ლანჩხუთის მუნიციპალიტეტის მერიასა და საკრებულოში პოლიტიკურ თანამდებობის პირებსა და აპარატის მოსამსახურეებს თანამდებობრივი სარგო გაეზარდათ. აღნიშნულ საკითხზე დადგენილება საკრებულოს რიგგარეშე სხდომაზე დეპუტატებმა ხმათა აბსოლუტური უმრავლესობით დაამტკიცეს.
ახალი დადგენილების შესაბამისად, მერიასა და საკრებულოში ხელმძღვანელ პირთა სახელფასო ანაზღაურება არ შეცვლილა და ისევ 2650 ლარით განისაზღვრა. კვლავინდებურად 2000-2000 ლარს აიღებენ მერის პირველი და საკრებულოს მოადგილეები. 1700 ლარის ნაცვლად 1800 ლარით განისაზღვრა მერის რიგითი მოადგილის ანაზღაურება. უცვლელი რჩება საკრებულოს ფრაქციებისა და კომისიების თავმჯდომარეების თანამდებობრივი სარგო, რომელთა ყოველთვიური ანაზღაურება 1700 ლარია. ფრაქციათა თავმჯდომარის მოადგილის ყოველთვიურ თანამდებობრივ სარგოდ კი 1250 ლარი განისაზღვრა.
ახლადმიღებული დადგენილების შესაბამისად, პირველი რანგის სტრუქტურული ერთეულის ხელმძღვანელი პირის ანაზღაურება, ნაცვლად 1350 ლარისა, 1500 ლარით წარმოდგენილი. 200 ლარით გაეზარდათ ანაზღაურება მეორე რანგის სპეციალისტებს და მათი ხელფასი 1200 ლარს შეადგენს. თუმცა, ერთი გამონაკლისით _ საკრებულოში ამ რანგის სპეციალისტი, რომელიც სამდივნოს ხელმძღვანელობს 1100 ლარს აიღებს. მისივე საკრებულოელი კოლეგა კი, რომელიც საორგანიზაციო განყოფილებას უდგას სათავეში _ 1200 ლარს.
თუ რატომაა ერთი და იმავე რანგის სპეციალისტის ხელფასებს შორის სხვაობა, გაუგებარია დეპუტატ ამირან გიგინეიშვილისთის, რომელმაც საკუთარი უარყოფითი დამოკიდებულება აღნიშნულ საკითხთან დაკავშირებით გააჟღერა კიდეც საკრებულოს სხდომაზე.
„ეტყობა, ქუდი არ ახურავს ან „ლეიბორისტია?!“ ორივე მეორე რანგის სპეციალიტს განეკუთვნება და რატომ უნდა ჰქონდეთ განსხვავებული ხელფასები?!“ _ კითხვა დასვა გიგინეიშვილმა, რაზეც ეთიკის კომისიის თავმჯდომარემ, ვერიკო კვირკველიამ განმარტა _ „სამდივნოს განყოფილების ხელმძღვანელის ანაზღაურება წინათაც 100 ლარით ნაკლები იყო და ვინაიდან მეორე რანგის სპეციალისტების ანაზღაურების მატება 200 ლარით მოხდა, ეს სხვაობაც სწორედ ამითაა გამოწვეული“, _ თქვა კვირკვრლიამ.
თუმცა, გიგინეიშვილისთვის კომისიის თავმჯდომარის ეს არგუმენტი არადამაკმაყოფილებელი აღმოჩნდა და მან საბოლოოდ დაასკვნა, რომ სამდივნოს ხელმძღვანელი უთუოდ „ლეიბორისტია“.
შედარებით მიზერული სახელფასო მატება შეეხოთ მესამე რანგის სპეციალისტებს. ირკვევა, რომ მათი თანამდებობრივი სარგო მხოლოდ 50 ლარითაა გაზრდილი. ამ რანგის პირველი კატეგორიის უფროსი სპეციალისტის ხელფასი 750 ლარის ნაცვლად 800 ლარითაა განსაზღვრული, ხოლო მეორე კატეგორიის უფროსი სპეციალისტის _ ნაცვლად 650 ლარისა, 700 ლარით. თუმცა, იმ განსხვავებით, რომ ადმინისტრაციულ ერთეულებში მერის წარმომადგენლების ხელფასი, რომლებიც ასევე მესამე რანგის პირველი კატეგორიის უფროს სპეციალისტს წარმოადგენენ, 1000 ლარია. მათი თანაშემწეების კი, რომლებიც მეორე რანგის პირველი კატეგორიის უმცროსი სპეციალისტის სტატუსს ატარებენ, ყოველთვიურად სარგოს სახით 600 ლარს მიიღებენ.
მერიასა და საკრებულოში თანამდებობრივი სარგოს ზრდას უმრავლესობასთან ერთად მხარი ოპოზიციამაც დაუჭირა, თუმცა, „ნაციონალური მოძრაობის“ წევრმა, კახა ასკურავამ იმედი გამოთქვა, რომ ხელფასების ზრდა „გარე სამსახურებშიც“ მოხდება. ასკურავამ ამ შემთხვევაში მეეზოვეები იგულისხმა, რომლებიც რამდენიმე დღის წინ შეხვდნენ კიდეც ლანჩხუთის მერს ხელფასის გაზრდის მოთხონით.
