ზოგადი უნარების გამოცდებში ყველაზე მაღალი ქულა, გურიის მასშტაბით, ლუკა დათუნაშვილმა მიიღო. მას 76 ქულა აქვს და როგორც მუნიციპალიტეტების რესურსცენტრებში გვითხრეს, ასეთი შედეგი ამ მონაცემით არავის აქვს.
ლუკამ ოზურგეთის მუნიციპალიტეტის სოფელ დვაბზუს საჯარო სკოლა გასულ წელს დაამთავრა. ჩვენთან საუბრისას ჰყვება, რომ შარშან უნარებში 74 ქულა მიიღო, თუმცა, სხვა საგანში დააკლდა და ამის გამო სასურველ უნივერსიტეტში ვერ მოხვდა.
_ შარშანაც ყველაზე მაღალი ქულა მქონდა უნარებში _ 74, მაგრამ ნერვიულობისა და სიჩქარის გამო, მათემატიკის ტესტური დავალება ვერ გადავიტანე სწორად და ვერ გადავლახე ბარიერი (60+1), რომელიც ივანე ჯავახიშვილის სახელობის სახელმწიფო უნივერსიტეტში, მათემატიკის ფაკულტეტზე მოსახვედრად მჭირდებოდა.
შეფასებისასაც დამაკლეს ქულა, რომელიც შემდეგ აპელაციის გზით დავიბრუნე, _ ამბობს ჩვენთან საუბრისას ლუკა დათუნაშვილი, რომელსაც წელს ყველა გამოცდის ჩაბარება თავიდან მოუწია.
_ ქულების შენახვის პრინციპი გაუქმებულია, ასე რომ, ყველა გამოცდის ჩაბარება თავიდან მომიხდა, _ გვითხრა ლუკამ
ლუკას ახლა კავკასიის უნივერსიტეტში, კომპიუტერულ ტექნოლოგიებზე და გამოყენებითი მათემატიკის ფაკულტეტზე სურს მოხვდეს.
კითხვაზე, რატომ თქვა უარი ჯავახიშვილის უნივერსიტეტზე, ასე გვპასუხობს:
_ ჯავახიშვილის უნივერსიტეტი ერთ-ერთი საუკეთესოა, მაგრამ 4 წელი სწავლას, იდეაშიც არ ვაპირებ. გაცვლითი პროგრამით მინდა წასვლა მე-2 კურსიდან და ამ მხრივ, კავკასია უფრო პერსპექტიულია, რადგან ბევრ ქვეყანასთან აქვს გაცვლითი პროგრამა. ამასთანავე, თუ ორი წელი ფაკულტეტზე პირველ ათეულში მოხვდები, მერე შენი ნებით არჩეულ ქვეყანაში გზავნის უნივერსიტეტი.
