ბახმაროში, სადაც საქართველოს პრემიერ-მინისტრის მრჩეველის რეგიონული განვითარების საკითხებში, სოზარ სუბარის შეფასებით, „საუკუნის პრობლემის მოგვარებას“ ცდილობენ, კვლავ გამოწვევად რჩება უკანონო მშენებლობების საფრთხე.
ჩვენი წყაროს ინფორმაციით, დაბა ბახმაროში, მზის ჩასავალ გორასთან 10 ჰა-მდე მიწის ფართობი დაუკითხავად შემოღობეს.
„გურია ნიუსთან“ შპს “კურორტ “ბახმაროს” დირექტორი, დავით საჯაია, ასევე დაბა ბახმაროში მერის წარმომადგენელი, დავით ჟღენტიც ადასტურებენ, რომ ფართობის შემოღობვის შესახებ ინფორმაცია აქვთ, მაგრამ ვინ და რა მიზნით შემოღობა ამხელა ტერიტორია, არ იციან.
„მიწის ნაკვეთის შემოღობვა მოხდა ბახმაროდან სადღაც 6 კილომეტრში. დაწყებულია მოკვლევა და გამოვლინდება, ვინ შემოღობა. ჩემთვის უცნობია, ვინ შემოღობა“, _ ამბობს საჯაია ჩვენთან სატელეფონო საუბრისას.
მიწის ნაკვეთის შემოღობვის შესახებ ინფორმაციას ადასტურებს დაბა ბახმაროში მერის წარმომადგენელი, დავით ჟღენტიც და აღნიშნავს, რომ ფაქტზე მიმდინარეობს მოკვლევა, უხლოეს დღეებში კი კანონმდებლობით გათვალისწინებული ღონისძიებები გახორციელდება.
„ორი დღის წინ ჩვენ მიერ დაფიქსირებული იქნა მზის ჩასავალი გორის მიმდებარედ უკანონო შემოღობვის ფაქტი და მიმდინარეობს მოკვლევა, შესაბამისად, უახლოეს დღეებში მიღებული იქნება კანონონმდებლობით გათვალისწინებული ღონისძიებები“, _ გვითხრა ჟღენტმა.
„გურია ნიუსი“ ჩოხატაურის მუნიციპალიტეტის მერიის ზედამხედველობის სამსახურის უფროსს, ვლადიმერ ლომთათიძესაც ესაუბრა იმის გასარკვევად, თუ რა სახის სანქციას ითვალისწინებს მსგავსი ქმედება, თუ ის უკანონოა.
ლომთათიძის თქმით, ჯერ განსაზღვრავენ, რა ტერიტორიაა შემოსაზღვრული, უკანონო ქმედების შემთხვევაში კი მის დემონტაჟს გაახორციელებენ. გარდა ამისა, ფაქტი ითვალისწინებს ჯარიმასაც.
„თუ ეს არის უკანონოდ შემოსაზღვრული, ფაქტი ითვალისწინებს ჯარიმას. ჯერ დასადგენია რა ტერიტორიაა. სახელმწიფო მიწის დაკავება საკურორტო ზონაში ისჯება 25 000 ლარით, თუ ეს არ არის საკურორტო ზონა და არის ალპური საძოვარი, ამ შემთხვევაში ჯარიმაა 1000 ლარი, პლიუს დემონტაჟი“, _ გვითხრა ლომთათიძემ.
