უნდა მიიღოს თუ არა ოპოზიციამ მონაწილეობა თვითმმართველობის არჩევნებში _ ვინ რას ამბობს

სადავო საპარლამენტო არჩევნების შემდეგ საქართველოში ადგილობრივი თვითმმართველობის არჩევნები უნდა ჩატარდეს.

ოპოზიციური პარტიების პროტესტის ფონზე, 5 ივლისს “ლელო-ძლიერი საქართველომ” განაცხადა, რომ არჩევნებში მონაწილეობას აპირებს.

“კოალიცია “ძლიერი საქართველო” ოფიციალურად და დეკლარირებულად იწყებს ბრძოლას საქართველოს თითოეული მოქალაქისთვის, თითოეული ადამიანის უფლებისთვის, თითოეული ახალგაზრდის მომავლისთვის და თითეული ხანდაზმულის კეთილდღეობისთვის – ჩვენ შევდივართ ბრძოლაში. ჩვენ შევდივართ დიქტატურის და რუსული რეჟიმის წინააღმდეგ კიდევ ერთ წინააღმდეგობაში!”_ აცხადებს “ლელო – ძლიერი საქართველო”.

“თუ პროდასავლური პარტიები, “ლელო“, “ახალი“, “ნაცმოძრაობა“, გახარიას პარტია, არ შევლენ ამ პროცესში, შევლენ კვაზი პარტიები, “ქართული ოცნების” სატელიტები, რომლებიც სრულად დაიკავებენ ამ ველს, მოძლიერდებიან და გენერალურ ბრძოლაში, რომელიც ყველა პროდასავლური პარტიის მთავარი ამოცანაა, საპარლამენტო არჩევნებში შევლენ ამ უპირატესობით.

ასევე არ უნდა დაგვავიწყდეს ის ხალხი, საჯარო მოხელეები, რომლებიც გარკვეული მიზეზების გამო ვერ ერთვებიან პროტესტში, ეს ხალხი არ უნდა დავტოვოთ “ქართული ოცნების” პირისპირ მარტო. მათი ერთადერთი შესაძლებლობა, რომ პროტესტი გამოხატონ არის მისვლა საარჩევნო ყუთთან და პოზიციის დაფიქსირება“, _ განაცხადა პარტიის წევრმა ნიკა ჩერქეზიშვილმა.

ამ გადაწყვეტილების შემდეგ “ლელო – ძლიერი საქართველოს” პოლიტსაბჭო დატოვეს საბა ბუაძემ, დეა მეტრეველმა და ანა ნაცვლიშვილმა.

“ლელო – ძლიერი საქართველოს” გადაწყვეტილება პოლიტპატიმრების ღალატად შეაფასეს “ნაციონალურ მოძრაობაში”:

“ლელოს” ეს გადაწყვეტილება არის იმ ბრძოლის ღალატი, რა ბრძოლაშიც საქართველოს მოქალაქეები არიან რეჟიმის წინააღმდეგ.

ეს არის ღალატი პოლიტიკური პატიმრების, საქართველოს თითოეული მოქალაქის და ღალატი ყველა იმ ოპოზიციური პარტიის და სამოქალაქო ჯგუფის, რომელიც იბრძვის რეჟიმის წინააღმდეგ. “ლელომ” უნდა იცოდეს, რომ მისი მხრიდან ამ გზის არჩევა, რასაც ჰქვია “ოცნებასთან” კოალიციის შექმნა და ამ რუსულ სპეცოპერაციაში მონაწილეობა არის ის, რის საფასურსაც გადაიხდის როგორც საკუთარ ამომრჩეველში, ისე პოლიტიკურ წრეებში. ეს ეტყობა კიდეც იმ პროცესებს, რაც მიმდინარეობს “ლელოში“, სადაც ადამიანები ძალიან ღირსეულად ტოვებენ პოსტებს “ლელოს” იმ გადაწყვეტილების გამო, რაც მათ მიიღეს“, _ განაცხადა ანა წითლიძემ.

“ლელო – ძლიერი საქართველოს” გადაწყვეტილება სწორია და მე ამ გადაწყვეტილებას მხარს ვუჭერ, “გოიმებივით” აყარეს, ყაველაშვილი კი არ ნიშნავს არჩევნებს, არამედ ეს კონსტიტუციური პროცესია – ვფიქრობ, ნეიტრალური კანდიდატები უნდა დავაყენოთ“, _ ამის შესახებ “გახარია – საქართველოსთვის” ერთ-ერთმა ლიდერმა, ლევან გოგიჩაიშვილმა “ტვ პირველთან” საუბრისას განაცხადა.

