ჩოხატაურის მერის განცხადებას, მუნიციპალიტეტის ცენტრში ნოდარ დუმბაძის სახელობის სკვერში 295 კვადრატული მეტრის პირობიანი აუქციონის წესით გასხვისების შესახებ ამჯერად საკრებულოს ფრაქცია “ჩოხატაური საქართველოსთვის” თავმჯდომარე გოგი ბოლქვაძე ეხმაურება.
როგორც ბოლქვაძე თავის ვრცელ ტექსტში ამბობს, არსებული ინფორმაციის შესახებ რამდენიმე დღით ადრე შეიტყო, თუმცა, არალეარურად მიიჩნია და ხუმრობად ჩათვალა.
“ფრაქცია “ჩოხატაური საქართველოსთვის” სახელით მინდა გამოვეხმაურო ჩოხატაურის მუნიციპალიტეტის საკრებულოს 29 აგვისტოს საკრებულოს მორიგ სხდომაზე მომხდარ ფაქტს.
კერძოდ, დღის წესრიგის მე-4 საკითხს, ჩოხატაურში დუმბაძის ქუჩაზე მდებარე 290.00 კვ.მ. არასასოფლო-სამეურნეო დანიშნულების მიწის ნაკვეთის (ნ. დუმბაძის სახელობის პარკი) (ს/კ – 28.01.21.718) ძირითადი (განუსხვისებელი) ქონების კატეგორიის სტატუსის დაკარგვისა და ჩოხატაურის მუნიციპალიტეტის ქონების საპრივატიზაციო ობიექტების 2023 წლის დამატებითი პრივატიზების გეგმის დამტკიცების შესახებ.
მინდა გითხრათ, საკრებულოში რამდენიმე დღით ადრე გაიჟღერა აღნიშნულმა საკითხმა, მაგრამ, სიმართლე გითხრათ, იმდენად არარელურად მივიჩნიე საკითხი ხუმრობად ჩავთვალე. ბევრს მოგეხსენებათ, 14 წელი ვმუშაობდი მერიის არქიტექტურის სამსახურში, მაოცებს ის ფაქტი, რომ უბრალოდ, იდეად ვის მოუვიდა, არათუ ადმინისტრაციული წარმოების დაწყება, არამედ აზრადაც არავის მოუვიდოდა ესეთი რამ.
მერიის ყველა თანამშრომელს ვიცნობ. წლები გვაკავშირებს, ვიცნობ მათ პროფესიონალზმს, ვისაც ამ პროცესში კანონმდებლობის შესაბამისად უწევს ჩართულობა, რადგან ეს საკითხი ბევრ ინსტანციას გადის, დარწმუნებული ვარ, რომ ძალიან შეურაცხყოფილად გრძნობენ თავს ეს ადამიანები.
მე პირადად, მინდა, მადლობა ვუთხრა მათ წლების მანძილზე მუნიციპალიტეტისა და მოქალაქეების წინაშე თავიანთი კეთილსინდისიერი შრომისათვის. სამწუხაროა, რომ დღევანდელი ხელისუფლების პირობებში უწევთ ასეთი არაადამიანური ბრძანებების შესრულება.
რაც შეეხება საკითხს, საკრებულოს ქონების მართვის კომისიაზე (მათ შორის უმრავლესობიდანაც) მადლობა იმ დეპუტატებს, რომლებმაც გააპროტესტეს საკითხი და მხარი არ დაუჭირეს, ამის შემდეგ საკითხი დღის წესრიგიდან მოიხსნა,
ბიუროს სხდომაზე მისულს არ მეგონა, თუ ეს საკითხი კიდევ სადმე დამხვდებოდა, მაგრამ ოცი წუთის დაგვიანებით დაწყებულ ბიუროს სხდომაზე საკითხი ისევ გამოჩნდა, რა თქმა უნდა, ბიუროზევე განვაცხადე უარი დღის წესრიგში საკითხის შეტანის თაობაზე, მაგრამ უმრავლესობამ, როგორც ხდება, საკითხი დღის წესრიგში შეიტანა.
საკრებულოს სხდომაზე გამოსულ საკითხს მხარი რვა დეპუტატმა არ დავუჭირეთ, აქედან ორი ქართული ოცნების დეპუტატი იყო, მაგრამ ისევ უმრავლესობის გადაწყვეტილებით, საკითხი გავიდა, რის შემდეგაც პროტესტის ნიშნად სხდომა დავტოვეთ.
და ბოლოს, მინდა განვუცხადო მოვალეობის მოხდის მიზნით მობრძანებულ ტელევიზიებს _ ყველაფერი ისე გააშუქეთ, როგორც არის! საკრებულოს სხდომიდან დაწყებული პროტესტის გამოხატვით დამთავრებული. არიან ჩოხატაურში ადამიანები ვინც კომენტარს გააკეთებდა აღნიშნულ საკითხთან დაკავშირებით საკრებულოში და არა საკუთარი მხლებლები”.
შეგახსენებთ, რომ ჩოხატაურის მუნიციპალიტეტის მერმა, დავით შარაშიძემ აღნიშნული თემის შესახებ “გურია ნიუსთან” რამდენიმე დღის წინ გააკეთა კომენტარი:
“გადავწყვიტეთ, რომ ჩოხატაურში, სადაც არ არის საქართველოს ბანკი, შემოგვეყვანა. შეთანხმება უკვე გაკეთებულია. სამხარაულის ექსპერტიზამ ტერიტორია შეაფასა 15 000 ლარად და ამ ფასად გავიტანთ აუქციონზე. პარკში არ მოიჭრება არც ხე, არც სკამი და ან ბილიკი არ გაუქმდება. 295 კვადრატი არის მიწის ნაკვეთი, კოეფიციენტების მიხედვით, გორაზე აიღებენ მშენებლობის უფლებას და ჩადგამენ ბანკის შენობას მსუბუქი კონსტრუქციით, ოთხივე მხრიდან პანორამაში, _ გვითხრა შარაშიძემ.
ჩოხატაურის პირველი პირის ამ განცხადებას გამოეხმაურა, ასევე, პარტია “საქართველოსთვის” მერობის კანდიდატი 2021 წლის არჩევნებში პაატა ბერიშვილი.
