აშშ-ს პრეზიდენტი დონალდ ტრამპი, 14 ივნისს, რუსეთის პრეზიდენტ ვლადიმერ პუტინს ტელეფონით ესაუბრა, _ იუწყება 24tv.ua და unian.net.
პუტინის თანაშემწის იური უშაკოვის თქმით, ტრამპის და პუტინის საუბარი 50 წუთს გაგრძელდა და ეს საუბარი „სასარგებლო“ იყო. უშაკოვის სიტყვებით, პუტინმა დაგმო ისრაელის თავდასხმა ირანზე.
თავის მხრივ, ტრამპმა ისრაელ-ირანის დაპირისპირება „საკმაოდ საგანგაშოდ“ მიიჩნია, თუმცა, აღნიშნა, რომ „ისრაელის დარტყმები ირანზე“ ეფექტური იყო. უშაკოვის თქმით, პუტინმა საპასუხოდ განაცხადა, რომ რუსეთი მზადაა იშუამდგომლოს მოლაპარაკებებში ორ ქვეყანას შორის.
ორივე პრეზიდენტი არ უარყოფს, რომ შესაძლოა, დაუბრუნდნენ მოლაპარაკებებს „ირანის ბირთვული პრობლემის“ შესახებ.
უშაკოვი ამბობს, რომ პრეზიდენტებმა უკრაინის შესახებაც ისაუბრეს _ პუტინი მზადაა, გააგრძელოს მოლაპარაკებები უკრაინასთან 22 ივნისის შემდეგ, _ თქვა უშაკოვმა.
მისი თქმით, ტრამპმა დაადასტურა, რომ მისი ინტერესია ომის, რაც შეიძლება სწრაფად დამთავრება. უშაკოვი ამტკიცებს, რომ პრეზიდენტებმა ხაზი გაუსვეს მათი ქვეყნების “იარაღით ძმობას“ (братство по оружию) მეორე მსოფლიო ომის დროს.
უშაკოვი ამბობს, რომ ტრამპმა და პუტინმა კმაყოფილება გამოთქვეს „პოზიტიური პირადი ურთიერთობების“ გამო და პუტინმა აშშ-ს პრეზიდენტს დაბადების დღე მიულოცა _ ტრამპს 24 ივნისს 79 წელი შეუსრულდა.
ამ საუბრის შემდეგ, Youtube-ს პოდკასტში Pod Force One ტრამპმა თქვა:
„პუტინმა ისაუბრა იმის შესახებ, რაც სურდა და იმის შესახებაც, რაც არ სურდა. ჩვენ კარგი საუბარი გვქონდა, თუმცა, ამისგან, ჯერჯერობით არაფერი გამოვიდა“.
