ამ წუთებში ქალაქ ოზურგეთის საკრებულოს სხდომა დაიწყო, სადაც თვითმმართველი ერთეულების გაერთიანების საკითხს განიხილავენ.
საქმე ეხება საქართველოს რეგიონული განვითარებისა და ინფრასტრუქტურის სამინისტროს ინიციატივას, რომლის მიხედვითაც, მუნიციპალიტეტების ტერიტორიული ოპტიმიზაციის შედეგად ჩამოყალიბდება ერთი თვითმმართველი ერთეული, შერწყმულ მუნიციპალიტეტს კი ახლა არსებული ორივე მუნიციპალიტეტის ბიუჯეტი სრულად დარჩება. გარდა ამისა, ამავე სტრატეგიის თანახმად, გამგებლის თანამდებობა შესაძლოა გაუქმდეს და ყველა მუნიციპალიტეტს არჩეული მერი ეყოლება. საკრებულოებს კი, დემოკრატიული კონტროლისთვის ბერკეტები მიეცემათ.
აღნიშნული თვითმმართველობების დეცენტრალიზაციის საშუალოვადიან სტრატეგიაში გაიწერება, რომელიც წლის ბოლომდე უნდა შემუშავდეს.
თუმცა, სამინისტროს ამ პოზიციას არ იზიარებს ქალაქ ოზურგეთის საკრებულოს თავმჯდომარის მოვალეობისშემსრულებელი ნინო გოგუაძე. როგორც გოგუაძე „გურია ნიუსთან“ საუბრისას აცხადებდა, ის თვითმმართველი ერთეულების გაერთიანების წინააღმდეგია.
„ყველა ვარიანტში, ამის წინააღმდეგი ვარ. ამის მთავარი არგუმენტიც შემიძლია მოგიყვანოთ – მეტი მუნიციპალიტეტი, მეტი ტერიტორიული დაყოფა ნიშნავს მეტ თვითმმართველობას, ეს არის ამოსავალი წერტილი. მეტი თვითმმართველობა და მეტი ჩართულობა კი ქვეყნის განვითარების უფრო მაღალ ხარისხს ნიშნავს. აქედან გამომდინარე, რა თქმა უნდა, ამგვარი რეფორმის წინააღმდეგი ვიქნები.
ქალაქ ოზურგეთს სპეციფიკური საკრებულო აქვს, აქ არცერთ პარტიას არ ჰყავს უმრავლესობა, მათ შორის არც მმართველ პარტიას. ამიტომ საკრებულოს ყველა წევრი გადაწყვეტილებას საკუთარი შეხედულებისამებრ იღებს.ვიცი, რომ საკრებულოს წევრები არ მოერიდებიან საკუთარი აზრის დაფიქსირებას და ნებისმიერ შემთხვევაში აქ არ უნდა იგულისხმებოდეს ვინმეს და რაიმეს ზეგავლენა.
დიდი იმედი მაქვს, რომ ყველა საკუთარ აზრს დააფიქსირებს. მე პირადად არ ვაპირებ ჩარევას და საკუთარი აზრის თავსმოხვევას, რადგან ძალიან მნიშვნელოვანია ჩემთვის რა პოზიცია ექნებათ მათ და რას შემოგვთავაზებენ. საკრებულო კოლეგიალურიორგანოა; არა აქვს მნიშვნელობა რომელი ძალაა მმართველი; ვინ არის ოპოზიციაში, მთავარია კოლეგიალურორგანოში ყველამ ინდივიდუალურად მიიღოს გადაწყვეტილება. თუ ეს გადაწყვეტილება იქნება უმრავლესობის აზრი, ეს შემდეგ აისახება. პირადად ჩემი გადაწყვეტილება უკვე გითხარით, ამ საკითხს მხარს არ დავუჭერ“, _ აცხადებდა გოგუაძე.
ამავე თემაზე:
„მივიღებთ ცნობად“ _ რისი ბერკეტები არ აქვთ ოზურგეთის თვითმმართველი ერთეულების საკრებულოებში
