“ჩვენი მიზანია, რომ საქართველოს მასშტაბით არცერთი გაურემონტებელი სკოლა აღარ დარჩეს. ამას დასჭირდება წლები. ვფიქრობთ, რომ ამის გაკეთებაც არის შესაძლებელი საშუალოვადიან პერსპექტივაში _ ინფრასტრუქტურა, სწავლების შინაარსი, 4-5 წელიწადში გვექნება პირველი ხელშესახები შედეგები”, _ ეს განცხადება ირაკლი კობახიძემ გააკეთა რამდენიმე დღის წინ.
უფრო მანამდე კი იყო მთავრობის დაპირება, რომელმაც 2022 წლის აგვისტოში მასშტაბური პროექტის _ 800 სკოლის მშენებლობა-რეაბილიტაციის პირველი ეტაპი გამოაცხადა, რომ 2026 წლის ბოლის ყველა საჯარო ზოგადსაგანმანათლებლო დაწესებულება ინფრასტრუქტურულად გამართული იქნებოდა.
“პროექტი საგანმანათლებლო რესურსებზე თანაბარ ხელმისაწვდომობასა და მათ გაუმჯობესებას უზრუნველყოფს და მისი გახორციელებით 230 000-ზე მეტი მოსწავლე ისარგებლებს. შედეგად, 2026 წლის ბოლოსთვის ყველა საჯარო ზოგადსაგანმანათლებლო დაწესებულება ინფრასტრუქტურულად გამართული იქნება”, _ იუწყებოდა მთავრობის ოფიციალური ვებგვერდი.
რეგიონული განვითარებისა და ინფრასტრუქტურის სამინისტროს მიერ 2022 წლის იანვარში გავრცელებული ინფორმაციით, ლანჩხუთის მუნიციპალიტეტში, სადაც 24 საჯარო და 1 კერძო სკოლა ფუნქციონირებს, 3 სკოლას (სოფელ ლესის საჯარო სკოლას, ქალაქის #3 საჯარო სკოლას და სოფელ ჩოჩხათის საჯარო სკოლის გულიანის დაქვემდებარებული კორპუსს) სრული რეაბილიტაცია ჩაუტარდა და პროექტები, საქართველოს მთავრობის მიერ, 8.6 მილიონი ლარით დაფინანსდა.
შემდეგ ეტაპზე ქალაქის პირველ საჯარო სკოლას, სოფელ ღრმაღელის საჯარო სკოლასა და სოფელ ხაჯალიის საჯარო სკოლების რეაბილიტაცია გახორციელდა.
დღეის მონაცემებით კი, ლანჩხუთში არაერთი სკოლაა რეაბილიტაციის მოლოდინში, რომლის მასწავლებლები და მოსწავლეები სხვადასხვა სკოლებში არიან შეხიზნულები და მეორე ცვლის რეჟიმში აგრძელებენ სასწავლო პროცესს. ზოგ შემთხვევაში, ასეთი მიგრაცია წლებია გრძელდება, რადგან სხვადასხვა მიზეზთა გამო, ამა თუ იმ სკოლის სარეაბილიტაციო პერიოდი, ან ახალი სკოლის მშენებლობის დაწყების პროცესი ჯანჯლდება. ასეა ჯურუყვეთის #1 სკოლის შემთხვევაში, რომლის რეაბილიტაციის საჭიროება 2022 წლის გაზაფხულიდან დადგა დღის წესრიგში და აქაურ მოსწავლეებსა და მასწავლებლებს ალტერნატიულ ფართად მაშინ მეზობელ სოფელში მდებარე ნინოშვილის საჯარო სკოლა შესთავაზეს; ცხადია, მეორე ცვლაში. 2023 წლის გურიაში მომხდარი სტიქიის შემდეგ კი ნინოშვილიდან ლესის საჯარო სკოლაში მოუწიათ გადაბარგება, აქაც მეორე ცვლაში, რა თქმა უნდა. ამ დროის განმავლობაში მხოლოდ ის მოხერხდა, რომ ლევან სამხარაულის სახელობის ექსპერტიზის ეროვნულმა ბიურომ დადო დასკვნა, რომლითაც ლანჩხუთის მუნიციპალიტეტის სოფელ ჯურუყვეთის #1 საჯარო სკოლის (ეს სკოლა, ტერიტორიულად, ჯურუყვეთის ადმინისტრაციულ ერთეულში, სოფელ ეწერში მდებარეობს) ტექნიკური მდგომარეობა არადამაკმაყოფილებლად შეფასდა, რის საფუძველზეც შენობის დემონტაჟი განხორციელდა. ამის შემდეგ საქმე მცირედითაც არ წაწეულა წინ.
