წარმოუდგენელი ტრაგედია დატრიალდა ლანჩხუთში. ორი დღის წინ კოვიდ ინფექციის შედეგად გარდაცვლილი ექიმის ნანა ცინცაძის ვაჟი თორნიკე ორაგველიძე, რომელიც სასჯელს იხდიდა #2 პენიტენციურ დაწესებულებაში დღეს, დედის დასაფლავების დღეს გარდაიცვალა. თორნიკეს გარდაცვალების ფაქტს ოჯახის ახლობლებიც ადასტურებენ, თუმცა, ამ ეტაპისთვის ვერ აკონკრეტებენ როგორ და რა გარემოებებში გარდაიცვალა ახალგაზრდა.
“გურია ნიუსი” ინფორმაციის მისაღებად პენიტენციური დაწესებულების პრესსამსახურს დაუკავშირდა. უწყების ინფორმაციით, თორნიკე ორაგველიძე თანასაკნელებმა უგონო მდგომარეობაში იპოვეს.
“N2 დაწესებულების ბრალდებული თ.ო. (დაბ: 1993 წ.) საქართველოს ს.ს.კ-ის 177-ე მუხლის მესამე ნაწილის “დ” ქვეპუნქტით (ქურდობა) გათვალისწინებული დანაშაულის ბრალდებით 2020 წლის 16 ნოემბერს მოთავსდა N8 დაწესებულების საკარანტინო სივრცეში. 2020 წლის 28 ნოემბერს იგი გადაყვანილი იქნა N2 პენიტენციურ დაწესებულებაში. 2021 წლის 31 მარტს, დაახლოებით, 15:57 საათზე მისი თანამესაკნეები საკნიდან გაყვანილ იქნენ იმავე სართულზე არსებულ აბანოში, ხოლო ბრალდებული თ.ო. დარჩა საკანში. აბანოდან საკანში დაბრუნებისას თანამესაკნეებმა თ.ო. საკნის საპირფარეშოში უგონო მდგომარეობაში აღმოაჩინეს. მას ყელის არეში აღენიშნებოდა, სავარაუდოდ, ბასრი საგნით მიყენებული ჭრილობა. პირველადი სამედიცინო დახმარების გაწევის მიზნით ბრალდებული ჩაყვანილ იქნა დაწესებულების სამედიცინო ნაწილში და გამოძახებულ იქნა სასწრაფო სამედიცინო დახმარების ბრიგადა, თუმცა მედპერსონალის მცდელობის მიუხედავად, თ.ო.-ს გადარჩენა ვერ მოხერხდა. მომხდარის შესახებ დადგენილი წესით დაუყოვნებლივ ეცნობა სახელმწიფო ინსპექტორის სამსახურს, რომელმაც დაიწყო გამოძიება.
აღსანიშნავია, რომ თანამესაკნეების გადმოცემით თ.ო.-მ 31 მარტს შუადღის საათებში პენიტენციური დაწესებულებიდან განახორციელა სატელეფონო ზარი, რა დროსაც შეატყობინეს დედის გარდაცვალების ფაქტი”, _ ნათქვამის უწყების მიერ მოწოდებულ ინფორმაციაში.
