ოზურგეთის საფეხბურთო გუნდი „მერცხალი“, როგორც ცნობილია, საქართველოს ჩემპიონატში, მეხუთე ლიგიდან მეოთხე ლიგაში გადავიდა და ამ ფაქტს სიხარულით შეხვდნენ გულშემატკივრები. თუმცა, ახლა როცა ახლოვდება ჩემპიონატის სეზონი _ ის სამ აპრილს იხსნება, ფეხბურთის მოყვარულთა და ზოგადად ოზურგეთელ გულშემატკივართა საკმაოდ პესიმისტური განწყობაც იგრძნობა. გულშემატკივრები ღიად გამოხატავენ უკმაყოფილებას იმის გამო, რომ თამაშის ხარისხი მაინც არაა მაღალი. ფეხბურთელთა ანაზღაურება დაბალია. დიდია გადინების პროცესი.
_„ჩოხატაურის“ გუნდში გადავიდნენ ოზურგეთელი ფეხბურთელები. იმიტომ რომ იქ ანაზღაურებაც ორჯერ მეტი მაინც არის. გუნდიც მესამე ლიგაში თამშობს. ვისი ბრალია, რა ვიცით, ჩვენ კარგ თამაშს ველოდებით. გუნდს კი ხელძღვანელობამ და ხელისუფლებამ უნდა მიხედოს, _ ამბობენ ოზურგეთელი გულშემატკივრები.
„გურია ნიუსი“ საფეხბურთო გუნდ „მერცხალის“ ხელმძღვანელს, წარსულში ცნობილ და დამსახურებულ ფეხბურთელს, ჯონი კალანდაძეს ესაუბრა.
კითხვაზე, პირველ რიგში პრობლემებზე ესაუბრა და გამოეყო უმთავრესი, თუ რა აბრკოლებს გუნდს, მან გვითხრა:
_პრობლემები რომ არსებობს, ეს იმას არ ნიშნავს, რომ არ ვმუშაობთ ან არ გვეხმარებიან. გეცოდინებათ, ალბათ, ადრე ადგილობრივი მუნიციპალიტეტი აფინანსებდა გუნდს. მერე აუკრძალეს და ეს უფლება „ფხბურთის განვითარების“ ფონდს გადასცეს. ეს ფონდი კი აფინანსებს გუნდს, რაც 120 ათას ლარს შეადგენს, თუმცა ეს არაა საკმარისი. სპონსორის მოძებნაც ჭირს. როცა გუნდი მეოთხე ლიგაშია, არაა დიდი ინტერესი. არადა, ბიჭები, ჩვენი ფეხბურთელები მართლაც თავდაუზოგაგავად იბრძვიან. ისე კი, პირველ რიგში ინფრასტრუქტურაა მოსაწესრიგებელი. ლაშეს მოედანს ეხება ეს. ასევე გადმოგვეცა ბოხვაურის სტადიონი ჩვენს მმართველობაში. ოზურგეთის მუნიციპალიტეტის მერია ნამდვილად გვიწევს დახმარებას და გვერდში გვიდგას, რაც შეუძლია. თუმცა მას დაფინანსების უფლება აღარ აქვს. რვა საბავშვო ჯგუფი გვყავს, 7-დან 17 წლამდე ასაკის და მათ ნამდვილად დიდ ყურადღებას უთმობს პირადად მერი. მინდა ეს აღვნიშნო. ეს დაეტყო კიდეც საქმეს. საქართველოს პირველობაზე ბავშვთა ჩემპიონატზე ოთხი გუნდით გავდივართ ახლა, ადრე სამი გუნდით ძლივს ხერხდებოდა.
_ბატონო ჯონი, გულშემატკივრებისგან ძალიან ბევრი საყვედური ისმის, რომ ოზურგეთის „მერცხალი“ თითქმის კარგად მოთამაშე ფეხბურთელების უმეტესობამ დატოვა. რა ხდება?
