სახელმწიფოსთან საქართველოს ეკონომიკისა და მდგრადი განვითარების სამინისტროს, ასევე, საქართველოს საკონსტიტუციო სასამართლოს ყოფილ თავმჯდომარე გიორგი პაპუაშვილთან მოქალაქე როლანდ ბლადაძის სადავო, ჩამორთმეულ ქონებაზე დავა, რომელიც სასამართლოში რამდენიმე წელი გაგრძელდა, შეთანხმებით დასრულდა.
საქმეზე გადაწყვეტილება საქართველოს უზენაესმა სასამართლომ გამოაცხადა.
უზენაესმა სასამართლომ გააუქმა ქვემდგომი ინსტანციის სასამართლოს გადაწყვეტილებები, რომლითაც როლანდ ბლადაძის სარჩელი არ დაკმაყოფილდა.
შეთანხმების მიხედვით, კი სასამართლომ მიიღო განჩინება, რომლის თანახმადაც როლანდ ბლადაძეს, ბათუმში ჩამორთმეული საცხოვრებელი სახლის სანაცვლოდ 263 კვ.მ.-ის საცხოვრებელი ფართი თბილისში, კეკელიძის ქუჩაზე, გადაეცემა.
ეკონომიკის სამინისტრომ 1 თვის ვადაში საქართველოს მთავრობას უნდა წარუდგინოს პროექტი, რომლის მიხედვითაც, ბლადაძისთვის საცხოვრებელი ფართის საკუთრების უფლებით გადაცემა სიმბოლურ ფასად, 1 ლარად მოხდება.
გარდა ამისა, მორიგების აქტის მიხედვით, როლანდ ბლადაძეს რჩება უფლება, რომ მიყენებული ზიანის ანაზღაურების მოთხოვნით მიმართოს საერთო სასამართლოებს.
„ახალგაზრდა ადვოკატების“ ხელმძღვანელისა და ბლადაძის ინტერესების დამცველის, არჩილ კაიკაციშვილის განცხადებით, ბათუმში ჩამორთმეული სახლის შესახებ, როლანდ ბლადაძე საკონსტიტუციო სასამართლოს ყოფილ თავმჯდომარესთან მოლაპარაკებას აპირებს.
„რაც შეეხება ბათუმში ჩამორთმეულ სახლს, როლანდ ბლადაძე იწყებს მოლაპარაკებებს პაპუაშვილთან, რომელიც ეხება ალტერნატიული ფართის გადაცემის სანაცვლოდ ჩამორთმეული სახლის დაბრუნების პროცესს. გვაქვს სრული მოლოდინი იმისა, რომ ყოფილი მოსამართლე, გიორგი პაპუაშვილი მოცემული მორიგების აქტით და მოცემული შედეგების გათვალისწინებით როლანდ ბლადაძესთან მიაღწევს შეთანხმებას და ერთადერთი საცხოვრებელი სახლი ბლადაძეს დაუბრუნდება“,_ამბობს კაიკაციშვილი.
იურისტის თქმით, მიღებული გადაწყვეტილებით სახელმწიფომ აღიარა როლანდ ბლადაძეს მიმართ წარსულში ჩადენილი სისტემური დანაშაული.
„სახელმწიფომ აღიარა წარსულში როლანდ ბლადაძის მიმართ დაშვებული უკანონო მოქმედებები. ეს მორიგების აქტი არის ახალი სტანდარტი და ახალი პოლიტიკა ჩვენს ქვეყანაში ქონებაჩამორთმეულთა საქმეებთან დაკავშირებით. დღევანდელი გადაწყვეტილება საკადრის პასუხს სცემს, აღმასრულებელი და სასამართლო ხელისუფლების მიერ წარსულში დაშვებულ შეცდომებს.
შესაბამისად, უზენაესი სასამართლოს დღევანდელი განჩინებით პრაქტიკულად სილა გაეწნა იმ უკანონო გადაწყვეტილების ყველა ავტორს, რომლებიც იყვნენ აღმასრულებელ და სასამართლო ხელისუფლებაში“,_ამბობს კაიკაციშვილი.
შეგახსენებთ, რომ უზენაესმა სასამართლომ როლანდ ბლადაძის საკასაციო საჩივარი, არსებითი განხილვისთვის დასაშვებად, პრეცედენტული დავის სტატუსით, 2017 წლის 15 სექტემბერს მიიღო.
