რომ ბავშვებს მხოლოდ თურქმენულ ენაზე უნდა აჩვენონ მულტფილმები.
გამოცემის ინფორმაციით, აიკრძალა ისეთი რვეულების გამოყენება, რომელთაც ყდაზე „რვეული“ რუსულად აწერიათ.
rus.azathabar წერს, რომ განათლების მუშაკის თქმით, რომელიც გამოცემის კორესპონდენტს ანონიმურობის პირობით ესაუბრა, ცოტა ხნის წინ აშხაბადის ინსპექტორებმა რეგიონის საგანმანათლებლო დაწესებულებებში ინსპექტირება ჩაატარეს.
„ინსპექტორებმა მასწავლებლები ბავშვებს მულტფილმების რუსულად ჩვენებაში დაადანაშაულეს და სამსახურიდან გაათავისუფლეს. მენეჯერებმა მკაცრი საყვედურები მიიღეს“ – განაცხადა კორესპონდენტთნ საუბრისას ანონიმურმა წყარომ
როგორც rus.azathabar წერს, ასევე მატარებლების სადგურებსა და აეროპორტებში, ისევე, როგორც სხვა სამგზავრო საშუალებებში, განცხადებები და ინსტრუქციებიც მხოლოდ თურქმენულად იქნება.
თურქმენეთში სახელმწიფო ენა თურქმენულია, რუსული ენის სტატუსი კი არცერთ ოფიციალურ დოკუმენტში არაა მითითებული. ქვეყანაში მხოლოდ ერთი სკოლაა, სადაც რუსულად ასწავლიან, თუმცა, დედაქალაქ აშხაბადისა და სხვა რეგიონული ცენტრების სკოლებში რუსული კლასები არსებობს.
ცნობისთვის, ცოტა ხნის წინ, თურქმენეთში მიიღეს კანონი საფოსტო მომსახურების შესახებ, რომლის მიხედვითაც, საფოსტო გზავნილების რეგისტრაციას მხოლოდ თურქმენულ ენაზეა დაშვებული. იქამდე მოქმედ, 2010 წელს მიღებულ კანონში ეს საკითხი არ იყო გათვალისწინებული.
[sexy_author_bio]
