კინორეჟისორი და მკვლევარი ირაკლი მახარაძე ამბობს, რომ ლანჩხუთის მერიას მხარეთმცოდეობის მუზეუმთან მიმართებაში კანონდარღვევაში ადანაშაულებს.
„კანონში მუზეუმების შესახებ ვკითხულობთ:
თავი v. სამუზეუმო ფასეულობათა დაცვა
მუხლი 24. მუზეუმის შენობაში აკრძალულია სხვა დაწესებულების ან ორგანიზაციის ფუნქციონირება.
ასე რომ, თქვენ კანონს არღვევთ!“ _ განმარტავს ირაკლი მახარაძე.
როგორც მკვლევარი ჰყვება, ლანჩხუთის მხარეთმცოდნეობის მუზეუმის ერთ-ერთი ოთახი, მერიის გადაწყვეტილებით, არასამთავრობო ორგანიზაციას გამოეყო. სწორედ ამ ფაქტს უკავშირდება ირაკლი მახარაძისა და მუზეუმის თანამშრომელთა აღშფოთება და ადგილობრივი ხელმძღვანელობის მისამართით გამოთქმული პრეტენზიები.
„ლანჩხუთის მხარეთმცოდნეობის მუზეუმის დირექტორს ნონა იმნაძეს ველაპარაკე, მოვიკითხე, აღელვებული იყო, ხო მშვიდობაა-მეთქი, სახლშია ქია მშვიდობა, მარა მუზეუმში ვერაა საქმე კარგადო. რა ხდება-მეთქი და აი, რა მომიყვა: ისედაც პატარა ფართობის მქონე მუზეუმის ერთ ოთახში შემოყავთ უფასო იურიდიული დახმარების სამსახური. მგონი არასამთავრობო ორგანიზაციაა, ჯერ საბუთები არ მანახეს. ჩვენი ფონდი გადაგვატანინეს ცუდ პირობებში, ნესტიან ოთახებში. ქალაქის მერმა მითხრა, შენ არ გეკითხება, ეს სახელმწიფო შენობაა და მე ვარ უფროსიო.
მუზეუმი, რომლის ბალანსზეც ეს შენობაა, საინტერესოა, ვისია. არაფერი ამ ხელისუფლებას ჩვენი მუზეუმისათვის არ გაუკეთებია, პირიქით, ყველაფერი სპონსორების მიერაა გაკეთებული და ამათი უგულისყურობის გამო გვიფუჭდება. ისე მტრულად გვიყურებენ, თითქოს ჩვენთვის ვთხოვდეთ პირადულად რაიმეს. მოკლედ, მე მოხსნითაც დამემუქრა ბატონი მერი. რა ტურიზმს ავითარებენ, არ ვიცი, როცა ასეთი მუზეუმი ლამის დანგრევის პირასაა. ერთი ტრაფარეტი არ აღირსეს ,, გურული მხედრების” მოედანს, სხვა რამეზე ლაპარაკი ზედმეტია”, _ გვიყვება ირაკლი მახარაძე და იქვე აგრძელებს: „შთაბეჭდილება მექნება, რომ პეპლების ქვეყანაში ვცხოვრობთ, მხოლოდ ერთი დღით, რომ ამოვივსოთ კუჭი და ჟარგონი რომ ვიხმარო ჩვენი „გავისწოროთ“! არც წარსული აინტერესებს ვინმეს, არც მომავალი, ის უძვირფასეს მონაპოვარი, რაც წინაპრებმა შემოგვინახეს ქარს გავატანოთ უნდა ხომ?!. მათხოვრული შემოსავლის მქონე მუზეუმის თანამშრომლები კბილებით იცავენ და უვლიან ამ დიდებულ მუზეუმს. მე კარგად ვარ ჩახედული საქმეში და ვიტყვი, რომ აბრა მუზეუმზე რომ არის გაკრული ჩემი და ჩემი ძმის გაკეთებულია, ასევე ვიტრინები და სხვა. როგორც შემიძლია გვერდში ვუდგავარ მათ და რას მიკეთებს კულტურის სამსახური. დახურეთ ბარემ მუზეუმი და გახსენით საზკვების ობიექტი, შემოსავალი გექნებათ.
