რუსული კანონის მხარდამჭერი დეპუტატი, ნინო წილოსანი შინაგან საქმეთა სამინისტროსა და პროკურატურას მიმართავს, გამოკითხვაზე დაიბარონ. დეპუტატი მოქალაქეს ადევნებაში ადანაშაულებს. წილოსანმა სოციალურ ქსელში ვიდეო გაავრცელა, სადაც ჩანს, რომ მანქანა ასიგნალებს, ამ დროს ის სახლთან, თამარაშვილის ქუჩაზე, ინტერვიუს აძლევდა სამთავრობო მედიებს.
ეს ხდება იმ ფონზე, როცა რუსული კანონის მოწინააღმდეგე არაერთ მოქალაქეს სამართალდამცავები ფიზიკურად გაუსწორდნენ, თუმცა უწყებების მიერ იდენტიფიცირებული არავინაა. გარდა ამისა, კონკრეტული პირები აქტივისტებს და პოლიტიკოსებს სახლებთან დახვდნენ და სცემეს, არც არ შემთხვევაში მიუციათ პასუხისგებაში ვინმე.
“ოცნების” დეპუტატმა დიტო სამხარაძემ აღიარა, რომ მედიების, არასამთავრობო ორგანიზაციების და პარტიების ოფისებზე შეურაცხმყოფელი წარწერების უკან მმართველი გუნდი დგას. შესაბამის უწყებებს გამოვლენილი არ ჰყავთ არც ის პირები, რომლებიც მოქალაქეებს ურეკავენ, აგინებენ და ემუქრებიან.
“ამ ვიდეოში, და დამატებით სახლის წინ არსებულ სათვალთვალო კამერებში კარგად ჩანს, როგორ მელოდებოდა, ვიდრე ინტერვიუს დავასრულებდი და ჩართული კამერების გარეშე დავრჩებოდი მარტო, რომ დაშინება და მუქარა განეხორციელებინა. ამის შემდეგ დემონსტრაციულად ისევ დაარტყა ერთი წრე და სწორედ ამ დროს მოხერხდა გადაღება. დანარჩენს სხვა ვიდეოკამერები აღბეჭდავდნენ”, – წერს წილოსანი.
იურისტი დავით კუპრავა მომხდარს თავადაც გამოეხმაურა და დაწერა, რომ დეპუტატს, რომელიც ჟურნალისტებთან იდგა დაუსიგნალა და დაუძახა, რომ მოღალატეა. მისი თქმით, არანაირ ადევნებას და ძალადობას ადგილი არ ჰქონია.
“ჩემს მეუღლეს მივაკითხე სამსახურში, მოვდიოდი სახლის მიმართულებით, სადაც ახლა ჩვენ ვდგავართ, ქალბატონი ნინო წილოსანი აძლევდა ინტერვიუს თავის პროპაგანდისტულ არხებს, მას შემდეგ რაც დავინახე, დავასიგნალე და დავუძახე, რომ არის მოღალატე, რაც სრულად ჯდება ჩემ გამოხატვის და სიტყვის თავისუფლების ფარგლებში, რაც გარანტირებულია კონსტიტუციით, ეს იყო ჩემი შეფასება, როგორც საკანონმდებლო ორგანოში მომუშავე პირის მიმართ, მისი საქმიანობის მიმართ და ეს არ არის მარტო ჩემი შეფასება, ასე ფიქრობ ამ ქვეყნის უმრავლესობა დარწმუნებული ვარ, რაც დასტურდება ყოველდღიური მასშტაბური აქციებით. სახლში მისულს დამხვდა ქალბატონი ნინოს პოსტი, რომ თურმე მე მას ავედევნე, მის მიმართ ვახორციელებდი მუქარას, ძალადობას და ასე შემდეგ, ჩემთვის გასაგებია, რომ ქალბატონ ნინოს საერთოდ არ ესმის მუხლი და არ იცის რას ნიშნავს ადევნება და მუქარა, თუმცა მინდა შევახსენო, რომ ადევნება და მუქარა არის ის რასაც უკეთებენ ახალგაზრდებს, გვიკეთებენ ჩვენ, ჩვენ გვიწევთ თავდაცვის საშუალებებით ვიმოძრაოთ, გადავაადგილეთ სახლიდან სამსახურში, სამსახურიდან სახლში, იმისთვის, რომ არ დაგვხვდნენ ვიღაც ტიტუშკები, არ გვცემონ”, – ამბობს კუპრავა.
დეპუტატმა დღეს თქვა, რომ 5 საათზე მივა შინაგან საქმეთა სამინისტროში, სადაც გამოკითხვაზეა დაბარებული და “კიდევ ერთხელ ვისაუბრებ იმ დაშინებაზე და მუქარაზე, იმ ადევნების ფაქტებზე, რომელიც კონკრეტულად ჩემ და ყველა სხვა დეპუტატის შემთხვევაში ძალიან თვალნათელია”.
წყარო: მთავარიტვ
