ქალაქ ოზურგეთის ცენტრალურ ნაწილში მდებარე რესტორან “იზაბელას” შენობის კედელს, მარჯვენა მხრიდან კიბე ჩაუყვება. რესტორნის მდებარეობა და მასზე მიშენებული კიბეები, ერთ დროს, ალბათ, საჭიროებისთვის იყო განკუთვნილი, დღეს კი საპირფარეშოდ არის ქცეული და დღითა თუ ღამით კედლებს აშარდავენ, მაგრამ ფეხით მოსიარულეები მაინც იმოკლებენ მანძილს პეტრიწის ქუჩიდან გურიის ქუჩის მიმართულებით და კიბეზე ჩამავალნი, ხშირად თავს ადგებიან ხოლმე მამაკაცებს, რომლებიც ფიზიოლოგიურ მოთხოვნილებებს იქვე იკმაყოფილებენ.
აქ მოსიარულე მოქალაქეთა აღშფოთება, დიდი ხანია, საზღვარს სცდება.
“რას ჰგავს აქაურობა? კიბეზე ჩავდივარ და ორმეტრიანი კაცები, დღის ორ საათზე, დაყუდებულან და კედლებს აშარდავენ. შემრცხვა, როცა კიბეზე ჩასვლისას შარვალჩახდილ კაცს თავს წავადექი. რომელი საუკუნეა? საღორეა? იქვე არის უნივერმაღი, სტომატოლოგიური კაბინეტები და სხვადასხვა სავაჭრო ობიექტი. მოძრაობს უამრავი ადამიანი. კიბის ორი სართულის უჯრედები კი ტუალეტად არის ქცეული. ამაზე მეტი სიბინძურე და სირცხვილი რაა? სადმე, განაპირა ადგილი მაინც იყოს, რომ ყოველ წუთს სტუმარი თუ მასპინძელი აქ არ მოძრაობდეს. სახლშიც ასე იქცევიან, ვითომ? რამდენი ხანია, ეს სიბინძურე და უსაზღვრო თავხედობა გრძელდება”, _ გვეუბნება აღშფოთებული ქალბატონი და პრობლემის მოგვარებაში დახმარებას გვთხოვს.
რესტორანი “იზაბელა” გადაჰყურებს შადრევნებიან მოედანს, რომელიც არც ისე დიდ ხანია, კეთილმოეწყო. იქვეა განიერი საზოგადოებრივი სამოძრაო კიბე, საიდანაც ადამიანებს შეუძლიათ, დაუბრკოლებლად იმოძრაონ.
_ და მაინც, სხვა გზა თუ არ არის, რესტორნის კედელზე მიშენებული კიბე, რომელსაც მანძილის შესამოკლებლად იყენებენ ან უნდა გაუქმდეს, ან ისე უნდა მოწესრიგდეს, რომ ეს უმსგავსობა აღიკვეთოს, _ ამბობენ ახლომახლო მომუშავე მოქალაქეები.
რესტორან “იზაბელას” კარისკაცმა, რომელმაც ვინაობის დასახელებისგან თავი შეიკავა, ასეთი კომენტარი გააკეთა “გურია ნიუსთან”:
_ ყველაფერი ვიცით. აქ აუტანელი მდგომარეობაა. ამ წუთში დირექტორი ადგილზე არ არის, თუმცა, ისიც მეტს რას გეტყვით? ჩვენი თანამშრომლები თითქმის ყოველ დილით რეცხავენ ამ კიბეებს, მაგრამ საშველი არ არის. ამ საქმეს უნდა მიხედოს პოლიციამ, დასუფთავების სამსახურმა, მერიამ. ზრდასრულმა ადამიანმა არ უნდა იცოდეს, რომ ქალაქის ცენტრში, ყველაზე ხალხმრავალ ადგილზე არ მოისაქმოს? აქ ძალიან ბევრი საზოგადოებრივი ობიექტია. უამრავი ადამიანი მუშაობს და მოძრაობს დღის განმავლობაში. ზედამხედველობამ უნდა მიხედოს ამ საქმეს, _ გვითხრა მან.
ქალაქ ოზურგეთის ზედამხედველობის სამსახურის განყოფილების უფროსი შუქრი გაბრიჩიძე ამბობს, რომ ამ პრობლემის შესახებ იციან აღნიშნულ სამსახურში და მითითებაც არაერთხელ მისცეს.
_ რესტორანი “იზაბელა” კერძო საკუთრებაა. ასევე, კერძო საკუთრებაა შენობის პირველი სართულიც. ამ შენობის კედლის ნაწილია ეს კიბეები, რომელიც ამდენი ხანია ტუალეტად აქციეს უთავმოყვარეო და უკულტურო ადამიანებმა. ახლა ისღა დაგვრჩენია, რომ რესტორნის ხელმძღვანელს, შენობის ყველა მესაკუთრეს, მივმართოთ საგანგებო წერილით, დახურონ ეს კიბეები, ან როგორც კერძო საკუთრებას, მიხედონ და ქალაქის ცენტრში არ სუფევდეს ანტისანიტარია.
რა დრო უნდა მოიგოს ამ კიბეებით პეტრიწის ქუჩიდან გადმოსულმა ადამიანმა? იქვე, ახლოს არის შესანიშნავი საზოგადოებრივი კიბეები, რომელსაც არ აკლია სიგანე და საფეხურები. ყველას შეუძლია, იქედან იმოძრაოს ქალაქის ზედა ნაწილიდან ქვედაში გადასასვლელად. სხვა გამოსავალი, ვატყობ, არ არის, _ გვითხრა გაბრიჩიძემ.
