ოზურგეთს მუნიციპალიტეტის სოფელ ოზურგეთი- გურიანთის ცენტრალური გზის მონაკვეთზე (ოზურგეთი-ურეკის მაგისტრალი), მარჯვენა მხარეს, ასფალტის კიდის გასწვრივ, მთელ სიგრძეზე გადათხრილი სივრცე ჩანს.
_ ხშირად მოდით ჩვენთან და და ბევრ უცნაურობას ნახავთ. ეს „ტროტუარის ამშენებლები“, მგონი, ჩინური კომპანიაა, მაგრამ ადგილობრივის გარეშე ხომ ვერ ჩამოფრინდებოდნენ აქ? მოულოდნელად გამოგვეცხადნენ. მოვიდნენ და დაიწყეს გადათხრა. არავისთვის უკითხავთ, რას აკეთებდნენ, ვინ დაავალათ და რატომ თხრიდნენ ასე შეუსვენებლად. ნახეთ, ასფალტის კიდე, მთელ სიგრძეზე როგორ დააზიანეს. მერე გვითხრეს, რომ თურმე ტროტუარს გვიკეთებდნენ, თუმცა ვერც ის დაგვიკონკრეტეს, ვინ დაავალათ, ჩვენი ნების გარეშე, ჩვენთვის ტროტუარის გაკეთება? საიდან მოვიდნენ ეს „ტროტუარის ამშენებლები“? ასეთი განუკითხაობა რატომ ხდება?! _ გვეუბნებიან სოფელ ოზურგეთის მცხოვრებლები.
მართლაც, მთელი მაგსტრალის გასწვრივ, არხის მსგავსი ჭრილია გაკეთებული. ზოგან უხეშად, უსწორმასწოროდ გადათხრილი.
_ჩვენ არასდროს არავისთვის გვითხოვია, აქ ტროტუარი გაეკეთებინათ. როგორც „ტროტუარის ამშენებლებმა“ თქვეს, თუ ისეთ სიმღლეზე დააგებდნენ ქვაფენილს, გზის გასწვრივ მანქანას ვერავინ გააჩერებდა. ფეხით მოსიარულე კი უფრო მეტად დადგებოდა რისკის ქვეშ, რომ არ მომხდარიყო ავტოავარია, _ უფრო დეტალურად გვიხსნიან ადგილობრივები და ამბობენ, რომ თუ ვინმე გაბედავს აღნიშნული მშენებლობის გაგრძელებას, გზას გადაკეტავენ.
„გურია ნიუსი“ „გზამშენი-18“-ის დირექტორს, თემურ ჯახვას დაუკავშირდა.
ჯახვა ადასტურებს, რომ პროექტი არაპროფესიონალის შედგენილია და ამბობს, რომ მისი ძალისხმევით შეჩერდა.
_რამდენიმე საათის წინ, სწორედ ამ საკითხზე მქონდა საუბარი საპროექტო სამსახურთან. დიახ, ეს არის უცოდინარის, არაპროფესიონალის დაგეგმილი პროექტი.
_ადგილობრივი მცხოვრებლები გვეუბნებიან, რომ მათ ასეთი წინადადებით არავისთვის მიუმართავთ და უცხო პირები მხოლოდ სამუშაოების დაწყებისას ნახეს. ეს მართალია?
_დიახ, თბილისში ჩატარებული აუქციონის მიხედვით, ვიღაცამ მოიგო ტენდერი. პროექტის გახორციელება ჩინელებმა დაიწყეს, თუმცა, ეს მართლაც სიმახინჯე კეთდებოდა და აქტიურად ჩავერიე, რომ შეჩერებულიყო. ადგილობრივი მცხოვრებლები სიმართლე ამბობენ. ეს არის 65 მილიონიანი პროექტის ნაწილი, მსოფლიო ბაკის მიერ ფინანსდება, რეგიონული განვითარების მიმართულებაა.
_ რა ეშველება საუკეთესო მაგისტრალის გასწვრივ გადათხრილ სივრცეს, სადაც ადვილია, ავარიაც მოხდეს, ღამით მიმავალმა ადამიანი კი დაშავდეს?
_აუცილებლად უნდა შეიცვალოს პროექტი. სხვანაირად არ დავუშვებთ. ვიმეორებ, ის, რაც კეთდებოდა, იყო სიმახინჯე.
„გურია ნიუსის“ კითხვაზე, მალე დაიწყება თუ არა დაზიანებული და გადათხრილი მაგისტრალის მარჯვენა მხარის მოწესრიგება, თემურ ჯახვამ გვიპასუხა, რომ ეცდება, ეს ყველაფერი მალე მოგვარდეს.
ჩვენ თვალს მივადევნებთ ამ პროცესსს, რადგან სერიოზულად არის დაზიანებული გზის მარჯვენა ნაწილის სიგრძივი ზოლი, რაც საფრთხეს უქმნის ისედაც დატვირთული რეჟიმის მქონე მაგისტრალს.
[sexy_author_bio]
