„გურია ნიუსის“ ინფორმაციით, გურიის გუბერნატორის მოადგილე სოსო ერქომაიშვილი თანამდებობას ტოვებს. როგორც ჩვენი წყარო ამბობს, ის თბილისში გადაყავთ. ერქომაიშვილი, რომლის ქმედებების გამო ხელისუფლებას ბევრჯერ მოუხდა თავის მართლების რეჟიმში ყოფნა, ამ ინფორმაციას არ ადასტურებს და არც უარყოფს. ამბობს, რომ ისე მოიქცევა, როგორც პარტიას დასჭირდება:
_ საარჩევნო პროცესი დაწყებულია. შესაბამისად, ცვლილებები დაგეგმილია გურიაში, და არა მარტო გურიაში _ მთელ ქვეყანაში. იქნება ცვლილებები, სხვადასხვა მიმართულებით. კონკრეტულად, როდის, ამაზე პარტია გააკეთებს განცხადებას. რაც შეეხება ჩემს თბილისში გადაყვანას, ეს თქვენგან მესმის პირველად. ზოგადად, ჩემზე ბევრ რამეს ამბობენ, მაგრამ მასე არაა… თუ გადაწყვიტეს ჩემი, ან სხვისი სადმე გადაყვანა, ან ზოგადად ცვლილებები, ეს ჩვეულებრივი პროცესია და რასაც მეტყვიან, სადაც დავჭირდები პარტიას, იქ წავალ, _ აღნიშნა ჩვენთან საუბრისას ერქომაიშვილმა.
_ ბატონო სოსო, კითხვა საკმაოდ კონკრეტულია და იქნებ, თქვენც კონკრეტულად გვიპასუხოთ _ მიდიხართ თუ რჩებით?
_ ჩემ გადაყვანაზე არაფერი ვიცი. ხოლო, ზოგადად ცვლილებები რომ იგეგმება, ის ზემოთაც აღვნიშნე…
_ და ამ ცვლილებებში მოხვედრის სურვილი გაქვთ?
_ მე ვარ საზოგადოებრივი მოძრაობის დამფუძნებელი და ეს ნიშნავს პოლიტიკაში როდემდეც ვიქნები. ჩემი სურვილები მეორე ხარისხოვანია _ სადაც მეტყვის პარტიის ლიდერები იქ წავალ. მერე, მეც ჩამანაცვლებს ვინმე და ა.შ…
ეს ჩვეულებრივი კანონზომიერებაა. პარტია ცოცხალი ორგანიზმია. როცა მოვა დრო და პარტიის წინაშე მდგარ გამოწვევებს ვერ ვუპასუხებ, ჩემით მოვითხოვ წასვლას. მგონი, ეს სწორი ნაბიჯი იქნება. ასე უნდა მოიქცეს სხვებიც და ეს ჩვეულებრივი მოვლენაა პარტიულ ცხოვრებაში…
_ პარტიულობას უსვამთ ხაზს. როგორც ვიცით, პარტიაში ნასაკირალში წაგებული შუალედური არჩევნების გამო საყვედური გითხრეს. როგორ გგონიათ, სურვილს ისევ შეგისრულებენ და კიდევ განდობენ არჩევნებს?
_ საყვედური მარტო ჩემთვის არ უთქვამთ. მე რომ დავინიშნე გურიაში, ნასაკირალთან ნაკლები შეხება მქონდა და შესაბამისად, პასუხისმგებლობა მე მარტო არ ამიღია _ აქ იყო გუნდური პასუხისმგებლობა და არა მარტო სოსო ერქომაიშვილის! იმ მოკლე პერიოდში ვერ მოვასწარი სიტუაციის შესწავლა და დავეყრდენი გუნდურ პრინციპს. კანდიდატურა რომ დამტკიცდა, შემდეგ საორგანიზაციო საკითხებში ჩავდე მთელი ჩემი გამოცდილება, მაგრამ ვერ უშველე _ მოხდა ის, რაც მოხდა.
