„უმრავლესობის რამდენიმე დეპუტატი გუნდს ოფიციალურად გამოეყოფა“_ გია აბაშიძე

„ქართულ ოცნებაში“ დაძაბული ურთიერთობაა, სავარაუდოდ, უმრავლესობის რამდენიმე დეპუტატი მმართველ პარტიას ოფიციალურად გამოეყოფა“,_ აღნიშნა „გურია ნიუსთან“ ექსპერტმა გია აბაშიძემ. 

აბაშიძემ ფარული ჩანაწერების გავრცელებასთან დაკავშირებითაც ისაუბრა და აღნიშნა, რომ „ადამიანი, რომელიც პირადი ცხოვრების ამსახველი კადრების მეშვეობით პოლიტიკურ ბრძოლას ახორციელებს, სახედაკარგული პიროვნებაა“.

_ ბატონო გია,  „ქართული ოცნების“ დეპუტატმა ეკა ბესელიამ  ფარული ჩანაწერების  შესაძლო გავრცელების შემოქმედნი ირიბად დაასახელა და აღნიშნა, რომ აღნიშნულთან დაკავშირებით პასუხისმგებლობა, ვციტირებ _“კოლექტიურ მოძალადეებს“ ეკისრებათ.  იმ ადამიანებს, რომლებიც წინა რეჟიმის მმართველობიდან „ქართულ ოცნებაში“ გადმოპორტირდნენ და ახლა საკანონმდებლო თუ სასამართლო ხელისუფლებაში კომფორტული ადგილები აქვთ დაკავებული. თავად რას ფიქრობთ ფარული ჩანაწერის შესაძლო გავრცელების წყაროებზე?

 _საიდან გავრცელდა ჩანაწერები, ნამდვილად არ ვიცი, მაგრამ ნებისმიერი მხარე, რომელიც ფარული ჩანაწერების გავრცელებით არის დაინტერესებული,  დამარცხებულია. ადამიანი, რომელიც პირადი ცხოვრების ამსახველი კადრების მეშვეობით პოლიტიკურ ბრძოლასა ახორციელებს, სახედაკარგული პიროვნებაა. ერთხელ მაინც, ამ ჩანაწერებთან დაკავშირებით საგამოძიებო უწყებამ უმკაცრესი რეაგირება უნდა მოახდინოს და სავარაუდო დამნაშავე აუცილებლად უნდა დასაჯოს.

_ თანამდებობებზე უვადოდ გასამწესებელ მოსამართლეებთან დაკავშირებით აგორებული სკანდალის შემდეგ, „ქართული ოცნების“ წევრთა ერთიანობა ბიძინა ივანიშვილის გამოჩენამდე კითხვის ნიშნის ქვეშ კიდევ ერთხელ დადგა. მიუხედავად იმისა, რომ „ოცნების“ თავმჯდომარემ გუნდის გამაერთიანებლის როლი კიდევ ერთხელ შეასრულა, როგორც ჩანს, ბიძინა ივანიშვილისთვის მმართველი პარტიის გარკვეულ წევრთა შენარჩუნება შეუძლებელი გახდება. ეკა ბესელია ღია წერილში ამბობს_“მე-7 წლისთავზე ვწყვეტ შიგნით საუბარს, წუხილს, სამდურავს. საჯაროდ ვამბობ, ს ა კ მ ა რ ი ს ი ა“.  აღნიშნული განცხადება ნიშნავს, რომ ბესელია „ქართული ოცნებიდან“ მიდის და დამოუკიდებლად ახალი პოლიტიკური თამაშისთვის ემზადება?

_“ქართული ოცნების“ ორდღიან შეხვედრაზე, დეპუტატები  ძალიან შეხმატკბილებულად გამოიყურებოდნენ, რაც რეალობას არ შეესაბამებოდა იმ პოლიტიკური კრიზისის ფონზე, რომელიც „ქართულ ოცნებაში“ მიმდინარეობს. ეკა ბესელიამ ეჭვები გაამყარა იმის შესახებ, რომ გუნდში საკმაოდ დიდი პოლიტიკური რყევებია. უახლოეს პერიოდში, სავარაუდოდ, რამდენიმე ადამიანის უმრავლესობიდან გამოყოფას ვიხილავთ. მიმანიშნებელი სიგნალები ამაზე მეტყველებენ.

 _ ჩანს, რომ „ქართული ოცნება_დემოკრატიული საქართველოს“ თავმჯდომარე  ბიძინა ივანიშვილი საკუთარი პარტიის თანადამფუძნებლებს თანდათან კარგავს. „ქართულ ოცნებას“ ღიად გამოცხადებული შიდაპარტიული ომი სადამდე მიიყვანს?

_ამ შემთხვევაში, გასათვალისწინებელია ორი ფაქტორი. პირველი _ შარშან, მაისში, ბატონი ივანიშვილი პარტიის ლიდერად ოფიციალურად დაბრუნდა, ამის ერთ-ერთ მიზეზად პარტიაში არაერთგვაროვანი პოზიციები დაასახელა. მეორე უმნიშვნელოვანესი იყო საპრეზიდენტო არჩევნების პირველი ტურის შემდეგ მისი განცხადება, მისივე სიტყვებით რომ ვთქვათ, პარტიული ვერტიკალი დასალაგებელია, რისთვისაც ერთი წელი მჭირდებაო, ვფიქრობ, მის მიერ ჩამოყალიბებულ პარტიაში პოლიტიკური ველის დალაგება ახლა ხდება. სისტემური ცვლილებების შესახებ საზოგადოებაში მოლოდინი გაიზარდა. მგონია, რომ პარტია გაძლიერდება და  ადამიანური რესურსების ოპტიმიზაცია მოხდება.

_ პოლიტიკურ წრეებში აცხადებენ, ეკა ბესელია დარჩება თუ არა მმართველ გუნდში არავითარი მნიშვნელობა აქვსო. თავად რას ფიქრობთ, იმ შემთხვევაში, თუ ბესელია საკუთარ თანამოაზრეებთან ერთად, „ქართულ ოცნებას“ გამოეყო,  ქართულ პოლიტიკურ ვერტიკალზე ეს გუნდი ანგარიშგასაწევი ძალა იქნება?

_ მათი ძალა რამდენად ანგარიშგასაწევი იქნება, ფრაქციის წევრებზეა დამოკიდებული. მათ საზოგადოებაში პოლიტიკური წონის მოპოვება და დამკვიდრება უნდა შეძლონ. საზოგადოების ნდობის მოპოვება დეპუტატების მიერ გადადგმულ პოლიტიკურ ნაბიჯებზე იქნება დამოკიდებული. ვნახოთ, როგორ განვითარდება მოვლენები, ჯერჯერობით, მტკიცებით ფორმაში საუბარი ნაადრევია.