საქართველოს უზენაესი სასამართლო ნინო ბაქაქურის, ბესარიონ ალავიძისა და ზურაბ ძლიერიშვილის შემადგენლობით, სახელმწიფოსთან საქართველოს ეკონომიკისა და მდგარდი განვითარების სამინისტროსა და 2007-2016 წლებში, საქართველოს საკონსტიტუციო სასამართლოს თავმჯდომარე გიორგი პაპუაშვილთან მოქალაქე როლანდ ბლადაძის სადავო, ჩამორთმეულ ქონებაზე შემაჯამებელ სხდომას დღეს 14:00 საათზე გამართავს.
როგორც, „გურია ნიუსს“ ორგანიზაცია „ახალგაზრდა ადვოკატებიდან“ აცნობეს, როლანდ ბლადაძე თბილისშია და საქართველოს უზენაეს სასამართლოში ქონების ჩამორთმევის დამასრულებელ სხდომას დაესწრება.
ორგანიზაციის ინფორმაციით, სასამართლო სხდომას საზოგადოების მნიშვნელოვანი ნაწილი დაესწრება და სხდომაზე დასწრების სურვილი დიპლომატიური კორპუსის წარმომადგენლებმაც განაცხადეს.
როგორც საზოგადოებისთვის ცნობილია, უზენაესმა სასამართლომ როლანდ ბლადაძის საკასაციო საჩივარი, არსებითი განხილვისთვის დასაშვებად, პრეცედენტული დავის სტატუსით, 2017 წლის 15 სექტემბერს მიიღო.
როლანდ ბლადაძე მოითხოვს, ბათილად იქნეს 2007 წლის 21 ივნისის ნასყიდობის ხელშეკრულება, როგორც კანონსაწინააღმდეგო და ამორალური, გიორგი პაპუაშვილი აღიარებულ იქნეს არაკეთილსინდისიერ შემძენად და მფლობელად.
როლანდ ბლადაძის ადვოკატის, არჩილ კაიკაციშვილის განცხადებით, ბლადაძე არ ეთანხმება კომპენსაციის სახით თანხის მიღებას სახელმწიფოსგან, რადგან მისი ერთადერთი მიზანი არის ალტერნატიული ფართის მიღება მორიგების პირობებში, თუ მისი პირვანდელი ქონება ვერ დაუბრუნდება.