საგულისხმოა, რომ ადმინისტრაციულ ერთეულში, რომელიც სამ სოფელს: ჯურუყვეთს, ეწერსა და ბაღლეფს აერთიანებს, ახლა მხოლოდ ერთი, ჯურუყვეთის არასრული #2 სკოლა მოქმედებს და წლებია ამ თემში მცხოვრებ ბავშვებს მე-9 კლასიდან სხვა სოფლების სკოლებში უწევთ სიარული.
“უწყლოდ დარჩენილი თევზებივითაა ჩვენი შვილები… ამხელა სოფელს მოწყვიტეს სკოლა. ძალიან მაინტერესებს და ასე დაგისვამთ კითხვას არ აპირებთ სკოლის აშენებას ხოო? გასაკეთებელი ძალიან ბევრია, აქ ვერ ჩამოვთვლი ყველას, მაგრამ რა შევადარო სკოლას ეს მითხარით და მერე ჩამოგითვლით რაა გასაკეთებელი.
სად არ დავწერე, ვის არ მივწერე ამ თემაზე, მაგრამ პასუხი არსადაა, მხოლოდ ერთი დაპირება იყო. დაპირება კი არა ფაქტები დადეთ, გაკეთდება თუ არა.
ნინოშვილმა შეგვიფარა, მერე მეწყერი ჩამოწვა ნინოშვილში, მშობლები შევშინდით და სხვა სკოლა მოვითხოვეთ. გადმოგვიყვანეს ლესაში. მადლობა ორივე სკოლას, მაგრამ როდემდე იწანწალონ მეორე “სმენაში”. რა მოყვება მეორე “სმენას” ყველამ იცის, სპორტულ წრეებიდან გამოვიყვანეთ ბავშვები….
ახლა უკვე ჩემი შვილი სააბიტურიენტოდ ემზადება და იძულებულია, კვირაში 3 დღე სკოლა გააცდინოს და ყურადღება 3 საგანს დაუთმოს, როცა ყველას სწავლობდა. ბავშვებია ცოდვა და ამიტომ მწყდება გული. ვის არ მივმართე, მანამ არ იტყვიან რამეს სანამ ხალხი გზაზე არ გამოვა”, _ ასეთია ჯურუყვეთის #1 საჯარო სკოლის მშობელთა გულისტკივილი.
“სანამდე იქნება ასე?”_ ამ კითხვაზე პასუხის მისაღებად “გურია ნიუსს” ლანჩხუთის რესურსცენტრის ხელმძღვანელთან, ნინო ჩიტაძესთან მორიგი კომუნიკაცია გასული წლის სექტემბერში ჰქონდა და მაშინ საუბრის შედეგად მხოლოდ ის გავარკვიეთ, რომ სამუშაოების დასაწყებად მალე ტენდერის გამოცხადება იგეგმებოდა.
ამავე თემაზე ჩვენ ნინო ჩიტაძეს მიმდინარე წლის მაისშიც დავუკავშირდით და პასუხად ისევ მივიღეთ, რომ სამუშაოების დასაწყებად ტენდერის გამოცხადების მოლოდინში არიან:
“საქმეში აქტიურადაა ჩართული მუნიციპალიტეტის მერი, ალექსანდრე სარიშვილი”, _ იყო რესურსცენტრის ხელმძღვანელის პასუხი.
ამჯერად, კითხვაზე _ “სანამდე იქნება ასე?” პასუხის მისაღებად თემის მაჟორიტარს, ალექსანდრე მახათაძეს დავუკავშირდით და გავარკვიეთ, რომ სიახლე არაფერია, ჯერჯერობით, მაინც და კონკრეტული ვადებიც სადამდე იქნება ასე. თუმცა, დაგვაიმედა, რომ საკითხი მუნიციპალიტეტის ხელმძღვანელობისთვის პრიორიტეტულია და მიმდინარეობს შესაბამისი სამუშაოები მის გადასაჭრელად.
“ამ დროისთვის სიახლე არაფერია, თუმცა, ვმუშაობთ, რომ ეს საკითხი რაც შეიძლება დროულად გადაიჭრას. მუნიციპალიტეტის მერი, ალექსანდრე სარიშვილი აქტიურადაა ჩართული ყველაფერში. ამ სკოლის მშენებლობა მუნიციპალიტეტს პრიორიტეტად აქვს დასახული და ეს მშენებლობა არ განხორციელდება სკოლების მშენებლობა-რეაბილიტაციის იმ პროექტის ფარგლებში, რომელსაც 2022 წლიდან ახორციელებს მთავრობა. ეს ცალკე პროექტი იქნება და ერთდროულად გამოცხადდება ტენდერი, როგორც პროექტირებაზე,ისე მშენებლობაზე”, _ გვითხრა ჯურუყვეთის მაჟორიტარმა.
