“თქვენს გვერდზე კი იწერება, რომ ნაბეღლავს, გუთურს და ბახმაროს გზაზე სოფლებს არ მიეწოდება ელექტროენერგია, მაგრამ წიფნარი, კოხნარი და სერი არ ეკუთვნის ჩოხატაურის მუნიციპალიტეტს, თუ რახდება?!” _ ამის შესახებ “გურია ნიუსს” ჩოხატაურის მუნიციპალიტეტის სოფელ კოხნარიდან მოწერეს.
“3 დღეა, არც ჩვენთან არაა ელექტროენერგია და რამე ინფორმაცია არ გაქვთ? არც სოფლის შიდა გზაა გაწმენდილი. მოკლედ, წიფნარი მოწყვეტილია ცივილიზაციას. ბატონი დავითი კი წერს, ჩოხატაური მომზადებული შეხვდა თოვლსო, მაგრამ ამას თუ მზად ყოფნა ჰქვია, რა ვიცი, რა გითხრათ”, _ გვეუბნება სოფელ კოხნარის ერთ-ერთი მცხოვრები და ფაქტის ამსახველ ფოტოსაც გვაწვდის.
“გურია ნიუსი” დაუკავშირდა ენერგოპრო ჯორჯიას პრესსამსახურს, სადაც გვითხრეს, რომ დაზიანებულია მაღალი სადენები.
“ჯგუფები მუშაობენ დილიდან. ელექტროენერგიის აღდგენა დაიწყება ეტაპობრივად. მაღალი ძაბვის სადენები დააზიანა თოვლმა. ყველა მიმართულებით ვმუშაობთ. როგორც კი მოწესრიგდება მთელი ნაგებობა ხაზობრივად, ელექტრო ენერგიის აღდგენაც ეტაპობრივად დაიწყება. ვვარაუდობთ, რომ დღის ბოლომდე ყველგან უნდა ჩავრთოთ. შიდა ქსელში თუ რამე შეფერხება იქნება, იქაც დაიწყება სამუშაოები. ვიმედოვნებთ, რომ შიდა ქსელში ავარიები არ იქნება”,_ გვითხრა ბექა რომანაძემ.
