ოზურგეთის რაიონულ სასამართლოში გრძელდება საქმის განხილვა, რომელიც ერთი თვის წინ დაიწყო. საქმე ოჯახურ ძალადობას ეხება. ძალადობის მსხვერპლი ქალია. სამართალდამცავებმა მოძალადე ინფორმაციის მიღებისთანავე დააკავეს.
“გურია ნიუსი“ ამ ფაქტის შესახებ უკვე წერდა. საქმის მოსამართლეა ბიძინა სტურუა, პროკურატურას მამუკა ნადირაძე წარმოადგენს, ბრალდებულის ინტერესებს დავით მამალაძე იცავს.
ბიძინა სტურუამ ბრალდებულს კითხვით მიმართა. ის დაინტერესდა გრძნობდა თუ არა ბრალდებული თავს დამნაშავედ და აღიარებდა თუ ბრალს.
“დიახ, ვაღიარებ ჩემს დანაშაულს და ვინანიებ“, _ თქვა სასამართლო პროცესზე ბრალდებულმა.
ბრალდებულის ადვოკატმა დავით მამალაძე მოსამართლისგან პროცესის გადადება ითხოვა, რადგან შესაძლებელია მხარეებს შორის საპროცესო შეთანხმება შედგეს.
მოსამართლე ბიძინა სტურუას გადაწყვეტილებით, სასამართლო პროცესი 3 ოქტომბრისთვის გადაიდო.
“გურია ნიუსი“ ბრალდებულის დას ესაუბრა: “ჩემს ძმას და რძალს ხშირად გქონდა მცირე ოჯახური კონფლიქტი. ჩემს რძალს ვეუბნებოდი, რომ წასულიყო მისგან, მაგრამ ის მასზე იყო დამოკიდებული. ჩემი რძალი ახლა ჩემი ძმის სახლშია“.
ოჯახური ძალადობის ფაქტს უკვე მოყვა დიდი გამოხმაურება სოციალურ ქსელში. სოციალურმა სააგენტომ ოჯახიდან გაიყვანა ბავშვი, რადგან მათი მტკიცებით, დედას შვილის მოვლის უნარ-ჩვევები არ გააჩნია.
“დღეს, სრულიად შემთხვევით, ოზურგეთის ავტოსადგურში ახალგაზრდა ქალს, ლ ნ.ს. გადავაწყდი, რომელიც ისტერიულად ტიროდა. გავაჩერე, ვკითხე, რა გჭირს, რით შემიძლია დაგეხმარო-მეთქი… თავი დამანებე, შენ რას მიშველიო, კიდევ ერთხელ შევთავაზე დახმარება… ვერ ლაპარაკობდა, ყბა უკანკალებდა, საშინლად გამოიყურებოდა, საშინაო ტანსაცმელში, ფეხზე „შლოპანცებით“, განადგურებული… იქვე მძღოლი იდგა, შევეკითხე, თუ იცნობთ, იქნებ, მითხრა, რა სჭირს და დავეხმარები-მეთქი. ეტყობა, მძღოლი იცნობდა (ერთ-ერთი სოფლის მარშუტკის მძღოლი, ქალი ამ მძღოლის მეზობელია) ამ ქალს და უთხრა _ მოუყევი შენი ამბავი და დაგეხმარებაო. ქალი ოჯახში ძალადობის მსხვერპლი აღმოჩნდა, რომელსაც წლების განმავლობაში ცემდა მეუღლე“ _ ფაქტის შესახებ სოციალურ ქსელში არასამთავრობო ორგანიზაცია “ქალები რეგიონის განვითარებისთვის“ ხელმძღვანელი ქეთევან ხიდაშელი წერს.
მოგვიანებით ქეთევან ხიდაშელმა ახალი ინფორმაცია გაავრცელა სოციალურ ქსელით.
“ვერ გავამტყუნებ სოციალურს იმაში, რომ ბავშვი გაიყვანეს მინდობით, თუმცა არც იმაში ვამართლებ, რომ ქალი ასეთ მდგომარეობაში დატოვეს. ამ ქალთან დღეს ვიყავი სახლში, საშინელი მდგომარეობა დაგვხვდა _ სახლში, ფაქტობრივად, ყველა ფანჯარა ჩალეწილია, სახლში არ აქვთ სკამი, მაგიდა, ჭურჭელი, ბავშვის საწოლი…
მიკვირს სახელმწიფოს მიდგომა, რატომ აქამდე არ მოხდა მისი მდგომარეობის შესწავლა, რატომ არ ჰქონდა სოციალური შემწეობა დანიშნული, ბავშვი 4 წლის ხდება… სად არის ამ შემთხვევაში ბავშვზე ზრუნვის პროგრამა? სანამ ქალზე არ იძალადეს, მანამ რატომ ვერ შეაფასეს ბავშვის მდგომარეობა და თუ გასაყვანი იყო, რატომ მანამდე არ გაიყვანეს?
