გუშინ, კატარის მუნდიალზე პირველი ფინალური მატჩის მონაწილე გამოვლინდა. არგენტინის ეროვნულმა გუნდმა ხორვატია დაამარცხა – 3:0 და მსოფლიო ჩემპიონატის გადამწყვეტ შეხვედრაში საფრანგეთი – მაროკოს დაპირისპირების გამარჯვებულს შეხვდება. სამხრეთამერიკელთა კაპიტანი ლეო მესი თავისი კარიერის უპირველეს მიზანს ძალიან მიუახლოვდა.
გუშინ, მაროკოს ნაკრების მთავარმა მწვრთნელმა ვალიდ რეგრაგიმ საფრანგეთის ნაკრებთან მატჩამდე პრესკონფერენცია გამართა და განაცხადა რომ მუნდიალის ფინალში გასვლა უნდა.
„რაც უფრო წინ მივიწევთ, მით უფრო რთულდება მატჩები. მსოფლიოს ჩემპიონთან ვითამაშეთ, რომელსაც საუკეთესო მწვრთნელი ჰყავს. თუმცა, ჩვენც გვაქვს დიდი ამბიცია, რომ სიურპრიზი მოვაწყოთ და გავაკეთოთ ის, რაც ვიცით.
ჰაკიმი მბაპეს ჩემზე უკეთ იცნობს. არ ვაპირებთ მბაპეს წინააღმდეგ გეგმის შედგენას. ჰაკიმი დიდი ჩემპიონია, ერთ–ერთი საუკეთესო თავის პოზიციაზე, მასთან ერთად ვარჯიშობს ყოველდღე და ამიტომ, ამაზე არ ვნერვიულობ. აქ იმისთვის ვართ, რომ ჩვენი კონტინენტის მენტალიტეტი შევცვალოთ. ნახევარფინალში ვართ, მაგრამ ფინალში გასვლაც გვინდა. ბევრი ტრავმირებულია გუნდში, მაგრამ მაღალი დონის სამედიცინო პერსონალი გვყავს და აღდგენა კარგად მიმდინარეობს.
ჩვენს ძალებში დარწმუნებული ვართ და ისე ვაპირებთ თამაშს, როგორც ვიცით. ორმაგი მოქალაქეობა მაქვს, საფრანგეთში დავიბადე და ჩემთვის იქ თამაში პატივი და სიამოვნება იყო, მაგრამ ეს ფეხბურთია. საფრანგეთთან, ბრაზილიასთან და ა.შ. მხოლოდ გამარჯვება მინდა. ფინალში გასვლა და გამარჯვება გვინდა, ამ მიზნის მისაღწევად მზად ვართ ყველაფერი გავაკეთოთ. ნახევარფინალში გასვლით არ უნდა დავკმაყოფილდეთ. გვინდა გავიმარჯვოთ აფრიკისთვის, ყველასთვის, ვინც ამაზე ყოველთვის ოცნებობდა. ბევრი წარმატებად მიიჩნევს ნახევარფინალს, მაგრამ მე არ ვეთანხმები. რატომ არ უნდა გავიდეთ ფინალში? არ გვინდა მომდევნო შანსს კიდევ 40 წელი ველოდოთ. მშივრები ვართ და არ დავღლილვართ“, – განაცხადა ვალიდ რეგრაგიმ.
წარმატების დიდი სურვილი გააჩნია საფრანგეთის ეროვნული გუნდის მთავარ მწვრთნელ დიდიე დეშამსაც.
„მაროკოს ნაკრებს ტურნირზე საუკეთესო დაცვა ჰყავს და მათ წინააღმდეგ გამოსავალი ჯერჯერობით ვერავინ იპოვა. თუმცა, ვიმედოვნებ, რომ ჩვენ ვიპოვით. მაროკო მხოლოდ დაცვითი გუნდი რომ იყოს, ნახევარფინალში არ იქნებოდა. ძალიან ორგანიზებული გუნდია და კარგი თავდამსხმელები ჰყავს. როდესაც შეტევაში მიდიან, ძალიან ეფექტიანები არიან“, – განაცხადა დიდიე დეშამმა.
საინტერესოა, რომ ლონდონის „ჩელსისა“ და მაროკოს ნაკრების ნახევარმცველი ჰაკიმ ზიეში თავისი ქვეყნის ეროვნულ გუნდში განსაკუთრებული პირობით თამაშობს. 29 წლის ფეხბურთელს ამ დრომდე მაროკოს ნაკრებში თამაშით გამომუშავებული არცერთი დოლარი აუღია და თანხას სრულებით ქველმოქმედებას ახმარს – უნაწილებს გუნდის თანამშრომლებსა და გაჭირვებულ ოჯახებს მაროკოში.
