ოზურგეთის მუნიციპალიტეტის სოფელ მერიაში, დიდი ხანია, მოსახლეობა გაზის და წყლის პრობლემებზე საუბრობს. აღნიშნულის შესახებ ჩვენ არაერთხელ ვწერდით.
მიუხედავად იმისა, რომ მერიის მუნიციპალიტეტის თემებში გაკეთდა ჭაბურღილები, ასევე გაზგაყვანილობის სამუშაოები დასრულდა და ყველა სახლთან მიყვანილია ხაზი, ჯერ დამონტაჟება არცერთ ოჯახში არ მომხდარა. ასევე ამ უდიდესი სოფლის მოსახლეობის უმეტესობა, ჭების ამარაა, რომლის დაშრობას ისინი მდინარე ნატანებზე კარიერების სოკოებივით გამრავლებას აბრალებენ:
_წყალს მიაქვს მერია, მდინარე ნატანებიდან რაც ქვიშას და ხრეშს ეზიდებიან, აყვავებული უნდა ვიყოთ. ჭების ამარა ვართ. ესეც, მაგ კარიერების გადამკიდე, მალე დაშრება. შიშით ვიყურებით შიგ. ერთ მეტრომდეც არ იქნება. სადღაც, ქვესკნელიდან ვეზიდებით კასრებით ,ავზებით, ვედროებით. მდინარის ნაპირზე ჩავდივართ. იქ აქვთ, ბატონო, კარიერის ხალხს გაკეთებული ჭაბურღილი. აქით წვიმას ვდარაჯობთ. ქვაბი, ტაშტი, ძველი „ვანა“… რა არ გვაქვს შედგმული „ოჭვათოში“, რომ წვეთი არ დავკარგოთ. ბოსტანს რომ მორწყავ, მაინც რამხელაა. გაზი სადაა? მრიცხველები აქამდე არ დაუდგამთ და ამ სიცხეში, აქით შეშას ვჭრით და იქით შეშის ღუმელზე ვაცხობთ პურს, _ გვეუბნებიან ადგილობრივი მცხოვრებლები, რომლებიც კიდევ უფრო დიდ გასაჭირად და საშიშროებად თვლიან ე.წ. „მერიის ბინების“ _საცხოვრებელი კორპუსის ბინადართა პრობლემას. აქ საკანალიზაციო სისტემა სასწრაფოდ მოსაგვარებელია. აღნიშნულ კორპუსი ოზურგეთის მუნიციპალიტეტის მერიის მიერ კაპიტალურად გაკეთდა, გადაიხურა და 90-მდე უბინაო ოჯახს ჭერქვეშ ცხოვრების საშუალება მიეცა. თუმცა, კორპუსის საკანალიზაციო სისტემა, რომელიც ერთ დიდი საკანალიზაციო ჭას უკავშირდება, საბოლოოდ მაინც ღია ცისქვეშ, პრიმიტიულად გაჭრილ არხშია მოქცეული. ღია ცისქვეშ, ღია არხით გამდინარე ფეკალური მასა, ბუზებითაა სავსე. ზაფხულში, განსაკუთრებით, ყოფნა გაუსაძლისია.
_ცოტა დაცხება თუ არა, აქ ვერ გაჩერდები, განსაკუთრებით პირველ სართულზე მცხოვრებნი, _გვეუბნებიან ადგილობრივი მცხოვრებლები თემურ ბოლქვაძე და ანა ჟორდანია, _ ხელისუფლება კ ი დაგვეხმარა. ყველაზე პირველად გაზი ჩვენთან შემოიყვანეს, მაგრამ საკანალიზაციო სისტემის მოგვარება დასაჩქარებელია. საშიშია, რაიმე დაავადება არ გაჩნდეს. ბუზებითაა სავსე იქაურობა, ეკალ-ბარდით და ტყით კი არის დაფარული არხის მხარეები, მაგრამ რას დაიცავს? _ ამბობენ ისინი.
__მე თვითონ ვცხოვრობ ამ სოფელში, ვიცნობ ამ პრობლემებს და მეც ასევე მაწუხებს. გაზი ყველა სახლთან მიყვანილია. ამ ზაფხუში დასრულდება მრიცხველების დადგმა. წყალს რაც შეეხება, მერიის თემის სოფელ ნაღობილევში, ორი ჭაბურღილი ამოქმედდა. გოგორეთის უბანშიც ასევე დაიდგა ჭაბურღილი, ოღონდ ჯერ დაქსელვის პროცესი არ დაწყებულა. ახლა კეთდება სოფელ მერიაში, კოსტავების უბანში. დაგეგმილია, რომ ყველა უბანში ან უბნების შეკრებით და მერე მათი ლოკაციის მიხედვით, მიეწოდოთ წყალი, ჭაბურღილის მეშვეობით. მერია დიდი სოფელია და უცებ არ კეთდება ყველაფერი. რაც შეეხება მერიის საცხოვრებელი კორპუსის საკანალიზაციო სისტემის პრობლემას, არაერთხელ გვქონდა საუბარი, რომ სათანადო პროექტის ფარგლებში ეს სისტემა სრულყოფილად მოწესრიგდეს. მალე ესეც მოგვარდება, – გვითხრა მუნიციპალიტეტის მერის წარმომადგენელმა მერიაში, ნუგზარ ხომერიკმა.
ვრცლად აღნიშნულ თემაზე სტატიას, „გურია ნიუსი“ მალე შემოგთავაზებთ.
