რეგიონებში გასახორციელებელი პროექტების ფონდიდან წელს ლანჩხუთის მუნიციპალიტეტმა 11 ადმინისტრაციულ ერთეულში შიდა მიმოსვლის გზების მოსაწესრიგებლად ორი მილიონ 100 ათასი ლარის ოდენობის თანხა მიიღო.
აკეთი, აცანა, მამათი, ნიგოითი, შუხუთი, ჩიბათი, სუფსა, ნიგვზიანი, ნინოშვილი, ჯურუყვეთი, ჩოჩხათი _ ეს ის ადმინისტრაციული ერთეულებია, სადაც ზემოთ ნახსენები პროექტის მიხედვით გზების მოწესრიგება მიმდინარეობს. მუნიციპალიტეტის მერიის ინფორმაციით, ჯამში თერთმეტივე ადმინისტრაციულ ერთეულში რვა კილომეტრამდე სიგრძის გზა მოწესრიგდება.
“ეს არის გარდამავალი პროექტი და მინდა ხაზგასმით აღვნიშნო, რომ გზების მოწესრიგება ჩვენი მთავარი პრიორიტეტია. ისე გავაკეთებთ, რომ სამომავლოდ ეს პრობლემა მუნიციპალიტეტში აღმოფხვრილი იყოს”, _ თქვა უკვე მეორე ვადით არჩეულმა ლანჩხუთის მერმა ალექსანდრე სარიშვილმა შესრულებული თუ მიმდინარე სამუშაოების ადგილზე მონახულებისას.
მუნიციპალიტეტის ფეისბუქგვერდზე მოქალაქეთა კომენტარების მიხედვით თუ ვიმსჯელებთ, ხელმძღვანელობის ამ ოპტიმიზმს, გარკვეულწილად, ეჭვის თვალით უყურებს თავად მოსახლეობა.
“სიაში 11 სოფელია ჩამოთვლილი და წერია, რომ საერთო ჯამში, გაკეთდება 8 კმ. გზის საფარი, საშუალოდ, 727 მეტრი ერთ სოფელში, ანუ ზოგან _ მეტი, ზოგან _ ნაკლები და თქვენ სოფელში თუ გზა საერთოდ არ ვარგა, ძირითადად, არც შემდეგ იქნება გადასარევი”, _ მერიის მიერ ფეისბუქზე გამოქვეყნებული ინფორმაციის პასუხად წერს გოჩა გიგინეიშვილი.
მერიისვე ფეისბუქგვერდზე გამოქვეყნებული კომენტარების მიხედვით, ადგილობრივ მოსახლეობას რაც ყველაზე მეტად აწუხებს, მოუწესრიგებელი შიდა გზებია.
სუფსის ადმინისტრაციული ერთეული ერთ-ერთია, სადაც ეს პროექტი ხორციელდება, თუმცა, ამის მიუხედავად, ადგილობრივი მოსახლეობა აქტიურად საუბრობს არსებულ პრობლემებზე.
“კარგია, თუ რაიმეს გააკეთებენ, მაგრამ, როცა ტაბანათზე გზის მოხრეშვა მოითხოვეს, მაშინ არ იყო ბიუჯეტში ფული და ახლა საიდან მოიტანეს ასფალტის დასაგებად?! სუფსაში რა დაათვალიერეს?! არხებს გავიყვანთო და წყალი საცაა, სახლებში შემოვა. დარჩა დაპირება დაპირებად?! ტაბანათს მიხედეთ, სანამ მართლაც სასწაული მოხდებოდეს”, _ წერენ სუფსის თემის, სოფელ ტაბანათის მცხოვრებლები მერიის ფეისბუქგვერდზე.
ირკვევა, რომ ანალოგიური პრობლემა აქვთ ხიდმაღალას მცხოვრებლებსაც: “ვიხრჩობით წყალში და მოგვეშველეთ!”
საკმაოდ ცუდი მდგომარეობაა სუფსის რკინიგზის სადგურის მიმდებარე ტერიტორიაზე.
“სასაცილოა ეს ყველაფერი, სატირალი რომ არ იყოს _ სადგურის წინ ტერიტორია თურმე არც ღრმაღელეს ეკუთვნის და არც სუფსას. მადლობელი უნდა ვიყოთ თურმე, რაც გააკეთეს. 21-ე საუკუნეში ასეთი გზის არსებობა, სულ ცოტა, სირცხვილია. სულ რაღაც 1.2 კმ-ია და თბილისიდან აქამდე ისე არ იღლები, როგორც გზის მაგ მონაკვეთის გავლისას. თუ არ იცით, მოდით, ნახეთ რა დღეშია აქ გზა. ამას მიხედეთ, 300 მეტრის გავლას ნახევარ საათს რომ ვანდომებთ”, _ დასძენენ სუფსის მცხოვრებლები.
სოფლების გარკვეულ ნაწილში გზის მოწესრიგებით კმაყოფილია ჩიბათის მოსახლეობა, თუმცა, ადგილობრივი ხელისუფლებისგან წლების წინ მიღებული პირობის შესრულებასაც ითხოვენ: “კარგია, თუ რამ კეთდება. სოფელ ჭალაშიც გვპირდებიან ორი წელია, გზას და არ ჩანს არაფერი ჯერ. თუ ჩვენც გაგვითვალისწინებთ, მადლობელი დაგრჩებით”.
ინფრასტრუქტურის კუთხით სოლიდური თანხების ხარჯვის მიუხედავად, უკმაყოფილოა ქალაქის მოსახლეობა და შიდა გზების მოწესრიგებას ითხოვს:
“ქალაქში რატომ არ ტარდება მსგავსი სამუშაოები? ნეტავ, არაა სარფიანი? არის კი ეს ინფრასტრუქტურული პროექტების სამართლიანი განაწილება?! ქალაქის გზები, ცენტრის გარდა, პრიორიტეტული არაა?! სად წავიდა ჭავჭავაძის ქუჩის ასფალტი?! ქალაქის ქუჩებში როდის უნდა დაიგოს შიდა გზები?! კისერს მოიტეხ ისეთი ქუჩებია. სადგური რას ჰგავს და კიდევ ბევრი. ან რაც დააგეს, რას ჰგავს _ ძაღლის ენასავით ვიწროა. საფო მგელაძის ქუჩაზე მობრძანდით ერთი, წვიმა რომ იქნება. პუშკინის, კვირკველიას, ჭავჭავაძის, გვარჯალაძის, ვალოდია წულაძის ქუჩები ნახეთ, რა დღეშია!”
მუნიციპალიტეტის ხელმძღვანელობისგან ყურადღებას ითხოვს წყალწმინდის მოსახლეობაც: “წყალწმინდას არავინ ახსენებს, ლანჩხუთს აღარ ეკუთვნის?! იქნებ ჩვენც მოგვაქციოთ ყურადღება! წყალწმინდაშიც გვაღირსეთ გზა და განათება, დააგეთ ომფარეთისკენ მიმავალი გზა”, _ ამბობენ ადგილობრივები.
[sexy_author_bio]
