ოზურგეთში, ეროვნული გმირის, ზაზა დამენიას ქუჩაზე მცხოვრებთა პროტესტი, რომელიც ძირითადად მრავალწლიან მოთხოვნას ეხება, ასფალტის დაგებისა და სანიაღვრე არხების გაყვანის თაობაზე, სხვა თემებსაც მოიცავს.
კერძოდ, აქ წაქცევის პირასაა ელექტროსადენების ხის ბოძები. მოსახლეობას მხოლოდ ჭის წყალი აქვს. კითხვებს სვამენ ასევე დაპირებული წყალკანალიზაციის სისტემის გაკეთების თაობაზე.
_ზაზა დამენიას ქუჩის ეს მონაკვეთი, 200 მეტრი სიგრძის თუ იქნება. არ გვეღირსა ამის მოწესრიგება. წვიმაში წყალში ვიხრჩობით, სიცხეში _ მტვერში. როცა წვიმს, ნიაღვარი პირდაპირ სახლებში შემოდის და პირველი სართული წყლით ივსება. სიცხეა და აგერ, დადექით, გაივლის მანქანა და მტვერი მარტო ქუჩაში რომ შემოგაყაროს, ვინ დარდობს. ყოველ ორ საათში, ყველა სახლში, მაგიდაზე მტვერი ისეთი სისქით იდება, ცემენტის ქარხანასთან ცხოვრობ, გეგონება. მცენარეს ნაყოფი გაუფუჭებელი აღარ შერჩა. არ გვითხრათ, ახლა, ეს ფაროსანას ბრალიაო, _ გვეუბნებიან ამ ქუჩის მცხოვრებლები ალექსანდრე კოსტავა, ნატო ჯულაყიძე, ნანული ვასაძე, ციური წერეთელი და სხვები.
_75 წლის ვარ და რაც მახსოვს, აქ სულ ასეთი ამბვია. ადრე შაუმიანის ქუჩა ჰქვიოდა. სულ ა მეტი არაფერი. იქეთ დენის ბოძი იქცვა. დავაკაკუნებ ახლა ქვას, შეხედეთ, ფუღურო რომ არის შიგ, მიხვდებით. თავში უნდა დაგვეცეს ხომ, მანდამაინც… – ამბობს დამენიას ქუჩის მცხოვრები, ალექსანდრე კოსტავა.
კითხვაზე, თუ მიმართეს ოზურგეთის მუნიციპალიტეტის მერიას ან საკრებულოს დეპუტატს, ლელა საჯაიას, აქ მცხოვრებლები ვერ აკონკრეტებენ, ბოლოს როდის მიიტანეს განცხადება მერიაში.
_შარშან წინ კი მივიტანეთ. მარტში ფეისბუკზე გამოვაქვეყნეთ ფოტოები. დავიღალეთ… დეპუტატმა კი იცის, – გვითხრეს მათ.
„გურია ნიუსი“ ოზურგეთის მუნიციპალიტეტის საკრებულოს წევრს, ლელა საჯაიას დაუკავშირდა.
_ვიცი საშინელი მდგომარეობაა.. მეტი რა პატივი უნდა ვცეთ ეროვნულ გმირს, თუ არა ამ ქუჩის გაკეთება? თაიგულებით როცა იქნებიან მის საფლავზე ხელისუფლების წარმომადგენლები, მაშინ შევახსენებ. მე მქონდა კომუნიკაცია მერთანაც ამის თაობაზე, თუმცა არსადაა ასახული, _ გვითხრა საჯაიამ.
კითხვაზე, როგორ აპირებენ სამომავლოდ გადაწყვიტონ ამ ქუჩის მცხოვრებთა პრობლემა, ქალბატონმა ლელამ თქვა, რომ 2021 წლის ბიუჯეტში აუცილებლად აისახება ამ ქუჩის საკითხი.
_ყველაზე მთავარი ახლა არის ის, რომ გაკეთდეს ამ ქუჩის პროექტი. მერიის მხრიდან არის მზაობა ამის თაობაზე.
_აბა, წეღან რომ რატომ თქვით, მერთან მქონდა კომუნიკაცია და არსად ასახულაო?
_მე მეუბნებოდნენ, შემოსულონების შემდეგ გავაკეთებთო, რაკი ქუჩის ეს მონკვეთი დიდი არ არისო. დარწუნებით შემიძლია ვთქვა, რომ 2021 წლის ბიუჯეტში, რომლის პროექტზეც ახლა უკვე ვმუშაობთ, ამ საკითხზე მხარს დამიჭერენ. წელს კი როგორმე მოვახდენთ, შედგეს პროექტი, _ დაგვპირდა საჯაია.
ვრცლად დამენიას ქუჩის პრობლემების შესახებ, უახლოეს საგაზეთო სტატიაში გაეცნობით.
