23 ივნისს, ოზურგეთში, თაყაიშვილის ქუჩის მცხოვრებლებმა საპროტესტო აქცია გამართეს. ისინი გზის მშენებლობის ხარისხს აპროტესტებდნენ და ითხოვდნენ, როგორც მშენებლობის დროს დაშვებული უამრავი უზუსტობის გამოსწორებას, ასევე, იმ ზარალის ანაზღაურებას, რაც მათ სახლებს და ეზოებს მიადგა.
_ ასფალტის დაგება, სანიაღვრე არხების და ტროტუარების მოწყობა აბსოლუტურად არასწორად და უხარისხოდ მიმდინარეობს. გაგვიგია, როცა რეაბილიტაცია და განახლება ხდება, უკეთესი უნდა გააკეთო. ესენი კიდევ მოვიდნენ, საუკეთესო გზა დაგვინგრიეს და უარესს აგებენ. შეხედეთ, რას ჰგავს აქაურობა. საცხოვრებელი სახლების ეზოებში ავტომობილით შესვლა, თითქმის, შეუძლებელია, რადგან ჯებირები ისე მაღალია, ფეხით თუ გადახვალ _ რამდენიმე მანქანას “ბუფერი” გაუტყდა. რამხელა კონსტრუქციები დაყარეს. სამხედრო გზა ერქვა ამას. როდინდელი დაგებულია, მაგრამ საუკეთესო იყო. ახლა მთლად უარესი კიდევ ის არის, რომ მილიონები იხარჯება. წყალი გამოსაყვანი იყო. იმ ძველ მილებს დააყარეს ზემოდან ამხელა ღირებულების კონსტრუქციები. ვინ აყრის თავიდან? ორმაგ ფულს ხარჯავენ და კი მიდის მაგათ ჯიბეებში ორმაგად. ჩვენ რა? _ ყვიროდნენ აქციის მონაწილეები.
აღნიშნულ გზას ოზურგეთში ჩინური კომპანია აკეთებს. აქ მომუშავეები ხალხის პროტესტის პასუხად ამბობენ, რომ მშენებლობა საგზაო დეპარტამენტისგან მიღებული პროექტით ხდება, რასაც ევროსტანდარტის სახელით მოიხსენიებენ.
პროტესტის მონაწილეები კი ამბობენ, რომ ჩინური კომპანიის მიერ გზების და ხიდების მშენებლობა ყველგან უხარისხოა და ამას ვერ შეეგუებიან.
_ სანამ არ გაგვარკვევენ, მუშაობის განახლების უფლებას არ მივცემთ, _ ამბობდნენ ადგილობრივები და ადგილზე კომპანიის წარმომადგენლების და მაჟორიტარი დეპუტატის მისვლას ითხოვდნენ.
_ როგორ გავჩუმდე ეს მოხუცი ქალი? რამხელა პრობლემები შეგვიქმნეს არაფრის გამო! უკეთესს თუ არ გააკეთებდნენ, ისეთი გაეკეთებინათ, როგორიც იყო. როგორ გვტანჯავენ! ჯებირები ისე გააკეთეს, უნდა იხტუნო. მანქანა ვერ უნდა შევიდეს? მე არ მყავს, მაგრამ შვილი იყიდის. როგორ უნდა შევიდეს ეზომდე? ღობეები ხომ ნახევრად ჩამარხეს და მთავარი, სახლი დამიფშვნეს კედლებიანად. გუბერნატორთან ვიყავი. მოადგილემ ბოდიში მომიხადა. ბოდიში მშველის? ამინაზღაურონ ზარალი. ძლივს აშენებული სახლი დამინგრიეს. დაიბზარა ჩემი მეზობლების სახლების კედლებიც. ჰკითხეთ ხალხს! ვაპროტესტებთ, აბა, რა უნდა ვქნათ? გამაგებინეთ, ჩემმა შვილმა რომ ჩაიდინოს ასეთი რამ, ხომ დაიჭერენ? ვინ არიან ესენი, რატომ აძლევენ ამდენის უფლებას? _ ტირილმორეული საუბრობდა თაყაიშვილის ქუჩის მცხოვრები დარეჯან ჩხაიძე.
_ მას შემდეგ, რაც აქციის მონაწილეებმა მშენებლებს მდგომარეობის გარკვევამდე გზის მშენებლობის შეჩერება მოსთხოვეს, მათთან ოზურგეთის მუნიციპალიტეტის მაჟორიტარი დეპუტატი დავით მდინარაძე მივიდა.
