“თხილი რომ გადავარჩინოთ, ყოველდღიური ზრუნვაა საჭირო”

ოზურგეთის მუნიციპალიტეტის ოთხ სოფელში _ სილაურში, ბოხვაურში, გურიანთასა და მაკვანეთში, განსაზღვრულ სადემონსტრაციო ნაკვეთებზე, მეურნეთათვის საჩვენებელი სამუშაოები ტარდება. ამჯერად, სხვადასხვა სოფლის წარმომადგენლები, ეკონომიკისა და სოფლის მეურნეობის სამსახურის და სეს-ის გურიის რეგიონული სამსახურის წარმომადგენლები სოფელ მაკვანეთში, ნუგზარ კალანდარიშვილის ფართობს ეწვივნენ.

პირველი ეტაპზე, დეკემბერში, თხილის გასხვლა და გამოჭრა მოხდა, რომლის აუცილებლობასა და ღირსება-ნაკლოვანებებზე აგრონომმა აკაკი ღლონტმა საგანგებოდ მიუთითა:

_ არ შეიძლება თხილის გამოჭრა ჩაჩეხვის მეთოდით, რასაც ბევრი მეურნე ჯერ კიდევ არ აქცევს ყურადღებას, მოიმარჯვებს ნაჯახს და ასე ადვილად ითავებს საქმეს. თხილის ზედმეტი ღეროები და მსხვილი ტოტები უნდა გამოიხშიროს პატარა ზომის ხერხით. ჩაჩეხილ ძირებთან სოკოვანი დაავადებებისთვის საუკეთესო გარემო, ასე ვთქვათ, ბუდე იქმნება. დანარგავი ტოტის გადაჭრა აუცილებელია მომდევნო წელს და არა ისე დატოვება. წლების განმავლობაში მსგავსმა გულგრილმა დამოკიდებულებამ მიგვიყვანა აქამდე. თუ ელემენტარულ წესებს არ დავუკვირდით, შედეგი, რომელიც ასე მალე გვინდა დადგეს, დაგვიანდება. ჩათვალეთ, რომ საგანგებო მდგომარეობის გამოცხადებაა საჭირო თხილის გადასარჩენად, _ უთხრა ღლონტმა სხვადასხვა სოფლების წარმომადგენლებს.

დეკემბერში საჩვენებელი გასხვლის შემდეგ, დადგა მეორე ეტაპი _ თებერვლის ბოლოს და მარტის დასაწყისში სპილენძის შემცველი პრეპარატით დამუშავებას ნუგზარ კალანდარიშვილის ფართობზე ოთხი სოფლის წარმომადგენლები საგანგებოდ დააკვირდნენ. მეურნეები დაინტერესდნენ, რა ფაზაშია ახლა კვირტის ტკიპა, რომელიც ძალიან სწრაფად მანევრირებს და თუ სანაყოფე კვირტში ჩარჩენა მოახერხა, უვარგისი ნაყოფის მიღება უკვე გარანტირებულია.

_ ხან დღეში ორმოცდაათი ადამიანი მირეკავს, ზოგჯერ უფრო მეტიც და რჩევებს მეკითხება. არავის ვზარდები, მაგრამ მინდა მოსახლეობამ ირწმუნოს, რომ სადემონსტრაციო ნაკვეთებზე მოსვლა და პრაქტიკული რჩევების მიღება და შეწამვლის პროცესის პრაქტიკულად ნახვა, თუ რა და როგორ უნდა გაკეთდეს ახლა, ყოველდღიურად, გაცილებით უმჯობესია. თხილის კულტურა გადასარჩენია, ის ხელიდან უნდა გამოვტაცოთ ვერაგ დაავადებას, ასევე, უნდა დავიცვათ მავნებლებისგან, რასაც საგანგებო მიდგომა სჭირდება. უფრო მეტ ადამიანს ველოდით სადემონსტრაციო ნაკვეთებზე, თუმცა, რამდენიც მოვიდა, არ ვარ უკმაყოფილო. პროცესი დაიძრა. ეს არის დიდი გამოწვევა. თავს არ ვზოგავ, რომ თხილს ერთად ვუშველოთ, ერთმანეთს თუ არ დავეხმარეთ, არაფერი გამოვა, _ უთხრა აკაკი ღლონტმა ფართობში მისულ მეურნეებს.

