,,უკრაინასთან საზღვრის გასწვრივ სამხედრო ძალებისა და აღჭურვილობის გადაადგილებით ვლადიმერ პუტინი დასავლეთთან ჭადრაკს თამაშობს“, – განაცხადა უკრაინის თავდაცვის მინისტრმა, ალექსეი რეზნიკოვმა გაზეთ The Wahington Post-თან მიცემულ ინტერვიუში.
მან, აშშ-ს და ევროპულ ქვეყნებს მოუწოდა, რომ კრემლს, პასუხისმგებლობა დააკისრონ ნებისმიერი განახლებული აგრესიის გამო.
„ის ევროკავშირის ერთიანობას, ნატოს მოკავშირეების ერთიანობას, ჩვენს საზოგადოებას, პოლონეთსა და ბალტიისპირეთის ქვეყნებს ცდის“, – განაცხადა უკრაინის თავდაცვის მინისტრმა.
როგორც გამოცემა წერს, ალექსეი რეზნიკოვმა ვაშინგტონში ვიზიტისას, რომელიც მოიცავდა პირისპირ მოლაპარაკებებს თავდაცვის მდივანთან ლოიდ ოსტინთან დამატებითი სამხედრო დახმარების მოთხოვნას.
რეზნიკოვმა თქვა, რომ ის და მისი ამერიკელი კოლეგა რუსეთ-უკრაინის საზღვარზე არსებულ ვითარებასთან დაკავშირებით ერთნაირ დასკვნამდე მივიდნენ, თუმცა მან შესთავაზა ზოგიერთ უკრაინელ ჩინოვნიკს თავდაპირველად ნაკლები განგაშით უყურონ განვითარებულ მოვლენებს, რადგან თითქმის რვა წლიანი ომის შემდეგ რუსეთის საფრთხის გამო დამუნჯდნენ.
„ჩვენ ერთნაირი შეფასება გვაქვს რისკებსა და საფრთხეებზე, თუმცა განსხვავება რისკების აღქმაშია. უკვე რვა წელია, რაც ამ სტანდარტით ვცხოვრობთ – ამიტომაც ფსიქოლოგიური იმუნიტეტი გვაქვს“ – განაცხადა უკრაინის უწყების ხელმძღვანელმა.
The Washington Post-თან საუბრისას რეზნიკოვმა თქვა, რომ ვლადიმერ პუტინი გარდატეხის მომენტში იმყოფება და ცდილობს გადაწყვეტილება მიიღოს, „გადაკვეთოს თუ არა უკრაინის საზღვარი და დაწვას თუ არა ხიდები, ან ჯერ კიდევ ვაჭრობს და ცდილობს მისთვის რაიმე საინტერესო გამონახოს“.
„ვიმედოვნებ, რომ ამ საკითხზე გადაწყვეტილება მიღებული არ აქვს. ის ცდილობს ადამიანთა გულებში შიში დათესოს“ – განაცხადა ალექსეი რეზნიკოვმა.
უკრაინის თავდაცვის მინისტრი ხაზგასმით აღნიშნავს, რომ ამერიკელმა, ევროპელმა და უკრაინელმა ოფიციალურმა პირებმა პუტინი უნდა გადაარწმუნონ, რადგან ნებისმიერი ასეთი შეჭრა უკრაინასა და ევროპას ბევრად უფრო ძვირი შეიძლება დაუჯდეს, ვიდრე რუსეთის ქმედებები 2014 წელს.
„ჩვენ ის შეჭრამდე უნდა გავაჩეროთ და არა შეჭრის შემდეგ. ეს არ იქნება ის, რაც ყირიმში მოხდა. ეს სისხლიანი ხოცვა-ჟლეტა იქნება“- აღნიშნა უკრაინის თავდაცვის მინისტრმა.
ცნობისთვის, 14 ნოემბერს, უკრაინის პრეზიდენტმა, ვოლოდიმირ ზელენსკიმ განაცხადა, რომ უკრაინის საზღვართან 100 ათასამდე რუსი სამხედროა განლაგებული. 16 ნოემბერს, აშშ-ის თავდაცვის დეპარტამენტის ოფიციალურმა წარმომადგენელმა, ჯონ კირბიმ განაცხადა, რომ უკრაინის საზღვართან რუსეთის უჩვეულო სამხედრო აქტივობა და შეიარაღებული ძალების კონცენტრაცია კვლავ ფიქსირდება. 18 ნოემბერს, აშშ-ის თავდაცვის მდივანმა, ლოიდ ოსტინმა განაცხადა, რომ აშშ უკრაინის საზღვართან სიტუაციას ყურადღებით აკვირდება.
[sexy_author_bio]