_კი, ისმის ასეთი კითხვები. ვიცი, მაგრამ რატომ გაჩერდება ფეხბურთელი, თუ უკეთეს პირობებს ნახავს? ყველგან ასეა ეს, დიდ ფეხბურთში თუ დაბალ დონზე. ახლახან მეკარე, ირაკლი მურუსიძე წავიდა. ძალიან ძლიერი იყო. ოჯახი შექმნა და გერმანიაში გადავიდა საცხოვრებლად. დაანება ფეხბურთს თავი. ეს არის უდიდესი დარტყმა. მეკარე არის თამაშის წამყვანი, ნახევარი გუნდის ტოლფასია კარგი მეკარე, პირობითად რომ ვთქვათ, მეორე მწვრთნელია მოედანზე. რა თქმა უნდა, ახალი გაიზრდება, გაიწვრთნება, მაგრამ ამას დრო სჭირდება. ასეა, სხვადასხვა ფაქტორები ახდენს გავლენას საერთო შედეგზე. მურუსიძემ 18 თამაშში მხოლოდ 3 ბურთი გაუშვა და აქედან ორი თერთმეტმეტრიანი საჯარიმო დარტყმა იყო. მოკლედ, ძნელია კარგი ფეხბურთელის გასვლა გუნდიდან, მაგრამ ეს რეალობაა. კარგი ფეხბურთელი რომ მოიყვანო, დაფინანსება უნდა იყოს კარგი. საამისოდ სპონსორი გვჭირდება. ჯერჯერობით კი ვერ ვიპოვეთ. ვეძებთ კი…
_ფეხბურთელების ხელფასი თვეში რამდენია, საშუალოდ?
_ხელფასს მწვრთნელი ადგენს, ეს ძირითადად თამაშის მიხედვით ხდება. 300-400-500 ლარის ოდენობით არის, საშუალოდ…
_და ასეთი ხელფასით როგორ ითამაშებს ფეხბურთელი?
_ხომ ვამბობ, არის ასეთი პრობლემა, თუმცა თამაშზე და საკუთარ გუნდზე შეყვარებული სპორტსმენი ანაზღაურების გარეშეც ითამაშებს. კარგადაა საქმე, როგორც გითხარით ბავშვთა ფეხბურთში. ადრე ასი ბავშვი ვარჯიშობდა და ახლა სამასი ბავშვი ვარჯიშობს. ეს კი მუნიციპალიტეტის მერიის დამსახურებაა. თან იმის დასტურია, რომ ფეხბურთის მომავალზე ზრუნვა დიდია. უცებ არ ჩნდება კარგი მოთამაშე. ამას დრო, მოტივაცია და თავისებური ქარიზმაც სჭირდება.
-და მაინც სამომავლოდ რას ფიქრობთ? მალე სეზონი იწყება…
_ახლა, მთლად ისე არაა ჩვენი საქმე, „ვაი, რა ვქნათო“, რომ ვთქვათ. ასეთ მდგომარეობაში იმიტომ ვართ, რომ მუნიციპალიტეტებს აუკრძალეს ფეხბურთის დაფინანსება. არსებობს გამოსავალი – ისევ უნდა მისცენ დაფინანსების უფლება. სასიამოვნო წინადადება გაჟღერდა ახლახან სამთავრობო დონეზე, რომ ქალაქების მერებს უნდა მიეცეს უფლება, სპორტის განვითარების მიმართულებით ჰქონდეთ ბიუჯეტი. ვფიქრობ, რაღაც ცვლილება იქნება. იმედი უნდა ვიქონიოთ. თუ სპონსორსაც ვიპოვით, მთლად კარგი…ჩვენს ფეხბურთელებს, რაც შეუძლიათ , თავს არ ზოგავენ. ახლაც მორიგი ვარჯიშია, სტდიონზე არიან…იმედი უნდა ვიქონით, რომ ჩვენი „მერცხალი“ მოიყვანს გაზაფხულს, გახდება ასეთი გუნდი…სურვილი და მონდომება დიდია და გვჯერა, ასე იქნება. წარსული დიდება ხომ გვახსოვს?
ავტორი
