პენტაგონმა მდუმარედ მხარი დაუჭირა უკრაინას, რუსეთში შორეული მოქმედებების განხორციელებლად – ამის შესახებ ბრიტანული გაზეთი Times წერს.
გამოცემა წერს, რომ მას შემდეგ, რაც ოქტომბერში დაიწყო მშვიდობიან მოსახლეობაზე ყოველდღიური თავდასხმები, პენტაგონმა გადახედა უკრაინის ომის საფრთხეების შეფასებას. რაც მთავარია, ეს მოიცავს ახალ განსჯებს იმის შესახებ, შეიძლება თუ არა იარაღის მიწოდებამ კიევში გამოიწვიოს სამხედრო დაპირისპირება რუსეთსა და ნატოს შორის.
ბრიტანული გაზეთი Times წერს, რომ უკრაინის სასიცოცხლო მნიშვნელობის ინფრასტრუქტურაზე რუსეთის მასიური დარტყმების შემდეგ, აშშ–ს ნაკლებად აწუხებს, რომ კიევის მიერ შორ მანძილზე განხორციელებულმა თავდასხმებმა შეიძლება კონფლიქტის ესკალაცია გამოიწვიოს. ამიტომ, უკრაინას უფლება მიეცა დამოუკიდებლად გადაეწყვიტა, როგორ გამოიყენოს უკრაინის შეიარაღებული ძალებისთვის გადაცემული იარაღი
“ჩვენ არ ვეუბნებით კიევს: “ნუ დაარტყამთ რუსებს [რუსეთში ან ანექსირებულ ყირიმში], ჩვენ არ შეგვიძლია ვუთხრათ მათ, რა გააკეთონ. ისინი წყვეტენ როგორ გამოიყენონ იარაღი. ერთადერთი, რასაც ჩვენ დაჟინებით ვითხოვთ არის ის, რომ ჩვენს მიერ მოწოდებული იარაღის გამოყენებისას უკრაინელი სამხედროები იცავდნენ ომის საერთაშორისო კანონებს და ჟენევის კონვენციებს“, – ამბობს აშშ–ს თავდაცვის დეპარტამენტიდან ანონიმური წყარო გამოცემასთან.
გამოცემა წერს, რომ 5 დეკემბერს რუსეთის თავდაცვის სამინისტრომ განაცხადა, რომ სარატოვისა და რიაზანის რეგიონის აეროდრომებზე თავდასხმა მოხდა უპილოტო თვითმფრინავების მიერ, რის შედეგადაც სამი სამხედრო მოსამსახურე დაიღუპა. რუსი სამხედროების ცნობით, თავდასხმის უკან უკრაინა დგას.
უკრაინას ინციდენტში მონაწილეობა ოფიციალურად არ დაუდასტურებია. თუმცა, უკრაინის პრეზიდენტის აპარატის უფროსის მრჩეველმა მიხაილ პოდოლიაკმა დაწერა, რომ „თუ რაიმეს ძალიან ხშირად გაუშვებთთ სხვა ქვეყნების საჰაერო სივრცეში, ადრე თუ გვიან უცნობი თვითმფრინავი დაბრუნდება გამგზავრების ადგილზე“.
ავტორი
