რამდენიმე დღის წინ ავღანეთის მმართველობაში მოსულმა “თალიბანის“ დაჯგუფებამ აშშ–სა და მის ნატოელ მოკავშირეებს ერთგვარი ულტიმატუმი წაუყენა, – ქაბულის აეროპორტიდან ყოველგვარი საევაკუაციო მოქმედებები მიმდინარე წლის 31 აგვისტოსათვის დაესრულებინათ. წინააღმდეგ შემთხვევაში თავიანთ მომდევნო ქმედებებზე პასუხს არ აგებდნენ.
ექსტრემისტული დაჯგუფების მუქარის თუ შეეშინდათ და გუშინ რიგმა ქვეყნებმა ქაბულიდან უკანასკნელი ავიარეისები შეასრულეს.
თავდაპირველად ოფიციალური განცხადება კანადურმა მხარემ გაავრცელა.
„იმდენ ხანს დავრჩით ავღანეთში, რამდენიც რეალურად შეგვეძლო. სამწუხაროდ არ გვაქვს შესაძლებლობა გადავარჩინოთ ყველა ის ავღანელი რომლებიც წლების განმავლობაში ჩვენს გვერდით იდგა. ძალიან ვწუხვართ“, – განაცხადა კანადელმა გენერალმა უეინ ეირმა.
გუშინ უკანასკნელი საევაკუაციო მოქმედებები განახორციელა ბელგიამ, დანიამ და ნიდერლანდებმა. ფრანგული მხარე კი ადამიანების გამოყვანას ოფიციალურად დღეს დაასრულებს.
გუშინ ინციდენტი შეემთხვა იტალიის სამხედრო თვითმფრინავს. ტელეარხი „Al Arabiya”- ს მტკიცებით ამ ქვეყნის კუთვნილ თვითმფრინავს უცნობმა პირებმა ესროლეს. ადგილზე მყოფი სამხედროების თქმით, დაბომბვისას თვითმფრინავი არ დაზიანებულა.
საინტერესოა რომ ორი დღის წინ უცნობმა ადამიანებმა უკრაინის კუთვნილი თვითმფრინავი მოიპარეს, ხალხით გაავსეს, აფრინდნენ და ირანის დედაქალაქ თეირანში ჩაფრინდნენ. ასევე გუშინ, მავანმა და მავანმა რუსული სამხედრო ვერტმფრენის გატაცება სცადა. საბედნიეროდ არ გამოუვიდა და რუსმა სამხედრო მოსამსახურეებმა ვერტმფრენი შედარებით უსაფრთხო ადგილას გადაიყვანეს.
გუშინ ნიდერლანდურმა მასმედიამ გაავრცელა ინფორმაცია რომ აეროპორტის მისადგომებთან თალიბებმა ავტობუსი გააჩერეს სადაც ნიდერლანდებში გამგზავრების მსურველი ადამიანები იმყოფებოდნენ. რამდენიმე მათგანს საემიგრაციო საბუთები წესრიგში არ ჰქონდა. თალიბებმა მათ ავტობუსი დაატოვებინეს და გაურკვეველი მიმართულებით წაიყვანეს.
ავღანეთის დატოვების მსურველებს თალიბების გარდა წინააღმდეგობას აშშ-ის საზღვაო ქვეითებიც უწევენ. „სი-ენ-ენის“ ცნობით, აშშ-ში მცხოვრებმა ავღანური ფესვების მქონე ბიზნესმენებმა თანამემამულეთა ნაწილის ქაბულიდან გამოსაყვანად სპეციალური თვითმფრინავი დაიქირავეს. აეროპორტში ავღანელები თვითმფრინავში ამერიკელმა საზღვაო ქვეითებმა არ შეუშვეს. საბოლოოდ ქაბულის დატოვება 345 ადამიანის ნაცვლად მხოლოდ 50-მა მოახერხა.
პენტაგონის მონაცემებით, ქაბულის აეროპორტიდან ევაკუაციას 10 ათასზე მეტი ადამიანი ელოდება. ევაკუაცია 42 სამხედრო თვითმფრინავით ხორციელდება, რომლებიც ქაბულის აეროპორტიდან ყოველ 39 წუთში ფრინდებიან. ეს პროცესი საბოლოოდ 31 აგვისტოს დასრულდება.
