უკრაინის შეიარაღებულმა ძალებმა ლუგანსკის ოლქის ქალაქ კადიევკაში ვაგნერის ჯგუფის ბაზა გაანადგურეს, რომელიც 2014 წლიდან ოკუპირებულია. ამის შესახებ ინფორმაციას ლუგანსკის რეგიონული სამხედრო ადმინისტრაციის ხელმძღვანელი, სერგეი გაიდაი Telegram-ზე ავრცელებს.
მისივე თქმით, ბაზა კადიევკაში ადგილობრივ სტადიონზე მდებარეობს.
“ამჯერად ვაგნერის ჯგუფის ბაზას გაუჩნდა ცეცხლი. უკრაინის შეიარაღებულმა ძალებმა მას ზუსტი დარტყმა მიაყენეს. მხოლოდ ერთი რაშისტი გადარჩა”,_ წერს გაიდაი.
ცნობისთვის, დაჯგუფება ვაგნერს რუსეთის პრეზიდენტთან ვლადიმერ პუტინთან დაახლოებულ ბიზნესმენს ევგენი პრიგოჟინს უკავშირებენ. ევროკავშირის ანგარიშის თანახმად, დაჯგუფებას პრიგოჟინი აფინანსებს. კრემლთან ახლო კავშირების გამო პრიგოჟინს პუტინის მზარეულს ეძახიან. მას ევროკავშირისა და აშშ-ს სანქციები უკვე დაწესებული აქვს, ლიბიაში მდგომარეობის დესტაბილიზაციისა და აშშ-ს არჩევნებში ჩარევის მცდელობისთვის. პრიგოჟინი ვაგნერთან კავშირს უარყოფს.
2021 წლის 14 დეკემბერს ადამიანის უფლებების დარღვევისთვის ევროკავშირმა რუსულ დაჯგუფება ვაგნერს და მასთან დაკავშირებულ პირებს სანქციები დაუწესა.
ავტორი
