25 ივნისს, ოზურგეთის მუნიციპალიტეტის საკრებულოს მორიგი სხდომა შედგა, რომელსაც ოპოზიციური პარტიების წარმომადგენელი საკრებულოს წევრებიც დაესწრნენ.
საკრებულოს თავმჯდომარემ, დავით დარჩიამ საკრებულოს სხდომაზე დღის წესრიგით გათვალისწინებული შვიდი საკითხი წარმოადგინა, რომელთაგან ხუთი განკარგულება და ორი დადგენილება იყო.
პირველი საკითხის ირგვლივ _ “საქართველოს რეგიონებში გასახორციელებელი პროექტების ფონდიდან, ოზურგეთის მუნიციპალიტეტში გასახორციელებელი ინფრასტრუქტურული პროექტების მოწონების თაობაზე” განკარგულება, ისაუბრა ინფრასტრუქტურული სამსახურის უფროსმა გოჩა აბაშმაძემ.
მან თქვა, რომ ოზურგეთის მუნიციპალიტეტის საკრებულოს სივრცით-ტერიტორიული დაგეგმარებისა და ინფრასტრუქტურის კომისიამ განიხილა, საქართველოს რეგიონებში გასახორციელებელი პროექტების ფონდიდან, ოზურგეთის მუნიციპალიტეტის ტერიტორიაზე გასახორციელებელი და დასაფინანსებელი ინფრასტრუქტურული პროექტის მოწონების საკითხი.
_ სოფელ ლიხაურისა და ჭანიეთის დამაკავშირებელი გზის რეაბილიტაცია, რომლის სიგრძე 2 464 მეტრია, ამ წელს მოხდება. ობიექტს მილიონ 609.226 ლარი მოხმარდება, _ თქვა გოჩა აბაშმაძემ.
აღსანიშნავია, რომ ამ სოფლებს შორის მდებარე გზა, გარდა ურთიერთდაკავშირებისა, სასაფლაოზე მიმავალი გზის კვეთაზეა და იქამდე მისასვლელად ერთადერთ საშუალებას წარმოადგენს. აქ არა მხოლოდ ჭანიეთის მცხოვრებლები, არამედ ქალაქისა და ნებისმიერი სხვა სოფლის მცხოვრებლები გადაადგილდებიან. ამ გზით შესაძლებელია, როგორც ლიხაურიდან ჭანიეთში, შემდეგ მაკვანეთში და დანარჩენ სოფლებში უპრობლემოდ გადაადგილება, თვით ოზურგეთი-ბათუმის ტრასამდე.
ადგილობრივები ამ გზას, შინაურულად სტრატეგიულსაც უწოდებენ და დიდი ხანია, ითხოვდნენ მის რეაბილიტაციას. რადგან გზა სერიოზულად იყო დაზიანებული, თან შიდა გზად მოიაზრებოდა, რამდენჯერმე გადაიდო მისი გაკეთება. ამჯერად კი ამ უკიდურესად დაზიანებული გზის რეაბილიტაცია მოხდება.
საკრებულოს სხდომის დასრულების შემდეგ, მუნიციპალიტეტის მერის წარმომადგენელმა სოფელ ჭანიეთში, ზაზა სალუქვაძემ აღნიშნა “გურია ნიუსთან”, რომ დიდი ხანია, ამ გზის გაკეთებას სულმოუთქმელად ელიან სოფელში:
_ ყველაზე ძალიან კი იმიტომ, რომ სასაფლაო მთის ბორცვზეა და ძირითადად ამ გზიდან ხდება იქ ასვლა. ხალხი სულ ითხოვდა გაკეთებას. არ ვიცი, ასე რა უნდა გამხარებოდა, _ გვითხრა სალუქვაძემ.
საკრებულოს სხდომაზე ერთხმად მიიღეს განკარგულება ამ გზის რეაბილიტაციის შესახებ.
ოზურგეთის მუნიციპალიტეტის საკუთრებაში მყოფი, კოსტავას ქუჩის პირველ ნომერში, პირველ სართულზე არსებული 33,64 კვ.მ. ფართის სარგებლობის უფლებით გადაცემაზე, ოზურგეთის მუნიციპალიტეტის მერიისთვის თანხმობის მისაცემად, განკარგულების ირგვლივ ეკონომიკის სამსახურის უფროსმა ხათუნა სურგულაძემ ისაუბრა.
