“ციანიდის საქმის” მოსამართლის, ბესიკ ბუგიანიშვილის გამოკითხვა თბილისის პროკურატურაში დასრულდა.
ბუგიანიშვილის განცხადებით, დახურული სხდომის ოქმი არავისთვის გადაუცია.
გავიდა თუ არა დაცვის მხრიდან დახურული სასამართლო სხდომის ოქმების შესახებ ინფორმაცია, ამას გამოძიება დაადგენს, – ამის შესახებ თბილისის პროკურატურასთან ჟურნალისტებს ე.წ. ციანიდის საქმის მოსამართლე ბესიკ ბუგიანიშვილმა განუცხადა.
“არ გადამიცია სხდომის ოქმი არავისთვის, ეს გამოძიებამ უნდა გაარკვიოს. დახული სხდომის ოქმთან წვდომა ჰქონდა მოსამართლეს, სხდომის მდივანს, დაცვისა და ბრალდების მხარეს. მესამე პირისთვის გადაცემას მოახდენდა ან მოსამართლე, ან მდივანი, ან დაცვა, ან ბრალდების მხარე. მე დასამალი არაფერი მქონდა, მივეცი ჩვენება, რომ არაფერი გადამიცია. ვერაფერს ვიტყვი, გამოძიებამ უნდა თქვას. რა თქმა უნდა რაც მოხდა, ეს კანონდარღვევაა. დაცვის მხარემ განმარტა, არ ვაძლევთ ჩვენებას საკუთარი თავის წინაამღდეგ, დანარჩენი თავად განსაზღვრეთ რას ნიშნავს. ვერაფერს გეტყვით. მე ვარ მოსამართლე, პოლიტიკურ შეფასებებს ვერ გავაკეთებ. შესაბამისად, ამაზე პასუხს ვერ გაგცემთ“, – განაცხადა ბუგიანიშვილმა.
მოსამართლემ ასევე უპასუხა ჟურნალისტების კითხვას, რამდენად არის მოსალოდნელი, რომ ინფორმაცია ომბუდსმენის წარმომადგენელს გაეცა, რომელიც დახურულ სასამართლო სხდომებს ესწრებოდა.
ბუგიანიშვილის განმარტებით, ომბუდსმენს დახურული სასამართლო სხდომის ოქმებთან წვდომის უფლება არ აქვს.
„ომბუდსმენის წარმომადგენელი იმყოფებოდა დარბაზში, ის მე დავუშვი, თუმცა მას სხდომის ოქმთან შეხება არ ჰქონია, ვინაიდან კანონიდან გამომდინარე, სხდომის ოქმის მოთხოვნის და მიღების უფლება აქვს დაცვის და ბრალდების მხარეს. წერილი შემოვიდა, ჩემმა სხდომის მდივანმა გაამზადა დისკები და გადასცა დაცვის და ბრალდების მხარეებს. ომბუდსმენს უფლება არ აქვს დახურული სასამართლო სხდომის ოქმი მოსთხოვოს სასამართლოს და სასამართლომ მისცეს“, – განაცხადა ბუგიანიშვილმა.
ე.წ. ციანიდის საქმის მოსამართლემ ჟურნალისტებთან ისიც აღნიშნა, რომ საჭიროების შემთხვევაში ის კვლევ არის მზად გამოძიებასთან ითანამშრომლოს.
„თუ დამიბარებენ, გამოვცხადდები, ამის ვერანაირ პრობლემას ვერ ვხედავ“, – განაცხადა ბუგიანიშვილმა.
თავის მხრივ, ე.წ. ციანიდის საქმის სასამართლო სხდომის მდივანმა თამთა გაჩეჩილაძემ განაცხადა, რომ სხდომის ოქმები მხოლოდ დაცვის და ბრალდების მხარეებს გადასცა.
„გამომძიებლებს ჰქონდათ კითხვები უშუალოდ საქმესთან დაკავშირებით. კერძოდ, ეს ეხებოდა ჩემს უფლება-მოვალეობებს – რა შედის სხდომის მდივნის უფლება-მოვალეობებში. შესაბამისად, გავეცი პასუხი ყველა დასმულ შეკითხვაზე. მედიასშუალებებისთვის ნამდვილად არ გადამიცია სასამართლოს სხდომის ოქმი. სხდომის ოქმები გადავეცი და ამის ვალდებულებაც მაკისრია, დაცვის და ბრალდების მხარეს. მხოლოდ ამ ორი მხარისთვის მაქვს ოქმები გადაცემული“, – განაცხადა თამთა გაჩეჩილაძემ.
ბუგიანიშვილის თბილისის პროკურატურაში ე.წ. ციანიდის საქმის მასალების მედიაში გავრცელების ფაქტზე დაწყებული გამოძიების ფარგლებში გამოიკითხა.
