“ყველაზე დიდი პრობლემა, ჩემი აზრით, არის ტრანსპორტი, რომელიც 5 საათის მერე აღარაა, რის გამოც მოსწავლეები, რომლებიც მასწავლებლებთან ან დამატებით წრეებზე დადიან ლანჩხუთში სოფლებიდან ან თუნდაც ის ადამიანები, რომლებსაც სამუშაო 5-6 საათზე უმთავრდებათ, სახლში ვერ მიდიან! რაც შეეხება “მარშრუტკებს”, რომლებიც მიდიან ბათუმის, ფოთის მიმართულებით, არ მიჰყავთ ახლო მცხოვრები ადამიანები”, _ პრობლემაზე, რომელიც ბევრი წელია, ლანჩხუთის მოსახლეობას აწუხებს, აქცენტს სოციალურ ქსელში მარიამ კუკულაძე აკეთებს.
გარდა იმისა, რომ ლანჩხუთში, ქალაქის ტერიტორიაზე მოსაცდელის პრობლემაა და საზოგადოებრივი ტრანსპორტით მოსარგებლე ადამიანებს დარსა თუ ავდარში ღია ცის ქვეშ უწევთ დგომა, მგზავრები უკმაყოფილოები არიან იმითაც, რომ 16 საათის შემდეგ შიდა ტრანსპორტი აღარ მოძრაობს. საზოგადოებრივი ტრანსპორტის გრაფიკიდან გამომდინარე, დასაქმებულ ადამიანებს დილითაც ექმნებათ პრობლემები და დაგვიანებით უწევთ სამსახურში გამოცხადება.
საქმე ისაა, რომ მოსახლეობის ინფორმაციით, სუფსა-ურეკის ბოლო რეისი ლანჩხუთიდან 17:30 საათზე გადის, ჯაპანა-ეწერი კი დილით ათის ნახევარზე ჩამოდის ქალაქში, ბოლო რეისს 16:30-ზე აკეთებს. არადა, სამუშაო ცხრა საათისთვის იწყება და ექვს საათზე მთავრდება. მოკლედ, ტრანსპორტის მოძრაობის გრაფიკი სრულიად აცდენილია მოქალაქეთა საჭიროებას, რის გამოც, საზოგადოებრივი ტრანსპორტით მოსარგებლეებს დილითაც აგვიანდებათ. დილით ხომ დანიშნულების ადგილამდე მისვლა და დღის ოთხი საათის შემდეგ, ფაქტობრივად, შეუძლებელი ხდება ქალაქიდან სოფლების მიმართულებით გადაადგილება.
ის, რომ ტრანსპორტის მოძრაობის გრაფიკთან დაკავშირებით პრობლემებია, თანხმდებიან ადგილობრივ ხელისუფლებაშიც. საკრებულოს თავმჯდომარის ერთ-ერთმა მოადგილემ ვერიკო კვირკველიამ აღნიშნული საკითხი რამდენიმე თვის წინ საკრებულოს სხდომაზეც გააჟღერა, მუნიციპალიტეტის მერს ამ საკითხით დაინტერესება და ქმედითი ღონისძიებების გატარება სთხოვა:
“მუნიციპალური ტრანსპორტის მუშაობის გრაფიკთან დაკავშირებით არის პრობლემები. ის, ვინც დასაქმებულია, ამ გრაფიკის გამო, შეფერხებები ექმნება. ჩვენ გვქონდა ამ საკითხზე მსჯელობა, მოწვეული გვყავდა მძღოლები და გარკვეულ ეტაპზე მოწესრიგდა კიდეც ეს საკითხი, თუმცა, ამ ეტაპზე ისევ პრობლემური რჩება”, _ თქვა მაშინ კვირკველიამ მერის მისამართით.
ირკვევა, რომ ადგილობრივ მაღალჩინოსანთა დაინტერესების მიუხედავად, პრობლემა მაინც გადაუჭრელია და მოსახლეობას ტრანსპორტის მოძრაობის გრაფიკთან დაკავშირებით კვლავაც ექმნებათ დისკომფორტი.
ავტორი
