2016 წელს, ოზურგეთის მუნიციპალიტეტის სოფელ ნაგომარში ყაჩაღები თავს დაესხნენ ბენო და ასმათ გორგაძეების ოჯახს. ყაჩაღებმა ოჯახის უფროსს 17 ჭრილობა მიაყენეს დანით ხელზე და ფეხზე. ასმათ გორგაძე საქმის გამოძიებას და დამნაშავეების დასჯას ითხოვს.
“ჩვენ ხულოში ვცხოვრობდით, მაგრამ სახლი დაგვეწვა და მაზლის დახმარებით ოზურგეთში, სოფელ ნაგომარში გადმოვსახლდით. მე და ჩემი ქმარი ვცხოვრობთ მარტო, ერთი შვილი გვყავდა და მოგვიკვდა. მთელი ცხოვრების განმავლობაში შრომაში გვაქვს გატარებული და არავისთვის ცუდი არ გაგვიკეთებია. არც დალხინებულად ვცხოვრობთ და არც გაჭირვებულად. კარტოფილი მოგვყავს, ბოსტანი გვაქვს, თხილის პატარა ნაკვეთი და ამით ვირჩენთ თავს. სოციალური დახმარება არ გვაქვს”, _ გვიყვება ასმათ გორგაძე, რომელსაც “გურია ნიუსი” სახლში ესტუმრა.
“2015 წელს მძიმედ ავად გავხდი. საავადმყოფოში ვიწექი _ ორჯერ დამჭირდა ექიმების დახმარება. მაშინ საყოველთაო ჯანდაცვის პროგრამაში მოვხვდი და 6 000 ლარით დამაფინანსეს, პირველ ეტაპზე 3 000 ლარი ჩამირიცხეს, მეორე ეტაპზე კიდევ 3 000. ბანკიდან სესხიც გამოვიტანეთ და ჯანმრთელობის პრობლემა მოვაგვარე. კრედიტის დასაფარად გადავწყვიტეთ, ძროხები გაგვეყიდა. გავყიდეთ და 2 600 ლარი ავიღეთ, 400 ლარი მეზობლისგან ვისესხეთ და დავფარეთ ბანკის ვალი.
ძროხების გაყიდვიდან მესამე დღეს, ღამის საათებში, ორი პირი შემოვარდა სახლში და ფულს გვთხოვდნენ. ჩემს მეუღლეს 17 ჭრილობა მიაყენეს ფეხზე და ხელზე _ ტელევიზორის მაგიდასთან დანა იყო და იმით დაჭრეს. უცებ ერთ-ერთ ყაჩაღს ბენომ ნიღაბი ჩამოხსნა, მაგრამ სახეზე ვერ შეიცნო, რადგან ოთახში შუქი არ იყო. ამის შემდეგ უცებ გავარდნენ სახლიდან და წავიდნენ. სანამდე ქმარს დაემუქრებოდნენ, ვუთხარი, რომ ოღონდ ქმარი არ მომიკლათ და თხილი წაიღეთ,მეთქი, რადგან ფული აღარ გვქონდა სახლში და ეტყობა ეს არ იცოდნენ. ნიღაბი რომ არ ჩამოეხსნა ჩემ ქმარს მძარცველისთვის, არ ვიცი, როგორ დასრულდებოდა ის ღამე.
ორი დღით ადრე კი ჩემი ძაღლი გალახეს, რადგან უცნობი პირები მეზობლის სახლში აპირებდნენ შესვლას. იქ არავინ იყო და პატრონს თხილი სახლში ჰქონდა დატოვებული. როგორც კი გავიგე ძაღლის საცოდავი წკმუტუნი, გავედი გარეთ და დავინახე, როგორ გადახტა ვიღაც ღობეზე და ჩაილაპარაკა _ გაიგეს ჩვენი მოსვლაო.
ახლა ჩემი მეუღლე მკურნალობს, ახალციხეშია წასული. მარცხენა ხელზე სერიოზული პრობლემები აქვს და გადაადგილება უჭირს.
2016 წელს, წინასაარჩევნო პერიოდში ჩვენი საქმით დაინტერესდნენ ნინო წილოსანი და არჩილ თალაკვაძე _ მაშინ დეპუტატობის კანდიდატები იყვნენ. დამპირდნენ, რომ საქმის დროულად გამოძიება მოხდებოდა, მაგრამ დღემდე გაუხსნელია. პროკურატურიდანაც იყვნენ, ადგილობრივი პოლიციის წარმომადგენლებიც მოვიდნენ, მაგრამ შედეგი არ არის.
აქციების გამართვას ვაპირებდი, მაგრამ ნინო წილოსანმა მთხოვა, არჩევნების წინ ეს არ გამეკეთებინა და ამ საქმის გამოძიებას თვითონ აიყვანდა კონტროლზე. მას შემდეგ ველოდები, როდის გახსნიან ამ ყაჩაღობის ფაქტს, რომელსაც ჩემი მეუღლე კინაღამ შეეწირა”, _ გვითხრა ასმათ გორგაძემ.
