საგამოძიებო კომისია უკვე აღარ არსებობს, ექვსი თვე გავიდა და დასრულდა, ეს არ ხდება კომისიის ეგიდით, მაგრამ პარლამენტის ეგიდით, პარლამენტში კომისიის დასკვნის საფუძველზე მუშაობს იურისტთა ჯგუფი, რომელიც ამზადებს შესაბამის დოკუმენტს სასამართლოში წარსადგენად, – განაცხადა პარლამენტის ვიცე-სპიკერმა, თეა წულუკიანმა საქართველოს პირველი არხის გადაცემაში „აქტუალური თემა – მაკა ცინცაძესთან ერთად“ სტუმრობისას.
„ეს დოკუმენტი ფაქტებზე დაფუძნებული იქნება, მაგრამ რაც მთავარია, ამ დასკვნას დაეფუძნება, რომ ეს პროცესი ახლა, რა მომენტშიც ჩვენ ვსაუბრობთ და პოლიტიკური პარტიები ერთმანეთს ებრძვიან არჩევნებში შედეგის დასადებად, ამ პროცესების პარალელურად მზადდება. როდესაც უკვე ეს მომზადდება, მაშინ დაიწყება სასამართლო პროცედურებიც. ამას თავისი ვადა აქვს, სავარაუდოდ, რამდენიმეთვიანი და მიზანი ვერ იქნება მხოლოდ „ნაციონალური მოძრაობის“, როგორც პოლიტიკური გაერთიანების აკრძალვა, ვინაიდან ეს არაფრის მომტანი არ იქნება, მხოლოდ ეს ერთი. ეს მინიმუმია. ჩვენ ვიცით, რომ ძალიან ბევრი ადამიანი სხვა პარტიაში გადავიდა, ან თავისი პარტია ჩამოაყალიბა და რა თქმა უნდა, მათაც შეეხებათ, ჩვენი სასამართლო პროცედურები მათაც მოიაზრებს და ყველა იმ ადამიანს, ვინც ამ დასკვნაში ფიგურირებს. თქვენ თუ მკითხავთ, ვინ ფიგურირებს ამ დასკვნაში, აქ ფიგურირებს, რა თქმა უნდა, მთავარი მიხეილ სააკაშვილი. იმიტომ, რომ ეს დასკვნა კარგად აჩვენებს ამას, რომ ის იყო და არის თავი და თავი ყველა იმ უბედურების, რაც ჩვენს ქვეყანას და მოქალაქეებს თავს დაატყდა. ასევე მისი ფიგურანტები, იქნებოდა ეს „ნაციონალური მოძრაობის“ წიაღიდან წამოსული მინისტრი, დეპუტატი, თუ ვთქვათ, თუნდაც „თიბისი ბანკის“ მესვეური, რომელიც, როგორც ბიზნესის რეკეტის კონკრეტული თავი ფაქტებით აჩვენებს ამ დასკვნაში, სპეციალური სქემები არსებობდა ბიზნესის, საკუთრების ხელყოფის და ერთ-ერთი მთავარი სქემა იყო ხაზარაძესთან და ჯაფარიძესთან დაკავშირებული. ჩემი ნათქვამი რომ შევაჯამო, ეს არ იქნება მხოლოდ „ნაციონალური მოძრაობა“, როგორც პარტია, ეს იქნება სხვა პარტიები, ან პირები, ვინც იმ დროს მონაწილეობდა რეჟიმის საქმიანობაში და კანონდარღვევებში, რომელიც უკვე 2012 წლიდან დღემდე აგრძელებს ქვეყნის დაზიანებას, ეს დასკვნაში კარგად არის ნაჩვენები, რომ მათი მიზანი არ შეცვლილა. მათი მიზანი არის საკუთარი კონკრეტული გეგმების განხორციელება და არა ქვეყნის განვითარება, მისი მშვიდობა და მომავალი. ეს არ არის მათი მიზანი. მათ აქვთ კონკრეტული გეგმები, რომელიც ქვეყნისთვის საზიანოა”, – განაცხადა წულუკიანმა.
ვრცლად: 1tv.ge