მისი თქმით, ქვეყანას აქვს გამოცდილება, რომ უსამართლო პირობების მიუხედავად, გამარჯვება შესაძლებელია:

უნდა მიიღოს თუ არა ოპოზიციამ მონაწილეობა თვითმმართველობის არჩევნებში, ამ კითხვაზე   ჩოხატაურის მუნიციპალიტეტის საკრებულოს წევრმა,  კოალიცია “ცვლილებებისთვის” წარმომადგენელმა   ბაჩო ახალაძემ “გურია ნიუსს” განუცხადა, რომ ოპოზიციამ მონაწილეობა არ უნდა მიიღოს:

“დღევანდელი პოლიტიკური ვითარება საქართველოში გამორიცხავს თავისუფალი და სამართლიანი არჩევნების ჩატარებას. ქვეყანაში, სადაც ოპოზიციური ლიდერები და აქტივისტები სასჯელს იხდიან, სადაც 60-მდე პოლიტპატიმარია, და სადაც 200 დღეზე მეტია საპროტესტო აქციაა   ქვეყნის მთავარ გამზირზე _ არჩევნებში მონაწილეობა უკვე ვერ წარმოადგენს დემოკრატიულ პროცესს.

 ეს არის იმიტაცია, რომელსაც არავითარი კავშირი არ აქვს რეალურ კონკურენციასთან, თანასწორ პირობებთან და ხალხის თავისუფალ არჩევანთან.

ბოიკოტი ამ პირობებში არ არის სუსტი ნაბიჯი. პირიქით _ ეს არის პრინციპული, მორალური და სტრატეგიული გადაწყვეტილება.

ეს არის უარი მონაწილეობაზე იმ პროცესში, რომელიც თავიდან ბოლომდე ხელისუფლების კონტროლის ქვეშ მიმდინარეობს და მიმართულია მხოლოდ ერთი მიზნისაკენ _ რეჟიმის შენარჩუნებისა და მისი ლეგიტიმაციის მოპოვებისკენ.

როდესაც ხელისუფლება იჭერს ოპონენტებს, დევნის განსხვავებული აზრის მქონე მოქალაქეებს, რეპრესირებს მედიას და საზოგადოებრივ აქტივისტებს, და ამ ფონზე ატარებს “არჩევნებს“, ოპოზიციური პარტიების მონაწილეობა ამ პროცესში არ ნიშნავს ბრძოლას — ეს ნიშნავს დამორჩილებას. სწორედ ამიტომ, ბოიკოტი არის ბრძოლის გაგრძელება სხვა ფორმით _ ქუჩაში, საზოგადოებაში, საერთაშორისო მედიასა და პარტნიორებთან.

ბოიკოტი არის გზავნილი, რომ პოლიტიკური პროცესის დაბრუნება კონსტიტუციურ და სამართლიან ჩარჩოში მხოლოდ იმ შემთხვევაშია შესაძლებელი, თუ შესრულდება მინიმუმ სამი პირობა:

1. პოლიტპატიმრების დაუყოვნებლივ გათავისუფლება;
2. ახალი საპარალამენტო არჩევნების ჩანიშვნა;
3. ცენტრალური საარჩევნო კომისიის სრულფასოვანი რეფორმა.

სანამ ეს პირობები არ დაკმაყოფილდება, არჩევნებში მონაწილეობა ნიშნავს, რომ საზოგადოებამ მიიღო უსამართლობა, როგორც ნორმა.

ამიტომ, ბოიკოტი არ არის დემოკრატიის წინააღმდეგ მიმართული მოქმედება. ეს არის დემოკრატიის დაცვის ფორმა _ იმ პირობებში, როდესაც თვითონ დემოკრატიაა განდევნილი ამ ქვეყნის ინსტიტუციური ცხოვრებიდან“, _ ამბობს ბაჩო ახალაძე.

ჩოხატაურის მუნიციპალიტეტის საკრებულოს ფრაქცია “ჩოხატაური საქართველოსთვის” თავმჯდომარემ,  გოგი ბოლქვაძემ გვითხრა, რომ  ოპოზიციის ნაბიჯი სტრატეგიულად გააზრებული უნდა იყოს:

“დღევანდელ ვითარებაში ოპოზიცია დგას რთული არჩევნის წინაშე. ერთის მხრივ, მონაწილეობა შეიძლება იყოს შანსი ცვლილებების რაც დღეს ამ პირობებში რთული იქნება ვგულისხმობ გაყალბებას. მეორეს მხრივ, ამ არჩევნების ლეგიტიმურობა და სამართლიანობა სერიოზულად კითხვის ნიშნის ქვეშაა _ რაც ბოიკოტის საფუძველს იძლევა. საბოლოოდ, თუ ოპოზიცია გადაწყვეტს მონაწილეობას, აუცილებელია მაქსიმალური მობილიზაცია, ერთობა და საერთაშორისო ზედამხედველობა. თუ კი ბოიკოტს აირჩევენ, ეს ნაბიჯიც სტრატეგიულად გააზრებული უნდა იყოს არა უმოქმედობის, არამედ პროტესტის სიმბოლოდ“, _ამბობს გოგი ბოლქვაძე.

ცენტრალური საარჩევნო კომისიის განცხადებით, მუნიციპალიტეტის წარმომადგენლობითი ორგანოს _ საკრებულოს და თვითმმართველი ქალაქის/თვითმმართველი თემის მერის არჩევნები 2025 წლის 4 ოქტომბერს ჩატარდება.