_ თქვენი გამოცდილება არჩევნების წაგება იყო?
_ არა, ჩემი გამოცდილება იყო 2012 წელს მოგება და მოგებამდე უკომპრომისო ბრძოლა ნაციონალურ მოძრაობასთან _ 2011-დან !
_ ახლა რა დოზით ხართ პარტიულ საქმიანობაში ჩართული?
_ ჩემი ჩამოსვლის დღიდან ვცდილობდი ადგილობრივი პარტიის იმიჯი კიდევ უფრო გამემტკიცებინა. მოგეხსენებათ, კოალიციური მექანიზმიდან გადასვლა ინდივიდუალურზე ცოტა პრობლემებს ქმნის საკადრო მიმართულებით (ვგულისხმობ, კოალიციის დაშლას.) ამან თავისი შედეგი გამოუღო მთელ საქართველოში, შესაბამისად, გურიაც არ იყო გამონაკლისი. თუ რა ვქენი, რა ნაბიჯები გადაიდგა და როგორ, ამას ამომრჩეველი შეაფასებს. ბუნებრივია, დღესაც ვარ ჩართული პოლიტიკაში, ოღონდ შესაბამის დონეზე და არა ბოლომდე, ანუ კოლეგიალურად ვარ ჩართული…
_ კოლეგიალურად ჩართვა რას ნიშნავს? პარტიულ შეხვედრებს რომ ესწრებით დიტო სამხარაძის და სოსო გოგაშვილის მეგობრის სტატუსით?
_ ზემოთ ჩამოთვლილი ბატონები და ზოგადად ჩვენ, ვიყავით თანამებრძოლები 2011 წლიდან და ეს იმას არ ნიშნავს, რომ მეგობრობის ხარჯზე ვინმე ვინმეს რაიმე პრივილეგიას აძლევს. როგორც მე, ისე დიტო სამხარაძე და სოსო გოგაშვილი, ამ ბრძოლაში ვიყავით ჩართულები და შესაბამისი გამოცდილება დამიგროვდა.
_ და რა იყო ის გამოცდილება, რომლის მიუხედავად არჩევნები წააგეთ? რაც არ უნდა თქვათ, თქვენ ხელმძღვანელობდით პოლიტიკურ, საარჩევნო პროცესს…
_ ზემოთ ვთქვი, რომ ნასაკირალის თემა იყო გუნდური პასუხისმგებლობა!
სხვანაირად ნასაკირალის თემა ვერ წარიმართებოდა.
_ კონკრეტულ გვარებს არ დაასახლებთ?
_ ვინც იყო მაშინ შტაბში. ეს უჩემოდაც შეგიძლიათ მოიძიოთ… ჩემგან უხერხულია გვარების დასახელება.
_ თქვენ ხომ უფროსი იყავით და ყველაზე მეტი პასუხისმგებლობაც თქვენ გქონდათ. ამის შემდეგ იმის ამბიცია, რომ ისევ მართოთ პროცესები და ისაუბროთ გუნდურ პასუხისმგებლობაზე, მისაღებად მიგაჩნიათ?
_ პარტია გადაწყვეტს სამომავლოდ ვინ უხელმძღვანელებს და რა პასუხისმგებლობას დააკისრებენ.
_ თქვენი მომავალი? დარწმუნებით შეგიძლიათ გვითხრათ, რომ ჩვენი წყარო ცდება და თქვენ გუბერნატორის მოადგილის პოსტს არ ტოვებთ?
_ მე დანამდვილებით გეუბნებით, რომ დღეს გუბერნიაში ვარ და ვაგრძელებ ჩემი მოვალეობის შესრულებას!
_ დღეს გასაგებია… უახლოეს მომავალს ვგულისხმობთ, რომელზეც საუბარს თავს არიდებთ… ამიტომ სხვაგვარად გკითხავთ _ თქვენი მუშაობით, მართვის სტილით, სკანდალებითაც კი, თქვენი თანამდებობაზე მყოფი მეგობრები ხომ არ გაგინაწყენდნენ და ამის გამო ხომ არ გიპირებენ გადაყვანას?