ამასობაში „თალიბანმა“ პირველი „კლანჭები“ გამოაჩინა. „თალიბანის“ ახალი მმართველობის პირობებში მუსიკა კვლავ აკრძალული იქნება, – ამის შესახებ „თალიბების“ პრესსპიკერმა ზაბიჰულა მუჯაჰიდმა „New York Times“-თან ინტერვიუში განაცხადა.
„ისლამი კრძალავს მუსიკას. ვიმედოვნებთ, რომ ადამიანებს არ ვაიძულებთ, არამედ დავარწმუნებთ, რომ არ გააკეთონ ის, რაც აკრძალულია,“- აღნიშნა ზაბიჰულა მუჯაჰიდმა.
გუშინ, დღის მეორე ნახევარში გერმანიის თავდაცვის მინისტრმა ანეგრეტ კრამპ-კარენბაუერმა განაცხადა რომ მათ ხელში არსებული ინფორმაციით, ქაბულის აეროპორტში ტერორისტული თავდასხმის საფრთხე რეალური გახლდათ.
ქაბულის აეროპორტში მოსალოდნელი ტერაქტის თემას დიდი ბრიტანეთიც გამოეხმაურა. ამ ქვეყნის თავდაცვის მინისტრის მოადგილემ ჯეიმს ჰეპიმ სპეციალური პრესკონფერენცია მოიწვია და თითქმის იგივე გააჟღერა რაც მისმა გერმანელმა კოლეგებმა.
გაფრთხილება რომ რეალური იყო განცხადებიდან რამდენიმე საათში დადასტურდა. ქაბულის აეროპორტის შესავლელთან თვითმკვლელმა ტერორისტმა თავი აიფეთქა.
თავდაპირველად „თალიბანის“ წარმომადგენლების ცნობით დაღუპული იყო 11 ადამიანი, მათ შორის უცხოეთის მოქალაქეები და ბავშვები. დაშავებულები არიან „თალიბანის“ წევრებიც.
მოგვიანებით უფრო დაზუსტებული ინფორმაცია ტელეკომპანია „BBC“-იმ გაავრცელა. აეროპორტთან ორი აფეთქების შედეგად დაღუპულთა რიცხვი 60-მდე გაიზარდა, დაჭრილი კი 140-მდე ადამიანია.
ორი აფეთქება მაშინ მოხდა, როდესაც ამერიკელი სამხედროები და მათი მოკავშირეები ქვეყნიდან უცხოელი მოქალაქეებისა და ავღანელების ნაწილის ევაკუაციას აგრძელებდნენ. ორ აფეთქებას შეეწირნენ ამერიკელი სამხედროებიც.
„ფოქს ნიუსის“ ცნობით, გარდაიცვალა ცამეტი ამერიკელი საზღვაო ქვეითი. პენტაგონში ამერიკელი ჯარისკაცების დაღუპვას ადასტურებენ, თუმცა მათ ზუსტ რიცხვს არ ასახელებენ.
მომხდარ თავდასხმაზე პასუხისმგებლობა ტერორისტულმა დაჯგუფება „ისლამურმა სახელმწიფომ“ აიღო, – ამის შესახებ ინფორმაციას BBC და სააგენტო „ფრანს პრესი“ ავრცელებენ.
მათივე ცნობით, შესაბამისი განცხადება „ტელეგრამზე“ გავრცელდა. დაჯგუფების თქმით, თვითმკვლელმა ტერორისტმა ე.წ. შაჰიდის ქამარი აამოქმედა.
მოგვიანებით ქაბულში კიდევ რამდენიმე აფეთქება მოხდა. ტელეარხი “CBS“-ის მტკიცებით ავღანეთის დედაქალაქში საერთო ჯამში ექვსი აფეთქება დაფიქსირდა. გარდაცვლილთა რაოდენობამ 90-ს მიაღწია, დაჭრილთა რიცხვი კი 150 გახლდათ.
[sexy_author_bio]
