9 ივლისს იწურება იმ დავალიანების დაფარვის ვადა, რომელიც ფიფას ვერდიქტის საფუძველზე დაეკისრა საფეხბურთო კლუბ ლანჩხუთის “გურიას”. კერძოდ, საუბარია ერთ-ერთი ბრაზილიური კლუბის სასარგებლოდ 40 500 ევროს, ხოლო ფიფასთვის ხუთი ათასი შვეიცარული ფრანკის გადახდაზე.
შეგახსენებთ, რომ საქმე ეხება 2016 წელს ლანჩხუთურ კლუბში მოთამაშე ბრაზილიელ ლეგიონერს, რომლის აღმზრდელმა კლუბმაც მიმართა ფიფას საჩივრით და “გურიასგან”, საფეხბურთო წესდების დარღვევის სანაცვლოდ, კომპენსაციის გადახდა მოითხოვა.
აღნიშნული სკანდალი ბრაზილიური Friburguense atletiko clube-ის აღზრდილის ოლივეირა სილვას “გურიაში” სულ რამდენიმედღიან მოღვაწეობას მოჰყვა. მართალია, ის მალე სხვა კლუბში გადავიდა, მაგრამ დავა ბრაზილიურ კლუბს სწორედ “გურიასთან” აქვს. მოტივი კი მარტივია _ იქედან გამომდინარე, რომ “გურიაში” ეს იყო სილვას პირველი პროფესიონალური კონტრაქტი, მის გამზრდელ კლუბს საკომპენსაციო თანხა ერგებოდა. თუმცა, ამის თავიდან ასაცილებლად ტრანსფერის გაფორმებამდე ისიც შეიძლებოდა, რომ “გურიას” მესვეურებსა და ბრაზილიურ კლუბს შორის ურთიერთშეთანხმება შემდგარიყო.
რადგან ასე არ მოხდა, სასამართლომ ლანჩხუთური მხარე გაამტყუნა და ისედაც ვალებში მყოფ კლუბს მორიგი ფინანსური თავსატეხი გაუჩინა.
ვინაიდან ფიფას მიერ გამოგზავნილ წერილში ვკითხულობთ, რომ საფეხბურთო კლუბმა “გურიამ” უნდა უზრუნველყოს გადახდის დამადასტურებელი ქვითრის ასლის გაგზავნა ამ ორგანიზაციაში არაუგვიანეს 2018 წლის 9 ივლისისა, დავინტერესდით, თუ რა ხდება რეალურად და რით აპირებს მუნიციპალიტეტი თავისი შვილობილი კლუბისთვის ამ ფინანსური საკითხის მოგვარებას.
პირველად საკრებულოს თავმჯდომარეს, ბესიკ ტაბიძეს შევეხმიანეთ, რომელსაც თავის დროზე კლუბის ხელმძღვანელობამ დახმარების თხოვნით წერილობით მიმართა. ტაბიძის თქმით, მიმდინარეობს მოლაპარაკებები აღნიშნული პრობლემის მოსაგვარებლად:
“წერილები გავაგზავნეთ, როგორც ფიფაში, ასევე, ბრაზილიურ კლუბში და ვითხოვთ თანხის გადახდასთან დაკავშირებით გარკვეულ შეღავათებს. ველოდებით პასუხს, თუ რა პირობებს შემოგვთავაზებენ. ფაქტია, რომ ვალი გადასახდელია”, _ გვითხრა საკრებულოს თავმჯდომარემ.
ბრაზილიურ კლუბთან მიმდინარე მოლაპარაკებებს ვალის გადავადების თაობაზე, ადასტურებს ლანჩხუთური კლუბის სპორტული დირექტორი გიორგი ჯორბენაძეც:
“ბრაზილიურ კლუბთან გვაქვს მოლაპარაკებები ვალის გადახდის გადავადების თაობაზე და ახლა ველოდებით კონკრეტულად, რა პირობებზე წამოვლენ. მინიმუმ ექვსი თვით მოხდება ამ ვალის გასტუმრების გადავადება”, _ ამბობს ჯორბენაძე.
ამავდროულად ირკვევა, რომ მუნიციპალიტეტის მერია ცდილობს გაარკვიოს, თუ ვისი ბრალეულობის გამო წარმოიშვა სერიოზული ფინანსური დავალიანება. როგორც მერის პირველ მოადგილესთან, გოგი ფაცურიასთან საუბრისას გაირკვა, “გურიას” საქმე მოკვლევისთვის სამართალდამცავ ორგანოებს უკვე გადაეგზავნა:
“შიდა აუდიტმა შეისწავლა ეს საქმე და გაარკვია, რომ ოლივეირა სილვასთან კონტრაქტი გაფორმებული იყო 2016 წლის 16 ივლისიდან 2017 წლის 15 ნოემბრამდე და მისი ხელფასი განსაზღვრული იყო 3 750 ლარით. რაიმე სხვა სახის დოკუმენტაცია ამ ფეხბურთელზე კლუბში არ მოიძებნება.
ვინაიდან “გურიას” სერიოზული ფინანსური ზარალი მიადგა ამ საქმის გამო, ჩვენ საქმის შესასწავლად ყველა დოკუმენტაცია გადავაგზავნეთ პროკურატურაში, სადაც მოხდება ამ საქმის მოკვლევა”, _ გვითხრა გოგი ფაცურიამ.
