ბოლო დროს ესპანური „ვალენსია“ ღრმა კრიზისში იმყოფება. კლუბს ვერც გიორგი მამარდაშვილის ჩინებული თამაში შველის. გუნდს, სეზონის განახლების შემდეგ გამარჯვება ჯერ არ მოუპოვებია და გასავარდნ ზონას მხოლოდ 3 კინკილა ქულით უსწრებს.
რასაკვირველია „ვალენსიას“ გულშემატკივრები შეშფოთებული არიან და ბოლო დღეების განმავლობაში, სხვადასხვა სოციალურ ქსელში გუნდის ამჟამინდელი მთავარი მწვრთნელი ჯენარო გატუზოს დათხოვნას ითხოვენ, რომელმაც გუნდი გასული წლის ზაფხულში ჩაიბარა, როდესაც ხოსე ბორდალასი შეცვალა. ამის გარდა დღის წესრიგში რჩება კლუბის მფლობელის, პიტერ ლიმის გადადგომა და მის მიერ გუნდის გაყიდვა.
გუშინ, ესპანურმა გამოცემამ „Marca“ წერილი გამოაქვეყნა იმ მოთამაშეებზე, რომელთა მომდევნო ტრანსფერი მინიმუმ 100 მილიონ ევროდაა მოსალოდნელი.
სიაში ხვიჩა კვარაცხელიაც არის ნახსენები.
„ქართველი ევროპული ფეხბურთის ერთ-ერთი სენსაციაა, ისევე, როგორც მისი „ნაპოლი“. კვარაცხელიას სტატისტიკა (9 გოლი და 10 საგოლე პასი) და მწვანე მოედანზე ნაჩვენები სენსაციური თამაში გვაფიქრებინებს, რომ ქართველი შემტევი უახლოეს მომავალში მსოფლიო დონის გუნდში მოხვდება. იურგენ კლოპმა მაგალითად ჩემპიონთა ლიგის მატჩის შემდეგ ის უკვე შეაქო. თუმცა, „ნაპოლის“ სასარგებლოდ სამი ფაქტორია: ხანგრძლივი კონტრაქტი (2027 წლამდე, 2028 წლამდე მოსალოდნელი განახლებით), ფეხბურთელის სურვილი ზრდა ნეაპოლში გააგრძელოს და აურელიო დე ლაურენტისი! სამხრეთული კლუბის ხელმძღვანელთან მოლაპარაკება არც ისე ადვილია“, – დაწერა ესპანურმა გამოცემამ.
გუშინ, „უდინეზეს“ სკაუტმა რობერტო პოლიკანომ საინტერესო განცხადება გააკეთა და წარსული გაიხსენა.
„2018 წელს ჩვენ უკვე ვაფასებდით „უდინეზეში“ ხვიჩა კვარაცხელიას მოყვანას, მაგრამ ვერ მოვახერხეთ ტრანსფერის დარეგისტრირება, რადგან არაევროკავშირელის ადგილი თავისუფალი არ გვქონდა. ნიჭი მაშინაც შესამჩნევი იყო. „ნაპოლიმ“ მასზე ფსონი სწორად გააკეთა და ვულოცავ ბიჭსაც, რომელმაც თავი ძალიან კარგად და თავმდაბლობით წარმოაჩინა“.
მიმდინარე სეზონში „ნაპოლის“ წარმატებულ ასპარეზობას შეეხო ახლო წარსულში ცნობილი იტალიელი ფეხბურთელი კრისტიან ვიერი, რომელმაც ხაზი გაუსვა იმას, რომ მიმდინარე სეზონში კლუბის პრეზიდენტი აურელიო დე ლაურენტისი ჩუმადაა და არაფერს ამბობს.
„წლის ევოლუცია არის დე ლაურენტისის ჩუმად ყოფნა მთელი სეზონის განმავლობაში. ეს არის სპალეტის მთავარი მიღწევა „ნაპოლიში“, რადგან მან მოახერხა დე ლაურენტისის გაჩუმება. ყოველთვის, როცა დე ლაურენტისი საუბრობდა, კატასტროფა იყო და სამაგიეროდ, ახლა სიტყვას არ ამბობს“, – განაცხადა ვიერიმ, რომელსაც მხედველობაში ჰქონდა დე ლაურენტისის საშინლად მძიმე ხასიათი, რომელიც „ნაპოლიში“ არაერთმა ცნობილმა მწვრთნელმა საკუთარ თავზე იწვნია.
ამ დღეებში უეფას აღმასკომი შესარჩევ ციკლში ცვლილებების განსახილველად შეიკრიბება. ცვლილებების აუცილებლობა თავისთავად დააყენა დღის წესრიგში მსოფლიოს 2026 წლის ჩემპიონატის მონაწილეთა 48-მდე გაზრდამ.
„მუნდიალი – 2026“-ზე ევროპას 16 ადგილი ეკუთვნის. განიხილება პროექტი, რომლის მიხედვითაც შეიქმნება 12 ჯგუფი – თითოეულში 4-5 გუნდით. ამათგან 12 პირველადგილოსანი ავტომატურად მოხვდება აშშ-კანადა-მექსიკის მუნდიალზე, ხოლო დანარჩენ კვოტას მეორეადგილოსნებისგან პლეი-ოფით გამოვლენილი 4 გუნდი შეავსებს.
გუშინ, ცნობილი გახდა რომ ინგლისის პრემიერლიგური „ევერტონის“ მფლობელმა, ფარჰად მოშირიმ გუნდის გაყიდვა გადაწყვიტა და იმ შეთავაზებას დასთანხმდება, თუ მასში 500 მილიონზე მეტ ფუნტს გადაუხდიან.
საინტერესოა რომ მოშირი არ აპირებს ბოლომდე შეელიოს კლუბს. ის შეთავაზების მიხედვით გადაწყვეტს, გუნდის მცირე წილს შეელევა თუ დიდს.
„ევერტონის“ რთულ მდგომარეობას ისიც დაემატა, რომ გუნდი უმწვრთნელოდაა. ფრენკ ლამპარდის გათავისუფლების შემდგომ, არგენტინელმა მარსელო ბიელსამ მათ შეთავაზებაზე უარი განაცხადა. კლუბი ეძებს ისეთ მწვრთნელს, რომელიც მათ რთული მდგომარეობიდან გამოიყვანს.
20 ტურის შემდგომ, „ევერტონი“ 15 ქულით გასავარდნ ზონაში, მე-19 ადგილზე იმყოფება.
ავტორი