გუშინ, ახლო წარსულში, ბრაზილიის ნაკრების ლეგენდარულმა თავდამსხმელმა, რონალდომ, ჟურნალისტებს ნეიმარის შესახებ ესაუბრა.
„ნეიმარი ძალიან გულდაწყვეტილია. მაგრამ დარწმუნებული ვარ, ის დაბრუნდება უფრო ძლიერი და გააგრძელებს ბრაზილიის ნაკრებში თამაშს. ჯერ კიდევ ახალგაზრდაა და მომავალ მსოფლიო ჩემპიონატზეც ვიხილავთ. ვამაყობ მისით. ნეიმარი ბრაზილიისთვის თამაშობს. განსაკუთრებით მომეწონა ბოლო ექვსი თვის განმავლობაში. შესანიშნავი იყო. მუნდიალზე კარგი პირველი მატჩი ჩაატარა, შემდეგ ტრავმა მიიღო, მაგრამ ტკივილებით მაინც თამაშობდა“, – განაცხადა რონალდომ.
პორტუგალიის ნაკრების დამარცხების შემდეგ მაროკოელმა კომენტატორმა კრიშტიანო რონალდოზე ისაუბრა და მის მიმართ უდიდესი პატივისცემა გამოამჟღავნა.
„კრიშტიანო, ერთ რაღაცას გეტყვი. შენ ხარ ისტორია, ლეგენდა, გაქვს ლამაზი წარსული და საოცარი აწმყო. შენ პორტუგალიისა და მსოფლიოს საუკეთესო ფეხბურთელი ხარ“- დაამშვიდა პორტუგალიელი მაროკოელმა კომენტატორმა.
არგენტინელი „TyC Sports“-ის ჟურნალისტმა ესტებან ედულმა ლიონელ მესისა და ნიდერლანდელი ვოუთ ვეგჰორტსის დაპირისპირება დეტალურად გაიხსენა.
„მატჩის შემდეგ ყველა კამათობდა გასახდელში და არა მხოლოდ მესი. ვან დეიკი თავს დაესხა ოტამენდის. ეს ჰგავდა „ლანუსი“ – „ბანფილდის“ ან „ნიუელსი“ – „როსარიო სენტრალის“ დერბის. მესის გაბრაზება ძირითადად პენალტების სერიას ეხებოდა, როცა ჰოლანდიელები არგენტინელებზე ზეწოლას ცდილობდნენ. ვეგჰორსტი მას გვირაბში ელოდა, მესის მიუახლოვდა და მაისური სთხოვა. ლეო გაბრაზდა. ვეგჰორსტმა ვერ გაიგო და გაჩერდა, ლეომ მისი შეურაცხყოფა დაიწყო ჯერ კიდევ ინტერვიუს დაწყებამდე. მესი ინტერვიუს დროს ოდნავადაც არ მაქცევდა ყურადღებას. ისეთი გაბრაზებული იყო, არც მიყურებდა და არც ჩემს კითხვებს უსმენდა. მე მას ვკითხე მოლინას საგოლე გადაცემის შესახებ, ვან გაალთან დაპირისპირებაზე, მაგრამ არაფერი. ვერ მოვახერხე პასუხის მიღება. ერთ მომენტში, როცა ეთერში ვიყავით, ვუთხარი: „დამშვიდდი ლეო, აქ ფიფადან ბევრი ხალხია და არასოდეს იცი რა შეიძლება მოხდეს“, – განაცხადა „Ole“-სთან ინტერვიუში ესტებან ედულმა.
გუშინ, ესპანეთის ნაკრების ყოფილმა მწვრთნელმა ლუის ენრიკემ ვრცელ ინტერვიუში ბევრ საინტერესო თემაზე ისაუბრა.
„ცხადია, რომ მაროკოს წინააღმდეგ კარგად ვერ ვითამაშეთ, მაგრამ მე მაინც დადებით ასპექტებს ვუყურებ. ახლა მშვიდად ვარ და კმაყოფილი ვარ იმით, რაც გავაკეთეთ. დე ლა ფუენტე ძალიან კარგი არჩევანია, რომლის მჯერა, ის ამ სამსახურისთვის მზადაა.