ქალს აქვს ბევრი პრობლემა, დედ-მამა ადრე გარდაეცვალა, ზრდიდა ბებია და დეიდა, სკოლაში არ უვლია, არ იცის წერა-კითხვა, აქვს განვითარებაში ჩამორჩენა (გასარკვევია, ეს ჩამორჩენა ძალადობის კვალია, თუ, ზოგადად, მძიმე ბავშვობისაგან დატოვებული კვალი, ამას მე ვერ შევაფასებ). ფაქტია, რომ გადაუდებლად სჭირდება ფსიქოლოგი და სამედიცინო გამოკვლევები, არ ენდობა არავის, ჩვენც უნდობლად გვიყურებს. გონია, რომ რამეს დავუშავებთ. მოკლედ, მდგომარეობა საგანგაშო აქვს და საჭიროებს სპეციალისტების ჩარევას“, _ წერს ქეთევან ხიდაშელი.
სოციალური მომსახურეობის სააგენტოში უკვე მოხერხდა განცხადების დაწერა, აგენტი შეისწავლის ოჯახს და შემდეგ გახდება ცნობილი ოჯახი მოხვდება თუ არა სოციალურად დაუცველთა სიაში.
სოციალური მომსახურეობის სააგენტოს გურიის სამხარეო ცენტრის უფროსის მოადგილე ვანო გოგოლაშვილი ამბობს: “ბავშვი იყო უგულებელყოფილი და აქედან გამომდინარე, მოხდა მისი წამოყვანა. ამ ეტაპზე ჩვენ, რაც ვნახეთ, დედას არ აქვს უნარი ბავშვის მოვლის. მინდა გითხრათ, რომ იქ ოჯახური კონფლიქტი იყო ცოლ-ქმარს შორის და ქმარი დაკავებულია“.
ჩვენს კითხვაზე რატომ არ მოხდა ორივეს გამოყვანა, რადგან ქალი იყო ოჯახური ძალადობის მსხვერპლი, ვანო გოგოლაშვილმა გვიპასუხა: „ვინაიდან მოძალადე ქმარი ამ ეტაპზე დაკავებულია, ოჯახში ქალის სიცოცხლეს საფრთხე არ ემუქრება. ბავშვი განთავსებულია სახელმწიფო მზრუნველობაში და დაცულია. არ მაქვს საუბარი მხოლოდ საჭმელზე და სასმელზე, რომლის პრობლემა იდგა ოჯახში. სამი წლის ბავშვია და წაიყვანენ საბავშვო ბაღში. სხვათაშორის, ხშირია შემთხვევა, როცა, მშობლები მოგვაჩეჩებენ ბავშვს და შემდეგ სახელმწიფო პატრონობს, მაგრამ ეს ფაქტი სხვაა. ეს ქალბატონი დიდ მიჯაჭვულობას იჩენს საკუთარი შვილისადმი, თუმცა, მიუხედავად სოციალური მუშაკის არაერთი რეკომენდაციისა იმის შესახებ, რომ აღნიშნული პერიოდი გამოეყენებინა საკუთარი გარემო პირობების გასაუმჯობესებლად (იგულისხმება საცხოვრებელი პირობებისა და სოციალური მდგომარეობის უკეთესობისაკენ შეცვლა), ქალბატონმა ვერ გააცნობიერა და ამ მიმართულებით ქმედითი ნაბიჯი არ გადაუდგამს. ასეთ შემთხვევაში, პრობლემების მოგვარების მიზნით, სოციალური მუშაკი განიხილავს ბავშვის ბიოლოგიურ ოჯახში დაბრუნების შესაძლებლობას. სახელმწიფო მზრუნველობაში ბავშვის განთავსებამდე სოციალური მუშაკის მუშაობას თანადგომის ქსელთან _ შეეთავაზებინა ბავშვზე მეურვეობა, შედეგი არ მოყოლია.
ჩვენი ინფორმაციით, საცხოვრებელი გარემო, რომელიც ოჯახს მოწესრიგებული არ აქვს, სოფლის ხელმძღვანელობისა და ოზურგეთის გამგეობის მხარდაჭერით არსებითად მოუწესრიგდება. ჩვენ დინამიკაში უნდა დავაკვირდეთ მოვლენებს და სოციალური მუშაკი პერიოდულად შეისწავლის ამ საკითხს. დავაწერინეთ განცხადება სოციალურ დახმარებაზე და იმედი ვიქონიოთ, კანონით გათვალისწინებული შესაბამისი პროცედურების გავლის შემდეგ, მოხვდება ამ პროგრამაში. აქვე აღვნიშნავთ, რომ სოციალური მომსახურების სააგენტო, ზოგადად, ყოველთვის ცდილობს, ბავშვი შეინარჩუნოს ბიოლოგიური ოჯახის გარემოში, დროებითი გამოყვანა არის უკიდურესი ზომა, როცა ბავშვის სიცოცხლეს საფრთხე ემუქრება“, _ გვითხრა ვანო გოგოლაშვილმა.