_ ჩემი ინფორმაციით, მასეთი განაწყენებას ადგილი არ აქვს. რაც შეეხება მართვის სტილს, აბსოლუტურად ჯდება იმ მოთხოვნებში, რაც ზოგადი პოლიტიკაა დღეს ქვეყანაში, ანუ მე, პოლიტიკურ ჩარჩოს არ გავცდენილვარ. მე გურიიდან და გურიის პოლიტიკიდან არსად ვაპირებ წასვლას!
_ დარჩენას და პოზიციების გამყარებას გეგმავთ?
_ მოვიქცევი ისე, როგორც დასჭირდება ზოგადად საქმესა და პოლიტიკას!
_ ბატონო სოსო, თქვენი პარტიულ სიაში ყოფნა და საკრებულოს თავმჯდომარეობის ამბიციაც, რომელზეც ბევრს საუბრობენ, პოლიტიკას და საქმეს სჭირდება?
_ ზოგადად ჩემზე ბევრ რამეს საუბრობენ, ხოლო რაც იქნება საჭირო, მაგას პარტია გადაწყვეტს.
_ თქვენ ხომ გაქვთ ოზურგეთის საკრებულოს თავმჯდომარეობის ამბიცია. ჩვენი წყარო ამბობს, რომ სწორედ მაგ ამბიციების და ადგილობრივ ხელისუფლებასთან დაპირსპირების გამო შეგექმნათ პრობლემები…
_ ეს არის ჭორი ან ჭორები! მე არ მაქვს აღნიშნული პოზიციის დაკავების სურვილი, ვგულისხმობ საკრებულოს თავმჯდომარეობას. მე მიკავია პოლიტიკური თანამდებობა და ვასრულებ ჩემს მოვალეობას! რაც შეეხება დაპირისპირებას, ადგილობრივ ხელისუფლებასთან დაპირისპირება არ მაქვს, ხოლო, რას ფიქრობს მეორე მხარე, ეს კითხვა მათ დაუსვით.
_ თუ ეს ასეა, ოფიციალურ ღონისძიებებზე რატომ არ დადიხართ მათთან ერთად? კონცერტებზე სიარულს არ ვგულისხმობ. მაგალითისთვის „ნაბეღლავის“ ახალი ქარხნის გახსნა და თეა წულუკიანის გუშინდელი ვიზიტიც შეგვიძლია გავიხსენოთ, სადაც გუბერნატორი ორ მოადგილესთან ერთად იყო… მხოლოდ თქვენ არ იყავით…
_ ნაბეღლავის გახსნის დროს დაემთხვა ჩემი შეხვედრა გერმანელ პროფესორთან, რომელსაც სექტემბერში გერმანიის ერთ–ერთი სასწავლებლიდან ჩამოჰყავს 18 მაგისტრის სტუდენტი, რომლებიც ხარისხს დაიცავენ გურიაში _ ეს პროექტია, რომელიც ითვალისწინებს გურიის რეგიონში ტურისტული ინფრასტრუქტურისა და პოტენციალის შესწავლას. ამიტომ არ გახლდით ნაბეღლავში. რაც შეეხება მინისტრის სტუმრობას _ ამჯერადაც თბილისში ვიყავი იგივე ტურისტულ თემატიკასთან დაკავშირებით. ანუ ეს ფაქტები არანაირად არ ეხება საკითხი დისტანცირებას, პირიქით, ეხება მხოლოდ საქმეს.
_ და საქმე პარტიულ სიაში აისახება და ამის შემდეგ წახვალთ გუბერნიიდან?
_ არა, საქმე გურიის რეგიონში ტურიზმის განვითარებაში აისახება! ოდესღაც ყველა წავა. მარადიული რაც არის, თქვენ ჩემზე უკეთ მოგეხსენებათ!