„კანონში მუზეუმების შესახებ“ ვკითხულობთ:
თავი v. სამუზეუმო ფასეულობათა დაცვა
მუხლი 24. მუზეუმის შენობაში აკრძალულია სხვა დაწესებულების ან ორგანიზაციის ფუნქციონირება.
ასე რომ თქვენ კანონს არღვევთ!
მარა ვინ დაგიდევს თურმე ამას. შარშან ჩემი პეტიციის საფუძველზე გურული მხედრების სახელი მივანიჭეთ მოედანს. ზარზეიმით მახარეს, ძეგლსაც დავდგამთო, ამას ვინ ჩივის _ ერთი აბრა ვერ აღირსეს, ერთი მაჩვენებელი.
ახლა ყოლიფერი პანდემიას არ დააბრალოთ!!!
ხშირად ვიმეორებ-ხოლმე ილია ჭავჭავაძის სიტყვებს _ “ერის დაცემა და გათახსირება მაშინ იწყება, როცა ერი, თავისდა საუბედუროდ, თავის ისტორიას ივიწყებს.
როგორც კაცად არ იხსენება ის მაწანწალა ბოგანა, ვისაც აღარ ახსოვს, ვინ არის, საიდამ მოდის და სად მიდის, ისეც ერად სახსენებელი არ არის იგი, რომელსაც ღმერთი გასწყრომია და თავისი ისტორია არ ახსოვს“, _ ილია ჭავჭავაძის სიტყვებს იშველიებს საკუთარი პოზიციის დასაფიქსირებლად ირაკლი მახარაძე ლანჩხუთის ხელმძღვანელი პირების მიერ მიღებულ გადაწყვეტილებაზე მხარეთმცოდნეობის მუზეუმთან მიმართებაში.
„გურია ნიუსი“ ირაკლი მახარაძის მიერ გაჟღერებულ ფაქტთან დაკავშირებით კომენტარისთვის მერიის პრესასთან ურთიერთობის განყოფილებას დაუკავშირდა.
ლანჩხუთის მუნიციპალიტეტის საკუთრებაში არსებული ქონება უსასყიდლო უზუფრუქტის ხელშეკრულებით გადაცემული ჰქონდა ა(ა)იპ „ლანჩხუთის მუნიციპალიტეტის კულტურის დაწესებულებათა გაერთიანებას“. მუნიციპალიტეტის მერიამ მიიღო გადაწყვეტილება, აღნიშნული ფართი დათმობოდა სსიპ იურიდიული დახმარების სამსახურს, რომელიც უფასოდ მოემსახურება შეზღუდული შესაძლებლობის მქონე პირებს. ამავე დროს მუნიციპალიტეტის საკუთრებაში არსებული ქონების, იურიდიული სამსახურისთვის გადაცემის საკითხი განიხილა ლანჩხუთის მუნიციპალიტეტის საკრებულომ და არსებობს საკრებულოს დეპუტატთა თანხმობა ფართის უზუფრუქტით სარგებლობასთან დაკავშირებით. აღსანიშნავია, რომ მხარეთმცოდნეობის მუზეუმის შენობის იმ ფართში, რომელზეც წერილშია საუბარი, დღემდე განთავსებული იყო ერთ-ერთი ა(ა)იპ. ფართს აქვს დამოუკიდებელი შესასვლელი და იურიდიული დახმარების სამსახურის მუშაობა მუზეუმის ფუნქციონირებას ხელს არანაირად არ შეუშლის.
და კიდევ, საქართველოს კანონი „მუზეუმების შესახებ“ მსგავს აკრძალვას, რაზეც ბატონი ირაკლი საუბრობს, არ ითვალისწინებს, _ ნათქვამია ლანჩხუთის მერიის პრესსამსახურის მიერ მოწოდებულ ინფორმაციაში.
