ოზურგეთში შიშნარევი გამოხმაურება გამოიწვია, ახლახან ქობულეთის მუნიციპალიტეტში დაფიქსირებულმა პირუტყვის (მსქვილფეხა რქოსანი) ცოფის შემთხვევამ.
მოქალაქეები, განსაკუთრებით ხორცის და რძის პროდუქტების ხშირად მომხმარებლები სვამდნენ კითხვებს, ხომ არ იქნება მოსალოდნელი, ამ შემთხვევამ ასახვა ოზურგეთის ბაზარსა და მის მომხმარებელზეც შეძლოს. რომ შესაძლებელია, ვიდრე პირუტყვში ცოფი გამოვლინდებოდა, მისი რძისგან დაამზადეს ყველი და გაყიდეს. შესაძლოა, რძეც გაიყიდა ან ოჯახის წევრებმა მოიხმარეს. ასევე სავარაუდოა, მომხდარიყო პირუტყვის დაკვლა და ხორცის რეალიზაცია.
ჩვენ ვეწვიეთ ოზურგეთის ბაზარს, სადაც ქობულეთის მუნიციპალიტეტიდანაც დადიან იქაური სოფლების მცხოვრებლები და ყიდიან სხვადასხვა პროდუქტს. მათ შორის, რძის ნაწარმსაც.
_რას ამბობთ, აქ აჭარის რეგიონიდან არავის შემოაქვს რძის ნაწარმი. პირიქით, აქედან იქეთ მიაქვთ, რადგან ჩვენთან უფრო იაფად ყიდულობენ, _ გვითხრეს ბაზარში.
_არ დაიჯეროთ, იქედან აქეთ რძის ნაწარმს არავინ შემოიტანს, _ დაიჩემეს მოვაჭრეებმა.
_ჩვენ ვიცით, რომ აქ ნამდვილად შემოაქვს ქობულეთის მუნიციპალიტეტის სოფლების ზოგ მცხოვრებს რძის პროდუქტი და ყიდის…
_თუ იცით, მიაკითხეთ. ჩვენ, ვინც ნარუჯიდან დავდივართ დ ვვაჭრობთ, ძროხები ყველგან აცრილია. გეგმიური აცრა რომ არ მოხდეს, შინ არ დაგვაყენებენ, _ გვითხრეს მოვაჭრეებმა.
ჩვენ მოვინახულეთ ქალბატონი, რომელიც ქობულეთის სოფლიდანაა და ოზურგეთში საკუთარი ოჯახის პროდუქცია ჩამოაქვს გასაყიდად. მათ შორის, რძის ნაწარმიც.
_კი მოხდა ჯიხანჯურში პირუტყვის გაცოფება. ტურამ უკბინა ძროხას. თუმცა ქაქუთსა და ლეღვაში მსგავსი არაფერი მომხდარა. ჩვენ აქ სუფთა პროდუქტი მოგვაქვს. პირუტყვი აცრილია. შიში ყველას უნდა ჰქონდეს. ბავშვებს ვკვებავთ ამ რძით ოჯახში, _ გვითხრა ქალბატონმა, რომელიც ქობულეთის მკვიდრია და ოზურგეთში თავისი სავაჭრო ჯიხური აქვს.
ცალკე საუბრის თემაა, როგორ იყიდება ოზურგეთის ბაზარსა და იქ მისასვლელ გზის პირების გასწვრივ რძის პროდუქტი. ყველის გროვები, ხშირად შეუფუთავი, პირდაპირ გზის გასწვრივ გამოტანილ სკამებზე დევს. რძით სავსე ბოთლები, ზოგან ასფალტზე, ზოგან ხილეულის თუ ლობიოს გასაყიდ გროვებზეა შემოდებული. ასევე ზოგან თევზი და ყველი გვერდი-გვერდ დევს. არ არის დაცული ელემენტარული სანიტარული ნორმები.
ამ თვითნებური ყიდვა-გაყიდვის და სანიტარული ნორმების დარღვევის შესახებ, „გურია ნიუსი“ სეს-ის რეგიონული სამსახურის უფროსს, მანანა ერქომაიშვილს ესაუბრა.
_გეთანხმებით, რძე და რძის პროდუქტი განსაზღვრულ ადგილზე უნდა იყიდებოდეს. არაერთხელ მივუთითეთ. ასეთ დარღვევებზე ჯარიმაც დავუწერეთ. იყო ასეთი შემთხვევები. ახლაც გავაფრთხილებ. სულ ბაზარში ხომ არ დავჯდები? რაც შეეხება ქობულეთში მომხდარ ფაქტს, როგორც ინფორმირებული ვარ, იქ კარანტინია. მიღებულია ყველა ზომა, რომ ნებისმიერი ცხოველი, არათუ მხოლოდ ძროხები, განსაზღვრულ ვადებში შინიდან არ გაუშვან. იყოს იზოლირებული. ჩვენთან აცრების ვადები მუდამ დაცულია. კი ბატონო, საშიში როგორ არ არის ასეთი ვითარება, თუმცა, კონკრეტულად ჩვენთან ამ ეტაპზე საფრთხე არ არსებობს, – გვითხრა ქალბატონმა მანანამ.
