მამაკაცი, ოზურგეთში, თაყაიშვილის ქუჩაზე, ბაზრის ჩასახვევთან, სავაჭრო ცენტრ „მოდერნის“ მომდებარედ ათევს ღამეს, ბოლო ორი კვირაა, რაც ამ ტერიტორიაზე გამოჩნდა.
გავრცელდა ხმა, რომ ის უკრაინელია და ომის დაწყების შემდეგ, საქართველოში ჩამოვიდა.
-ადრე აქ არ გვინახავს. ერთი თვეც არ რის, რაც გამოჩნდა. ამ დილითაც აქ იყო. აქ დადის. შორს არსად მიდის. არც შეუძლია. ხშირად ამბობს, რომ სმისგან არის დაუძლურებული და სურს, ალკოჰოლს თავი დააღწიოს. თუმცა, ახლობელი არავინ ჰყავს. მარტოხელაა და ვერ დაძლია საკუთარი პრობლემა. აქ ათევს, პირდაპირ ასფალტზე წვება. ჯიხურებთან აფარებს თავს, _ გვითხეს თაყაიშვილის ქუჩაზე მყოფმა გარემოვაჭრეებმა.
ჩვენ მალე მივაგენით მამაკაცს, რომელზეც გვეუბნებოდნენ, რომ თითქოს, ის უკრაინიდან ჩამოვიდა და ღამეს ქუჩაში სწორედ იმიტომ ათევდა, რომ სახლი არსად აქვს.
მამაკაცი ვალენტინ ლადონენკოს სახელით გაგვეცნო. ის, იქვე, ქუჩაში, მანქანასთან იდგა.
როცა გავესაუბრეთ, ქართულად გვიპასუხა, რომ მხოლოდ გვარი აქვს უკრაინული წარმოშობის.
_მე უკრაინიდან არ ჩამოვსულვარ. არ ვიცი, ვინ თქვა ეგ. სოფელ ბახვში ვარ დაბადებული. მამაჩემი უკრაიელი იყო. აქ, სამხედრო ნაწილში მუშაობდა, კომუნისტების დროს. მე 1974 წელს დავიბადე. მშობლები გაშორდნენ. დედა გარდაიცვალა. მამა უკრაინაში ადრე დაბრუნდა. დავრჩი მარტო. არავინ მყავს. უმუშევრად ყოფნა ძნელია. ალკოჰოლმა ჩამითრია. ძალიან მინდა, რომ განვიკურნო. თუმცა ამას ჩემი მონდომებით ვერ ვაკეთებ. ერთხელ საავადმყოფოში, სასწრაფო დახმარებისთვის დავრეკე. მიმკურნალეთ-მეთქი. კი წამიყვანეს, თუმცა მეორე დღეს გამომიშვეს უკან. ვერ ვახერხებ მარტო განკურნებას. ერთხელ მაინც რომ დამეხმარებოდნენ, იქნებ, დავუბრუნდე ცხოვრებას, – თქვა მან „გურია ნიუსთან“.
აღნიშნულის თაობაზე ჩვენ ოზურგეთის მუნიციპალიტეტის მერიას დავუკავშირდით და ვუთხარით ვალენტინ ლადონენკოს შესხებ.
_აუცილბლად, ახლავე ჩავინიშნავ, გადავცემ ხელმძღვანელებს ინფორმაციას და დარწმუნებული ვარ, გატარდება ღონისძიება ამ ადამიანის გადასარჩენად, – გვითხრეს ოზურგეთის მერიის პრესსამსახურში.
ავტორი
