ზაფხულის ცხელი სეზონის დადგომასთან ერთად ქალაქსა თუ ქვეყნის მიღმა დასასვენებლად გამგზავრება აქტუალური საკითხი ხდება.
სად ურჩევნია დასვენება საზღვაო კურორტსა თუ მთიან ადგილში ადამიანი დამოუკიდებლად წყვეტს, თუმცა, მოქალაქეების ნაწილი რჩევისთვის თუ სად დახარჯოს თვეების განმავლობაში ნაგროვები შვებულების გასატარებელი თანხა ტურისტულ სააგენტოებს მიმართავს.
„გურია ნიუსი“ დაინტერესდა, სად ირჩევენ საქართველოს მაცხოვრებლები დასვენებას, რის გასარკვევადაც რამდენიმე ტურისტულ კომპანიას დაუკავშირდა.
როგორც ტურისტულ კომპანიებთან საუბრის შედეგად გაირკვა, დასასვენებლად აქტუალური ადგილი, წელს, ისევ თურქეთია. თუმცა, დასვენების ღირებულება ამ მიმართულებით საკმაოდ გაიზარდა.
როგორც კომპანია „თრეველ ედვაიზერში“ ამბობენ, მოთხოვნა ევროპის მიმართულებითაც დიდია.
„Wizz Air-მა დაამატა ძალიან ბევრი მიმართულება. ერთ-ერთი მიმართულებაა ბარსელონა, რომელიც გასულ წელთან შედარებით ძალიან მოთხოვნადი გახდა. ასევე აქტუალურია ეგვიპტე და თურქეთი, მიუხედავად იმისა, რომ წელს ფასები რადიკალურად გაზრდილია შარშანდელთან შედარებით. რამ გამოიწვია ფასების ზრდა არ ვიცით, შესაძლოა კურსის ზრდამ, თუმცა დიდი სხვაობა გასული და მიმდინარე წლის ვალუტის კურსში არ არის. რეალური მიზეზი რა არის ვერ დაგისახელებთ, თუმცა მოთხოვნა ისევ ისეა თურქეთზე და ეგვიპტეზე“,_ ამბობენ „თრეველ ედვაიზერში“.
ტურისტული კომპანია „ლიდერ ჯგუფის“ გენერალური დირექტორის თქმით, მოქალაქეების დიდი ნაწილი დაბალბიუჯეტიან რეისებს ითხოვს, ცხელი სეზონის გატარებას კი საბერძნეთში და ბარსელონაში არჩევს.
„ხალხის რიგი დაბალ ბიუჯეტიან რეისებზე დგას. მოთხოვნადია ამ თვეების გატარება საბერძნეთში. პოპულარულია კრეტა, ასევე ბევრი მიდის ბარსელონაში. ბარსელონა მოთხოვნადი უფრო Wizz Air-ის შეთავაზების შემდეგ გახდა. სასტუმროები ბარსელონაში ძვირია, მაგრამ თუ ადრე გააკეთებენ ჯავშანს შესაძლებელია, რომ 300-400 ევროში ჩაეტიონ“, _ განმარტავენ „ლიდერ ჯგუფში“.
როგორც ტურისტულ კომპანია „გრანდ თრეველის“ დირექტორი, ელისაბედ კაპანაძე ამბობს, ზღვის სეზონის შესაბამისად მოქალაქეებიც თურქეთს, საბერძნეთს და იტალიას ირჩევენ.
ის, ასევე, აღნიშნავს, რომ გასულ წელთან შედარებით თურქეთის მიმართულებით წასვლის ღირებულება 30%-ით გაიზარდა, ფასის გამო კი ეგვიპტეში წასვლაზეც არ ამბობენ მოქალაქეები უარს სიცხის მიუხედავად.
„ზღვის სეზონია და ამიტომ მოთხოვნა არის თურქეთის მიმართულებით, საბერძნეთის და იტალიის მიმართულებებზე, კიდევ არის გარკვეული მიმართულებები, რომლითაც ინტერესდებიან, თუმცა ეს უკვე ბიუჯეტის საკითხია. თურქეთის მიმართულებით ფასები 30%-ით ძვირია, შარშანდელთან შედარებით. ეგვიპტე აქტუალური უფრო სექტემბრის ბოლოდან არის , რადგან ცხელი ადგილია, თუმცა, ფასის გამო სიცხეს აღარ აქცევენ ყურადღებას და ირჩევენ ამ მიმართულებასაც. ანტალიის რეგიონში აქამდე ლიდერობდა ბელეკის კურორტული ზონა, რადგან ამ რეგიონში არის ძალიან კარგი სასტუმროები, ქვიშიანი სანაპიროა და ბევრი დადებითი მხარე აქვს ამ რეგიონს, მაგრამ ყველაზე ძვირადღირებული რეგიონია. ქემერიც მთიანი რეგიონია და ცდილობენ აქაც წავიდნენ, მაგრამ ყველაზე დაბალბიუჯეტიან რეგიონს ითხოვენ და ამიტომ ალანიას ვურჩევთ“,_ ამბობს „გრანდ თრეველის“ დირექტორი.
როგორც ტურისტულ კომპანია „ფრი თრეველში“ ამბობენ, ეგვიპტე, დუბაი და თურქეთი წელსაც მოთხოვნადი მიმართულებებია.
„მოქალაქეების ნაწილი მთიან ადგილს, ნაწილი კი საზღვაო კურორტს ირჩევს დასასვენებლად. ადგილს სად გაემგზავრებიან მათი მოთხოვნის მიხედვით ვარჩევთ. ეგვიპტე, დუბაი, თურქეთი წელსაც ეს მიმართულებებია აქტუალური. თურქეთის მიმართულებით დასვენება წელს საგრძნობლად გაძვირებულია. ასევე აქტუალურია ევროპის ქვეყნები, გამოარჩევენ იტალიას და ბარსელონას“, _ამბობენ „ფრი თრეველში“.
