დონალდ ტრამპს სურს, რაც შეიძლება მალე დაასრულოს ომი უკრაინაში და აღადგინოს ეკონომიკური კავშირები რუსეთთან _ ამერიკის პრეზიდენტის ადმინისტრაცია მზადაა ამ მიზნით გაუგონარი ნაბიჯი გადადგას, _ იუწყება 24tv.ua.
კრემლი, ამერიკელი ინვესტორების მხარდაჭერით, ევროპისკენ მიმავალი გაზსადენის _ „ჩრდილოეთის ნაკადი 2“-ის (Nord Stream 2) აღდგენაზე მუშაობს, რაც ხაზს უსვამს დონალდ ტრამპის მოსკოვთან დაახლოების უდიდეს სურვილს.
მილსადენის მუშაობის აღდგენას სათავეში ჩაუდგა ყოფილი ჯაშუში და პუტინის მეგობარი მათიას ვარნიგი _ იგი 2023 წლამდე მართავდა „Nord Stream 2“-ს, რომელსაც „გაზპრომი“ აკონტროლებდა.
ვარნიგის გეგმა მოიცავს ტრამპის გუნდთან დაკავშირებას ამერიკელი ბიზნესმენების მეშვეობით, რისი მიზანიცაა უკრაინაში ომის დასრულება რუსეთის პირობებით და აშშ-სა და რუსეთს შორის ეკონომიკური კავშირების გაღრმავება.
ტრამპის ადმინისტრაციის ზოგიერთმა გამოჩენილმა ფიგურამ იცის ამერიკელი ინვესტორების მოზიდვის ინიციატივის შესახებ და ისინი ამ ქმედებას მოსკოვთან ურთიერთობების აღდგენის მცდელობის ნაწილად თვლიან.
ევროკავშირის მაღალჩინოსნებმა ბოლო დღეებში მიიღეს ინფორმაცია “Nord Stream 2”-ის მუშაობის განახლების შესახებ და ევროპის რამდენიმე ქვეყნის ლიდერმა შეშფოთება გამოთქვა.
“Nord Stream 2”-ის განახლების შემდეგ, აშშ-ს ექნება უპრეცედენტო გავლენა ევროპის ენერგომომარაგებაზე, თუმცა, ამ საქმეში ბევრი დაბრკოლებაა _ ამ შემთხვევაში შეერთებულმა შტატებმა რუსეთს სანქციები უნდა მოუხსნას, რუსეთმა უნდა აღადგინოს გაზის გაყიდვა ევროპაში, გერმანიამ კი დაუშვას ევროპაში პოტენციური მყიდველებისთვის გაზის მიწოდება.
ცნობისთვის. “Nord Stream 2”-ის ორი მილსადენიდან ერთი 2022 წლის სექტემბერში დივერსიული აქტის დროს ააფეთქეს, რამაც გაანადგურა ძველი “Nord Stream 1”-ის ორივე მილსადენი. “Nord Stream 2”-ის მეორე მილსადენი, რომლის წლიური სიმძლავრე 27,5 მილიარდი კუბური მეტრი ბუნებრივი აირია, არ დაზიანებულა, მაგრამ არასდროს გამოუყენებიათ.
აღსანიშნავია, რომ ტრამპი, მისი პრეზიდენტობის პირველი ვადის დროს აკრიტიკებდა ამ მილსადენის მუშაობას, ადანაშაულებდა ევროპას რუსულ გაზზე ზედმეტი დამოკიდებულებასა და, აქედან გამომდინარე, მოსკოვის ომის მანქანის დაფინანსებაში.