თხილის მცენარის ტოტებზე ჯერ მოხდა დაკვირვება, რომელია სანაყოფე და საფოთლე კვირტები. ცალკე გამოყვეს, ტოტებს მოაშორეს ტკიპების მიერ დაავადებული კვირტები, რომლის გარჩევა საღი კვირტისგან ყველას უნდა შეეძლოს.

სეს-ის რეგიონული სამსახურის სპეციალისტმა ლალი გოგუაძემ განმარტა, რომ არაფრით არ შეიძლება, შეწამვლის თუნდაც ერთი დღით დაგვიანება. განსაკუთრებით, ახლა, როცა დათბა და მცენარეზე დაავადება თუ მავნებელი ერთნაირად აქტიურდება.

სოკოს დაავადებაზე პირველი წამლობის ჩვენება ნუგზარ კალანდარიშვილის დახმარებით დაიწყო _ სპილენძის შემცველი კუპერვალი, რომელიც ას ლიტრ წყალში ასი გრამის ოდენობით უნდა გაიხსნას, ამჯერად, საჩვენებელი და ნაკვეთისთვის საკმარისი დოზით მოამზადეს. შესხურების პროცესში ჩვენების ორგანიზატორებმა ახსნა-განმარტებითი საუბარი ჩაატარეს.

აკაკი ღლონტმა განმარტა, რომ ახლა, პირველ ეტაპზე, შესაძლებელია კუპერვალის ან სპილენძის შემცველი სხვა პრეპარატების, ბორდოთი _ შაბიამნით ჩანაცვლება. ჩვეულებრივ, როგორც ვაზის შესაწამლად იყენებენ ჩვენი მეურნეები. აპრილის შუა რიცხვებიდან, მომდევნო შეწამვლის დროს, ამ ხსნარს უკვე ბიფეტრინის შემცველობის პრეპარატიც დაემატება, რაც მავნებელი ფაროსანას საწინააღმდეგო ეფექტს მოგვცემს.

შეწამვლის დასრულების შემდეგ, მეურნეებმა დასვეს არაერთი კითხვა. მათ აინტერესებდათ, თხილის გაშენების დროს, დაშორების როგორი მანძილი სჯობს. ზოგმა განაცხადა, რომ 2X6 მეტრი დაშორებით აქვს განლაგებული, რაზეც აკაკი ღლონტმა ურჩია, რომ თანდათან უნდა მოახერხონ მოპირდაპირე ტოტების შეჭრა, მერე კი შუაში ერთი ძირის მთლიანად ამოღება და დარჩეს 6X4 მეტრი მანძილით.

_ თუ გვინდა, საუკეთესო შედეგი გვქონდეს, თხილის ტოტები ერთმანეთს არ უნდა ჩრდილავდეს და არც უნდა ეხებოდეს, _ თქვა ღლონტმა.

როგორც სადემონსტრაციო ნაკვეთზე შეკრებილებს უთხრეს, მომდევნო ეტაპზე მოხდება მოკირიანება და ამ პროცესზე დაკვირვება, რაც 20 წელში ერთხელ საკმარისია.

_ სინჯები აღებულია ამ ნაკვეთიდან. უკვე ვიცი პასუხიც. მალე აქვე მოვახდენთ მოკირიანებას, რაც თხილის გადარჩენისთვის ერთ-ერთი უმთავრესი აუცილებლობაა, რადგან გურია, ძირითადად, მჟავე ნიადაგების მხარეა. აქ ხელაღებით მოხდა თხილის კულტურის გაშენება. უნდა დავიჯეროთ, რომ ასეთი შედეგი ამიტომ დადგა, _ თქვა აკაკი ღლონტმა და დაასახელა ცალკეული ადგილები, მაგალითად, სოფელი შემოქმედი, სადაც ნიადაგის მჟავიანობა შედარებით დაბალია. დანარჩენ გურიაში კი მიწა აუცილებელ მკურნალობას ითხოვს და მხოლოდ შეწამვლა და მიწის ზედა ნაწილზე მცენარის მკურნალობა, სრულ შედეგს ვერ მოიტანს.

ფერმერებს დაურიგეს ბროშურები, სადაც დეტალურად არის ნაჩვენები ფენოკალენდარული სქემა და მისი რიგითობა მხოლოდ ცუდი ამინდის გამო შეიძლება, შეიცვალოს.