იმ 54 ადამიანს შორის, ვინც ბოლო 24 საათში კორონავირუსს ემსხვერპლა, ერთ-ერთი ლანჩხუთელი პედაგოგი ნინო გაბელიაა. იგი ნიგოითის საჯარო სკოლის ფიზიკის მაწავლებელი იყო. ნინო მასწავლებელი ვირუსის გართულებული მდგომარეობის გამო მართვით სუნთქვაზე იმყოფებოდა, თუმცა სამწუხაროდ, მისი გადარჩენა ვერ მოხერხდა.
„ადამიანებზე, მშობლებზე, მოსწავლეებსა და კოლეგებზე უსაზღვროდ შეყვარებული და მზრუნველი მასწავლებელი _ ასე დარჩება ჩვენს მეხსიერებაში ქალბატონი ნინო გაბელაია, ნიგოითის საჯარო სკოლის პედაგოგი, ათეული წლების მანძილზე ამავე სკოლის სასწავლო ნაწილის გამგე… არ ვიცით, რით გამოვხატოთ მისი დაკარგვით გამოწვეული ტკივილი. არა, მარტო ცრემლი არაა საკმარისი, მაგრამ მას მაინც ვერაფრით ვეხმარებით, მხოლოდ თანაგრძნობა და თანადგომა შეგვიძლია მისი მეუღლისა და შვილებისადმი… ჩვენთვის კი უდროოდ მოტეხილი სიყვარულის ტოტი ხარ, ნინო! გპირდებით, რომ არასდროს დაგივიწყებთ, შესანდობარსა და სანთელს არ მოგაკლებთ. უფალმა დაგიმკვიდროს ცათა სასუფეველი! ამინ!“ _ ასე ეხმიანება კოლეგის გარდაცვალებას ნიგოითის სკოლის თანამშრომლები.
პედაგოგის გარდაცვალებას ფეისბუქზე ემოციური პოსტი ეხმაურება ლანჩხუთელი ოპოზიციონერი კახა ასკურავაც.
„ჩემი გამორჩეულად საყვარელი მასწავლებელი, ჩემი კლასის დამრიგებელი წლების განმავლობაში, ჩემი მეგობარი სკოლის დამთავრების მერეც და უბრალოდ, საქართველოს გამორჩეული მოქალაქე, უნიჭიერესი და უენერგიულესი ნინო მასწავლებელი აღარაა… ასე ძალიან დიდი ხანია გული არ მტკენია, ასე იმედგაცრუებული და შეშინებული არ ვყოფილვარ არასოდეს, რომ წარმოვიდგინე, ამ 21-ე საუკუნის ჭირის, COVID-19 სახით, მართლა რამხელა უბედურება დაატყდა თავს კაცობრიობას. ნინო გაბელაია მუდამ დარჩება იმ მასწავლებელად ჩემს მეხსიერებაში, რომელმაც ფიზიკის გარდა მასწავლა თუ რა იყო საჭირო გარდა ზოგადი განათლებისა, რომ ჩამოყალიბულიყავი სრულფასოვან მოქალაქედ და ამ უნარ-ჩვევებს მაშინ ნერგავდა სკოლაში, როცა იგი ძალიან უცხო იყო საზოგადოებისთვის. აი ასეთი ქალი წავიდა დღეს“.
[sexy_author_bio]
