სოციალურად დაუცველ და შეჭირვებულ ოჯახებისთვის სურსათის შეძენის აქციაში ლანჩხუთში არაერთი სამსახური ჩაერთო. როგორც ირკვევა, ამჯერად მსგავსი ინიციატივით ლანჩხუთის სკოლამდელი სააღმზრდელო ცენტრი გამოდის და საქველმოქმედო აქციაში ჩაბმას გეგმავს. თუმცა, „ევროპული საქართველოს“ ადგილობრივი ორგანიზაციის თავმჯდომარე და საკრებულოს წევრი, ირაკლი მარშანიშვილი ამბობს, აღნიშნულ აქციაში ჩაბმა ბაღის ზოგიერთ ტანამშრომელს საკუთარი ნების საწინააღმდეგოდ, იძულების წესით უწევს.
„ქველმოქმედება ნებაყოფილობითი ხომ არის?! ხოდა ნებაყოფილობითი თუა, მაშინ რატომ ავალებენ ლანჩხუთში ბაღის თანამშრომლებს მაისის თვის ხელფასზე 10 ლარის დადებას? იმიტომ ხომ არა, თანამშრომლების ხარჯზე პროდუქტებით ხელში ფოტოები გადაიღონ და თავი გაიპიარონ? თუ ვინმეს დახმარება გინდათ, თქვენი ჯიბიდან დაეხმარეთ ხალხს და არა ისევ გაჭივრებული თანამშრომლების ხარჯზე!!
ვერავინ დამაჯერებს იმას, რომ ყველა დალხელინი თანამშრომელია და ყველას აქვს დახმარების საშუალება, ისედაც მცირე ხელფასებია დღეს ბაღებში! იმედია არავის შეექმნება პრობლემა იმის გამო რომ ეს ინფორმაცია გავიგე!“-ამბობს ირაკლი მარშანიშვილი.
მარშანიშვილის მხრიდან გაჟღერებულ ბრალდებას ბაღების გაერთიანების ხელმძღვანელი ნატა კობალავა პასუხობს და ამბობს, რომ ქველმოქმედებაში მონაწილეობის მიღების ინიციატივა მისგან წამოვიდა და თანამშრომლებს შესთავაზა, შესაძლებლობის ფარგლებში, მიეღოთ აქციაში მონაწილეობა.
„პირველ რიგში, მინდა გითხრათ, რომ ეს ინიციატივა პირადად ჩემგან მოდიოდა, ისევე როგორც უამრავი სხვა მსგავსი შინაარსის მქონე ინიციატივები. მაგალითისთვის, ჩვენმა გაერთიანებმა და მასში შემავალმა 21-მა ბაღმა არაერთხელ გაუწია დახმარება უამრავ ადამიანს, რომლებიც მძიმე დაავადებებს ებრძოდნენ. უბრალოდ, აქ არ დავიწყებ ყველა შემთხვევის დაწვრილებით განხილვას. ვფიქრობ, თუ ჩემი სიტყვების უტყუარობაში ეჭვი შეგეპარებათ, იგივე თქვენი წყაროდანაც გაიგებთ რომ მართალს ვამბობ. ასე რომ ეს ჩვენი გაერთიანების მიერ არ არის პირველი შემთხვევა, განსაცდელში მყოფ და მატერიალურად შეჭირვებულ ადამიანებს დავხმარებოდით. ასევე მინდა დამატებით განვმარტო, რომ ძალდატანებით არასოდეს მომხდარა თანხის გამორთმევა არცერთი ჩვენი თანამშრომლისგან.
და კიდევ, თუკი დავინახავ, რომ ვინმეს დახმარბა ჭირდება, მე აუცილებლად ისევ ვიქნები ინიციატორი მსგავს სიტუაციაში. სიკეთე გადამდებია და ვთვლი რომ ამაზე საუბარი ნამდვილად უხერხულია. უბრალოდ თქვენ უნდა გცოდნოდათ ჩვენი გაერთიანების პოზიცია. რაც შეეხება ფოტოებს და პიარს, ვთვლი რომ ყველა ჩემს თანამშრომელს ვინც საშუალებას და კეთილ ნებას გამოიჩენს ერთ სამადლობელ სიტყვას მაინც დავუწერ, რათა სხვებმაც მოგვბაძონ სიკეთის კეთებაში, არაძალდატანებით რათქმაუნდა, ისევე როგორც აქამდე ვაკეთებდით.
მე, უბრალოდ, ყველას მივაწოდე ინფორმაცია, ვინც როგორ შეძლებს ისე მიიღებს მონაწილეობას ამ აქციაში. ეს ჩუმად და დაფარულად არც მომინდომებია რომ გამეკეთებინა“, _ განმართავს კობალავა.