ვგრძნობ, რომ ხელიდან შესანიშნავი შანსი გავუშვით. ნახევარფინალისტებს შორის ჩვენზე უკეთეს გუნდს ვერ ვხედავ. პაბლო სარაბიასთვის უფრო მეტი შანსი უნდა მიმეცა, მასთან მიმართებაში უსამართლოდ მოვიქეცი. 26-კაციანი განაცხადიდან 25 ფეხბურთელს არ შევცვლიდი, მხოლოდ ერთ ცვლილებას გავაკეთებდი, მაგრამ ახლა ვერ გეტყვით ფეხბურთელის სახელს. მაროკომ ჩვენს წინააღმდეგ დაცვითი ფეხბურთი ითამაშა და ვერ შევძელით მათი დამარცხება. გუნდს, რომელიც არ უტევს, შეუძლია თამაშის მოგება, ამიტომ, ყველაფერი შეიძლება მოხდეს.
ნახევარფინალებს და ფინალს ვუყურებ და ვისიამოვნებ. მინდა, რომ ლეო მესიმ მოიგოს იმის გამო, რასაც მესი ფეხბურთში ნიშნავს. არ მინდა, რომ ხორვატია–საფრანგეთის ფინალი განმეორდეს, მაროკო თუ მოიგებს, ჩვენთვის მძიმე დარტყმა იქნება.
ყველაზე დიდი სიურპრიზი? უნაჰი, მაგრამ ასევე ამრაბატი. მაროკოს ოთხი ძალიან ძლიერი ფეხბურთელი ჰყავს. პედრი? ის ჩემთვის ჰარი პოტერია, ყველაზე ახლოს ინიესტასთან.
მინდა კარიერა საკლუბო ფეხბურთში გავაგრძელო, რათა განვავითარო ის, რაც ეროვნულ ნაკრებში გავაკეთე. ეს იყო ოცნება, მაგრამ ეს ეტაპი დასრულდა. დაველოდები შემდეგი სეზონის დაწყებას. „სელტაში“ დაბრუნება? ვინ იცის, იქ მშვენიერი მოგონებები მაქვს“, – განაცხადა ლუის ენრიკემ.
ახლო წარსულში ცნობილმა გერმანელმა ფეხბურთელმა იურგენ კლინსმანმა გამოთქვა მოსაზრება, თუ რატომ გააფუჭა ჰარი კეინმა მეორე თერთმეტმეტრიანი საფრანგეთის წინააღმდეგ.
„VAR“-ის შემოწმების დროს ძალიან ბევრი დრო გადის. ამ დროს ეს შენს ტვინზე ზეგავლენას ახდენს. ჰარი კეინის დიდი ფანი ვარ. ბურთის ჩაგდებისა და გადაწყვეტილების სწრაფად მიღების საშუალება რომ ჰქონოდა, გოლს გაიტანდა, მაგრამ რაც დროს გადის, ძალიან ბევრს ფიქრობ“.
„ფორმულა 1“-ის შვიდგგზის ჩემპიონმა ლუის ჰამილტონმა ჰარი კეინსა და ინგლისის ნაკრებს მხარი დაუჭირა.
„ძმაო, ჩვენ შენით ვამაყობთ! თავი მაღლა ასწიე. შესანიშნავი სამსახური გასწიე. მადლობა, რომ ჩვენს სამშობლოს წარმოადგენ. მოდი, ვაჩვენოთ მათ ჩვენი სიყვარული და მხარდაჭერა. ჩვენ ხომ მათით ამაყი ვართ. ჩვენ გამარჯვება გვსურდა, თუმცა ფეხზე წამოვდგებით და კიდევ ვიბრძოლებთ“, – განაცხადა ლუის ჰამილტონმა.
გუშინ, გავრცელდა ინფორმაცია კატარში, მსოფლიოს ჩემპიონატის მიმდინარეობისას კიდევ ერთი ჟურნალისტის გარდაცვალების შესახებ.
როგორც გაირკვა, 65 წლის როჯერ პირსი, 21 ნოემბერს, აშშ–სა და უელსის ნაკრებთა შეხვედრის დაწყებამდე ცოტა ხნით ადრე გარდაიცვალა. თუმცა, მაშინ ეს ამბავი არ გახმაურებულა და მხოლოდ ახლა გახდა ცნობილი.
„ნამდვილად სამწუხაროა ჩემი მეგობრისა და „ITV Merdian“-ის ჟურნალისტის როჯერ პირსის გარდაცვალება. ის კატარში მუშაობის დროს გარდაიცვალა. ხუთ კვირაში პენსიაზე უნდა გასულიყო“, – დაწერა სოციალურ ქსელებში „BBC“-ის რეპორტიორმა ნილ სტეინსბიმ.
ბოლო დღეებში კატარში ჟურნალისტი გრენტ უოლი და ფოტორეპორტიორი ხალიდ ალ მისლამიც გარდაიცვალნენ.
ავტორი