საქართველოს პარლამენტის წევრი, არჩილ თალაკვაძე “გურია ნიუსთან” აცხადებს, რომ ასმათ გორგაძეს შეხვდა:
“დიახ, შევხვდი ამ ოჯახს და როგორც დეპუტატს, უყურადღებოდ არ დამიტოვებია არც საქმე და არც გორგაძეების ჯანმრთელობის მდგომარეობა. საქმის გამოძიებასთან დაკავშირებით, გთხოვთ მიმართოთ შსს-ს _ მათ აქვთ უფლება ინფორმაცია მოგაწოდონ ამ საქმეზე,” _ გვითხრა არჩილ თალაკვაძემ.
საქართველოს პარლამენტის წევრი ნინო წილოსანი გორგაძეების საქმესთან დაკავშირებით ვრცელ კომენტარს აკეთებს, მაგრამ არ ამბობს, მოუწოდა თუ არა ასმათ გორგაძეს არჩევნების წინ მას აქცია არ გაემართა.
“ძალიან სამწუხარო ფაქტი მოხდა გორგაძეების ოჯახში. როგორც კი ამ ყაჩაღური თავდასხმის შესახებ შევიტყე, პირადად მოვინახულე დაზარალებული, რომელიც, მძიმე და მრავალმხრივი ჭრილობების მიუხედავად, საბედნიეროდ, გადარჩა.
გორგაძეების ოჯახს რამდენიმე თვის შემდეგაც მივაკითხე, რადგან მაინტერესებდა როგორც დაზარალებულის ჯანმრთელობის მდგომარეობა, ასევე, მისი აზრი საქმის მიმდინარეობის პროცესზე. პერიოდულად მქონდა კომუნიკაცია შსს ოზურგეთის რაიონულ სამმართველოში საქმის გამოძიებასთან დაკავშირებით. ვიღებდი იმ ინფორმაციას, რაც ჩემი უფლებამოსილების ფარგლებში შემეძლო მიმეღო. როგორც სამართალდამცავებმა განმიცხადეს, მათი მხრიდან მოხდა ნივთმტკიცებულებების ამოღება და შესაბამისი ექსპერტიზის ჩატარება, რის შემდეგაც, დაზარალებულ ბენია გორგაძის მითითების საფუძველზე, 50 პირისგან აღებული იქნა დნმ-ის ნიმუში, ნიღბიდან ამოღებულ დნმ-ის ნიმუშთან შესადარებლად, თუმცა მისი იდენტური არც ერთი ნიმუში არ აღმოჩნდა.
სამწუხაროდ, ძალიან გართულდა საქმის გამოძიება, რის ობიექტურ მიზეზებზეც თავად დაზარალებულთანაც არა ერთხელ გვისაუბრია. ბატონი ბენია ვერ ან არ ასახელებდა თავდამსხმელების ვინაობას და ამოსაცნობ ნიშნებს, რამაც გაართულა საქმის გამოძიება და დღემდე არ გვაქვს კონკრეტული შედეგი.
დაზარალებულ ოჯახს 2016 წლის შემდეგ გაეწია დახმარება, როგორც მუნიციპალიტეტის მიერ (ოზურგეთის მუნიციპალიტეტის მერიის სოციალური სამსახურიდან ერთხელ 300 ლარი, მეორეჯერ კი _ 400 ლარი. ასევე, ერთხელ მედიკამენტების საყიდლად _ 150 ლარი), ისე ჩემი სამაჟორიტარო ბიუროს (2017 წლის იანვარში, პროდუქტებით) და პირადად ჩემი მხრიდან. საქმეზე დღემდე მიმდინარეობს გამოძიება და იმედს ვიტოვებ ამ უამრავი ობიექტური მიზეზის მიუხედავად, დამნაშავეები იქნებიან აღმოჩენილი”, _ გვითხრა ნინო წილოსანმა.
საქართველოს პროკურატურის პრესსამსახურში გვითხრეს, რომ საქმეს საქართველოს შს სამინისტრო იძიებს; შსს პრესსამსახურში კი გაგვიცხადეს, რომ “აღნიშნულ ფაქტთან დაკავშირებით გამოძიება მიმდინარეობს სისხლის სამართლის კოდექსის 179 მუხლით, მეორე და მესამე ნაწილების ბ ქვეპუნქტებით, რაც გულისხმობს ბინაში უკანონოდ შეღწევის ჯგუფურად ჩადენილ ყაჩაღობას. გამოძიების ფარგლებში უკვე ჩატარებულია რიგი ოპერატიული საგამომძიებლო მოქმედებები. შემთხვევის ადგილიდან ამოღებულია ნივთმტკიცებები, ჩატარებულია შესაბამისი ექსპერტიზები. გამოკითხულია დაზარალებული ოჯახის წევრები და მეზობლები”.