_ მე ნამდვილად ვარ საქმის კურსში. თქვენი კოლექტიური განცხადების საფუძველზე, რომლითაც მუნიციპალიტეტს მომართეთ, საგზაო დეპარტამენტს გაეგზავნა წერილი. ვხედავ არსებულ მდგომარეობას და ყველა ინსტანციას, როგორც დეპუტატი, ხმას მივაწვდენ. გპირდებით, ეს მალე მოხდება, _ უთხრა აქციის მონაწილე მოსახლეობის წარმომადგენლებს დავით მდინარაძემ.
მშენებელი კომპანიის ხელმძღვანელობას მოსახლეობის წარმომადგენლები, როგორც თავად თქვეს, დილითვე უნდა შეხვედროდნენ. თუმცა, კომპანიის წარმომადგენლებმა სიტყვა ვერ შეასრულეს და შეხვედრა დღის სამი საათისთვის გადაიდო.
შეკრებილი ხალხი მათ მისვლამდე, გაცხარებით საუბრობდა იმაზე, რომ თაყაიშვილის ქუჩაზე ჩინეთის გზებისა და ხიდების კომპანიის მიერ გზის სარეაბილიტაციო სამუშაოები ზერელედ, უხარისხოდ სრულდება. ისინი განსაკუთრებით იმაზე ბრაზობენ, რომ გზების დეპარტამენტმა ცუდ პროექტს აუნთო მწვანე შუქი, რითაც პრობლემები შეექმნა მოსახლეობას.
მიუხედავად იმისა, რომ მოსახლეობამ რამდენჯერმე მიმართა წერილობით, როგორც კომპანიას, ისე, ოზურგეთის მუნიციპალიტეტის მერიას, ადგილზე დროულად არავინ მივიდა. მართალია, მერიამ შესაბამისი წერილი გაუგზავნა საავტომობილო გზების დეპარტამენტს, მაგრამ მათი სპეციალისტები არ მივიდნენ თაყაიშვილის ქუჩაზე მდგომარეობის გასაცნობად.
შუადღისას ოზურგეთის, თაყაიშვილის ქუჩის მოსახლეობის წარმომადგენლებს ჩინეთის გზებისა და ხიდების კომპანიის წარმომადგენლები შეხვდნენ.
ამ კომპანიის ზედამხედველობის სამსახურის წარმომადგენელმა იოგენ გათნაგარმა განაცხადა, რომ ისინი პროექტის მიხედვით აწარმოებენ სამუშაოებს.
კითხვაზე, თუ ვინ შეადგინა პროექტი, რა ღირებულების სამუშაოები უნდა ჩატარდეს, გათნაგარმა განაცხადა, რომ ეს ინფორმაცია საჯარო არ არის და შეგიძლიათ, საგზაო დეპარტამენტს მიმართოთო.
ჩინური კომპანიის წარმომადგენლებმა საკრებულოს მაჟორიტარ დეპუტატ დავით მდინარაძესთან, ოზურგეთის მერიის წარმომადგენლებს გოჩა აბაშმაძესა და გია ნიკოლაიშვილთან ერთად, მშენებლობის კრიტიკული ადგილები დაათვალიერეს და მოსახლეობის პრეტენზიები მოისმინეს.
ზედამხედველობის სამსახურის წარმომადგენლები აცხადებენ, რომ ისინი არსებული პრობლემების შესახებ მოახსენებენ ხელმძღვანელებს (როგორც ამ კომპანიის წარმომადგენელმა ლელა კოჭლამაზიშვილმა გვითხრა, საგზაო დეპარტამენტს მათთვის არ მიუწოდებია ოზურგეთის მუნიციპალიტეტის მერიის წერილი #36-3623142153, 22/05.2023 წ.). ისინი არსებულ ვითარებაზე იმსჯელებენ და გადაწყვეტილებებს მიიღებენ.
თაყაიშვილის ქუჩის მცხოვრებლები, უახლოეს მომავალში, ჩინური კომპანიის მიერ გზის სამუშაოების წარმოებისას წარმოქმნილ პრობლემები თაობაზე პასუხს ელოდებიან.
“გურია ნიუსი” თვალს მიადევნებს ამ პროცესს და საქმის ვითარებას გააცნობს, როგორც თაყაიშვილის ქუჩის მცხოვრებლებს, ასევე, ჩვენს მკითხველებს.
ავტორი
