“გურია ნიუსის” ფეისბუქის ოფიციალურ გვერდზე მოგვწერა ქსელის ერთ-ერთმა მომხმარებელმა, რომელიც აკადემიკოს ნიკო მარის სახელობის ჩოხატაურის პირველი სკოლის კურსდამთავრებულია. როგორც გოგონა გვწერს, მას და თავის მეგობრებს სურვილი აქვთ, მათი ქულები ისევე იყოს გასაჯაროებული სახელ-გვარებთან ერთად, როგორც ეს სხვა სკოლების შემთხვევაშია.
“ჩვენი გადაწყვეტილებით _ არა, არ ვიცით, ეს როგორ მოხდა, რომ ჩვენი შედეგები უსახელოდაა გამოქვეყნებული. ვერ გეტყვით, ეს ვინ გადაწყვიტა ასე. მეგობრები ვეცადეთ, ერთმანეთში გაგვერკვია, ვისი სურვილით არ დაიწერა კონკრეტული პიროვნებების სახელ-გვარები, თუმცა ასეთი ჩვენ შორის არავინ აღმოჩნდა. თუ ეროვნულ გამოცდებზე მიღებული შედეგები გაზეთ “გურია ნიუსშიც” გამოქვეყნდება, არ გვინდა, ეს ანონიმურად იყოს და მხოლოდ რაოდენობა იყოს მითითებული, რამდენი აბიტურიენტი იყო 63-ქულიანი, 62-ქულიანი თუ ასე შემდეგ. ყველას ძალიან გაგვიხარდება თუ შედეგებთან ერთად ჩვენს სახელსა და გვარსაც დაწერთ”, _ მოგვწერა გოგონამ.
პირველი საჯარო სკოლის კურსდამთავრებულთა შედეგები ასეთია:
63 ქულა დაიმსახურეს მარიამ სიმონიამ და ნოდარ კუტუბიძემ; მათ თითო ქულით ჩამორჩებიან, ანუ 62 ქულა მიიღეს მარიამ ბარამიძემ და ქრისტინე გუდავაძემ; 61 ქულით შეფასდა ქეთევან ჯიქიას, მარიამ ჩხიკვაძისა და სოფო მრელაშვილის ნამუშევრები; მარიამ ღოღობერიძისა და მარიამ ტიშჩენკოს _ 60 ქულით; 59 ქულა მიიღეს თეა დოლიძემ და ინა მეფარიშვილმა; მარიამ მდინარაძემ, ერეკლე მამალაძემ და ლუკა კოტრიკაძემ _ 58 ქულა; რუსუდან ლომთათიძემ _ 57; გიორგი მეფარიშვილმა _ 56; ლუკა კიკვაძემ _ 53; ლალო მამალაძემ _ 50; ნანუკა ჯინჭარაძემ _ 48, ხოლო დიმიტრი სიხარულიძემ _ 43 ქულა.
შეგახსენებთ, რომ გუშინ “გურია ნიუსის” ვებგვერდზე გამოქვეყნდა ეროვნული გამოცდების ქართულ ენასა და ლიტერატურაში მიღებული შედეგები სათაურით _ “ვინ რამდენი ქულა მიიღო ქართულში _ გაიცანით მაღალქულიანი აბიტურიენტები ჩოხატაურიდან”, _ რომელშიც პირველი საჯარო სკოლის შედეგების ნაწილში ნათქვამია: “რაც შეეხება პირველი საჯარო სკოლის კურსდამთავრებულთა შედეგებს, მოწოდებული ინფორმაციით: 1-მა კურსდამთავრებულმა მიიღო 63 ქულა, 3-მა _ 62; 1-მა _ 61; 2-მა _ 59; 2-მა _ 58; 2-მა _ 56; 3-მა _ 54; 3-50; 3-მა _ 40.
როგორც პირველი საჯარო სკოლიდან გვატყობინებენ, მათ კურსდამთავრებულებს სახელების და გვარების გასაჯაროება არ სურთ”.
