„ეს ქალი ევროპული საქართველოს თავმჯდომარეა ჩოხატაურში“, _ წერს ფეისბუქზე „ფედერალისტების“ ერთ-ერთი ლიდერი თამარ ჩერგოლეიშვილი და კადრს აქვეყნებს შეხვედრიდან, რომელიც „ძლიერი საქართველოს“ ლიდერმა მამუკა ხაზარაძემ ჩოხატაურში გამართა.
„სხვა პარტიებისგან თხოულობს სიმრავლეს, რომ მისივე ნაყიდ ტელევიზიაში აჩვენოს და სოცმედიაში დაბუსტოს“, _ წერს ჩერგოლეიშვილი.
„ფედერალისტების“ სახის ამ ბრალდებას კატეგორიულად უარყოფენ „ძლიერი საქართველოს“ ჩოხატაურელი ლიდერები.
მათთან საუბრით ირკვევა, რომ ქალბატონი, რომელზეც ჩერგოლეიშვილი საუბრობს არ არის „ევროპული საქართველოს“ თავმჯდომარე და არც არასდროს ყოფილა.
„ევროპულ საქართველოს ჩოხატაურში ლია ჩიგოგიძე ხელმძღვანელობდა, რომელიც არც ამ შეხვედრაზე ყოფილა და საერთოდაც, მასთან არანაირი კომუნიკაცია არც გვქონია. საკმაო ხანია, არც მინახავს. ეს ქალბატონი კი, რომელზეც ჩერგოლეიშვილი მიუთითებს, ნანა ჟღენტია, რომელთანაც წლების ნაცნობობა და ახლობლობა გვაკაშირებს“, _ ამბობს „ძლიერი საქართველოს“ ჩოხატაურის სახე მამუკა ცინცაძე.
„წესით იმ პარტიის (რომელსაც წლების განმავლობაში წარმოადგენდით) თავმჯდომარეებს კი უნდა იცნობდეთ სახეზე. ჯობდა გადაგემოწმებინათ ფაქტები და ისე დაგეწერათ“, _ მეტი სიზუსტიკენ მოუწოდებს ჩერგოლეიშვილს „ძლიერი საქართველოს“ წარმომადგენელი მალხაზ ჩხიკვაძე.
ჩხიკვაძის თქმით, ჩოხატაურში მათ ჰქონდათ შეხვედრა მოსახლეობასთან, მხარდამჭერებთან და დასწრება შეეძლო ნებისმიერ მსურველს, პარტიული კუთვნილების მიუხედავად.
_ ჩვენ ოპონენტებთან შეხვედრის პრობლემა არ გვაქვს. ნანა ჟღენტი, ვისი სურათიც აქვს გაზიარებული თამარ ჩერგოლეიშვილს, არ არის არათუ „ევროპული საქართველოს“ პარტიის თავმჯდომარე, არამედ წევრიც კი. ნანა არც ერთი პარტიის წევრი არ არის_ გვითხრა ჩხიკვაძემ.
„გურია ნიუსი“ კომენტარისთვის ნანა ჟღენტსაც დაუკავშირდა. ის ადასტურებს, რომ მართლაც იმყოფებოდა „ძლიერი საქართველოს“ ჩოხატაურის ოფისში გამართულ შეხვედრაზე და კითხვითაც მიმართა პარტიის ლიდერს. თუმცა, კატეგორიულად უარყოფს „ევროპული საქართველოს“ წევრობას.
„არც პარტიის წევრი და მითუმეტეს, თავმჯდომარე არ ვყოფილვარ, ერთი რიგითი, თავისუფალი მოქალაქე ვარ, რომელიც სამ შვილს ზრდის და აწუხებს საკუთარი ქვეყნის ბედი“, _ ამბობს ნანა ჟღენტი ჩვენთან საუბარში.
