“ტრაქტორს დავუწვებით წინ” _ ლანჩხუთში, ჭანტურიების ნაკვეთში ტექნიკა ძალის გამოყენებით შეჰყავთ

ამ წუთებში უკიდურესად დაძაბულია ვითარება ლანჩხუთის მუნიციპალიტეტის სოფელ სუფსაში, სადაც ჭანტურიების საკარმიდამო ნაკვეთში ტექნიკის შეყვანას ძალის გამოყენებით ცდილობენ. ადგილზე მობილიზიებულია პოლიცია, ჩინური კომპანიის წარმომადგენლების თქმით, მათ ზემდგომი ორგანოებისგან მიიღეს მითითება, რომ შესულიყვნენ აღნიშნულ ნაკვეთში და ეწარმოებინათ  სამუშაოები. სამუშაოს შესრულებაზე ტრაქტორის ოპერატორიც უარს აცხადებს. ამ წუთებში ელოდებიან დამატებითი ტექნიკის შეყვანას.

ჭანტურიები ამბობენ, რომ არ დაუშვებენ მათ ნაკვეთში ტექნიკის შეყვანას. “ტრაქტორს დავუწვებით წინ და არ შემოვუშვებთ”, ამბობენ ისინი.

შეგახსენებთ, რომ ლანჩხუთის მუნიციპალიტეტის სოფელ სუფსაში მცხოვრები ჭანტურიების ოჯახი სახელმწიფოს  მათი კუთვნილი საკარმიდამო ნაკვეთის ძალადობრივ მითვისებაში სდებს ბრალს.

„ვის არ მივმართეთ დახმარებისთვის, მაგრამ არავინ ცდილობს, დაიცვას ჩვენი ოჯახის ინტერესები. გამოდის, რომ სახელმწიფო 592 კვმ–ს მიწის ნაკვეთს ძალადობრივად გვართმევს. საავტომობილო გზების დეპარტამენტმა  ჩვენი კუთვნილი 4805 კვმ. მიწის ნაკვეთიდან  მხოლოდ 592 კვმ. მიწის ნაკვეთის გამოსყიდვა მოითხოვა, რაც ავტობანისთვის სჭირდებათ. რახან ჩვენ ამას არ ვთანხმდებით, ახლა ცდილობენ, ძალის გამოყენებით შემოვიდნენ ჩვენს კუთვნილ ნაკვეთზე და სამუშაოები აწარმოონ, ამას არ დავუშვებთ “, _ ამბობენ ჭანტურიები, რომლებსაც წლებია,  საკუთარ საკარმიდამო მიწის ნაკვეთზე სანერგე მეურნეობა აქვთ გაშენებული და თავს სწორედ ამ საქმიანობით ირჩენენ. თუმცა, როგორც თავად ჰყვებიან, ჩქაროსნული ავტომაგისტრალის მშენებლობის გამო, პრობლემები შექმნათ. ირკვევა, რომ ავტომაგისტრალის სამტრედია-გრიგოლეთის მეოთხე ლოტზე ავტობანის მშენებლობა სწორედ ჭანტურიების ზემონახსენებ მიწის ნაკვეთზე გადის.