მან, ასევე, ისაუბრა კიდევ ორ საკითხზე, რომელის ეხებოდა ოზურგეთის მუნიციპალიტეტის საკუთრებაში არსებული მოძრავი ქონების სარგებლობის უფლებით გადაცემაზე, ოზურგეთის მუნიციპალიტეტის მერისთვის თანხმობის მიცემის შესახებ.
პირველი, ეს არის ოზურგეთის მუნიციპალიტეტის საკუთრებაში არსებული სამგზავრო მიკროავტობუსი ა(ა)იპ საქველმოქმედო ასოციაცია გურიასთვის უსასყიდლოდ, პირდაპირი განკარგვის წესით, ორი წლის ვადით, სარგებლობის უფლებით, თხოვების ფორმით, გადაცემისთვის, ოზურგეთის მუნიციპალიტეტის მერს მიეცეს თანხმობა.
მეორე კი, ასევე მუნიციპალიტეტის საკუთრებაში არსებული, ერთი ერთეული ნაგავშემკრები ავტოსატრანსპორტო საშუალების, ქობულეთის მუნიციპალიტეტისთვის უსასყიდლოდ, პირდაპირი განკარგვის წესით გადაცემაზე, 2026 წლის 20 სექტემბრამდე, სარგებლობის უფლებით _ თხოვების ფორმით, გადაცემისთვის ოზურგეთის მუნიციპალიტეტის მერს, განკარგულებით მისცეს თანხმობა.
_ განკარგულებების პროექტები იყო წარმოდგენილი, რაზეც მერს თანხმობა უნდა მისცემოდა. ეს არის საქართველოს პარლამენტის წევრის, ვასილ ჩიგოგიძისთვის შენობაში ფართობის გამოყოფა, თავისი უფლებამოსილების ვადაში. ასევე ქობულეთის მუნიციპალიტეტისთვის ნაგავშემკრები ავტომანქანის დროებით სარგებლობაში გადაცემასთან დაკავშირებით. საკითხები მერიიდან ეკონომიკის სამსახურში იყო წარმოდგენილი და უნდა მისცემოდა თანხმობა, _ თქვა ხათუნა სურგულაძემ.
საკრებულოს სხდომაზე, ასევე, ერთ მნიშვნელოვან საკითხს უყარეს კენჭი _ ეს არის გენდერული საბჭოს გაუქმება და მის ნაცვლად ქალთა და ბავშვთა საკითხებზე მომუშავე საბჭოს შექმნა. უფრო სწორად, საკრებულოს დეპუტატებმა გენდერული საბჭოს სახელის შეცვლას დაუჭირეს მხარი, რომელსაც საკრებულოს წევრი ნინო ჭანიშვილი ხელმძღვანელობდა.
_ გენდერული თანასწორობის კანონში ცვლილების შესაბამისად, მუნიციპალიტეტებში უქმდება გენდერული საბჭოები და ქალთა და ბავშვთა საკითხებზე მომუშავე მუნიციპალური საბჭოები იქმნება. შესაბამისად , აქ ეს საბჭო დღეს შეიქმნა, რომელსაც მე ვუხელმძღვანელებ. საბჭო მრავალფუნქციურად იმუშავებს. ეს იქნება ბავშვთა, ქალთა და მამაკაცთა თანასწორობის საკითხები. უფრო სწორად, ეს იქნება პრველი საკითხი, რასაც ახლა ვგეგმავთ, _ თქვა ნინო ჭანიშვილმა.
საკრებულოს სხდომაზე, რომელსაც საკრებულოს თავმჯდომარე დავით დარჩია უძღვებოდა, დღის წესრიგით გათვალისწინებული შვიდივე საკითხი განიხილეს. .
საკრებულოს გადაწყვეტილებით, დამტკიცდა განკარგულება რეგიონებში გასახორციელებელი პროექტების ფონდიდან ოზურგეთის მუნიციპალიტეტში დაგეგმილი ინფრასტრუქტურული პროექტის შესახებ, რომელიც სოფელი ჭანიეთისა და სოფელი ლიხაურის დამაკავშირებელი გზის რეაბილიტაციას გულისხმობს.
საკრებულოს წევრებმა მხარი დაუჭირეს ქალთა და ბავშვთა საკითხებზე მომუშავე მუნიციპალური საბჭოს შექმნასა და შემადგენლობის დამტკიცებას.
ასევე, საკრებულოს სხდომაზე უმრავლესობით დამტკიცდა ოზურგეთის მუნიციპალიტეტის საკრებულოს რეგლამენტის ცვლილებების პროექტი.
ავტორი
