ლანჩხუთის საკრებულოს უმრავლესობამ მხარი დაუჭირა მიმდინარე წლის მთავარ საფინანსო დოკუმენტში ცვლილების გახორციელებას. მერიის საფინანსო სამსახურის უფროსის, როლანდ ლაშხია განმარტებით, საქართველოს მუნიციპალური განვითარების ფონდსა და ლანჩხუთის მუნიციპალიტეტს შორის გაფორმებული ხელშეკრულების ფარგლებში აღებული სესხის სარგებლობის პროცენტის გადახდის უზრუნველყოფისთვის 77 ათასი ლარია საჭირო, რომელიც გასულ წელს ნაგავმზიდისა და ურნების შესაძენადაა აღებული. ირკვევა, რომ მუნიციპალიტეტმა საამისოდ გასულ წელს სესხად 387 ათასი ლარი აიღო და ახლა ვალის სრულად დასაფარად 10 წლის განმავლობაში, ყოველწლიურად 77 ათასი ლარის გადახდა მოუწევს.
ნაგავმზიდებისა და ურნების შეძენაზე კი ჰქონდათ ინფორმაცია ლანჩხუთის საკრებულოში, თუმცა, ყოველწლიურად თუ მსგავსი ფინანსური ხარჯის გაღება იქნებოდა საჭირო, ზოგისთვის „ახალი აღმოჩენა“ აღმოჩნდა.
„ყოველწლიურად ადგილობრივმა ბიუჯეტმა MGF-ს უნდა უხადოს 77 ათასი ლარი. ჯერ რა უბედურებაა ბიუჯეტის ფულის მიპროცენტება საბიუჯეტო ორგანიზაციისთვის და მერე ამხელა პროცენტი.100% -ით „ქართუ ბანკის”განაკვეთია?! “ _ ცხარობდა დეპუტატი კახა ასკურავა, რომელიც მაშინაც დეპუტატის მანდატით სარგებლობდა, როცა როცა საკრებულომ ნაგავმზიდების საკითხი განიხილა და უსასყიდლოდ სარგებლობის უფლებით დასუფთავების სამსახურს გადასცა. თუმცა, ასკურავას თქმით, მაშინ არც პროცენტებზე ყოფილა საუბარი და არც სხვა რამე პირობებზე.
საქართველო რეგიონული განვითარებისა და ინფრასტრუქტურის სამინისტროს განმარტებით, ეს გახლავთ EBRD – ის სესხი, 10 000 000 ევროს ოდენობით, რომელიც საქართველომ აიღო ნაგავმზიდებისა და ურნების შესაძენად. მუნიციპალური განვითარების ფონდმა უბრალოდ განახორციელა მათი ერთიანი შესყიდვა.
